Peteĩ múndo pyahu Ñandejára oprometéva

LA BIBLIA haʼéva Ñandejára Ñeʼẽ omeʼẽ ñandéve tuichaiterei esperánsa heʼívo: ‘Oĩ umi yvága pyahu ha peteĩ yvy pyahu ñahaʼarõva haʼe oprometehaguéicha, ha koʼãvape oĩta hustísia’ (2 Pedro 3:​13).

Mbaʼépa ‘umi yvága pyahu’? La Biblia oñeʼẽ umi yvága rehe peteĩ goviérnoramo (Hechos 7:​49). Upéicharõ ‘umi yvága pyahu’ haʼe peteĩ goviérno pyahu ogovernátava ko Yvy. Ojeʼe hese ipyahuha pórke omyengoviáta koʼag̃agua sistéma polítikope, ha avei okumplígui ohóvo Ñandejára propósito. Haʼe pe Rréino Jesús ñanemboʼevaʼekue jajerure hag̃ua ñane ñemboʼépe (Mateo 6:10). Ñandejára, oĩva yvágape, omoĩ pe rréino. Upévare oñehenói ‘rréino yvagapegua’ (Mateo 7:​21).

Mbaʼépa pe ‘yvy pyahu’? Ndahaʼéi peteĩ planéta pyahu, pórke la Biblia heʼi porã ko Yvy ape ári ojeikotaha opa ára g̃uarã. Pe ‘yvy pyahu’ haʼe peteĩ sosieda umána ipyahúva. Upéichata ndaiporimoʼãvéimagui pype umi iñañáva (Proverbios 2:​21, 22). Enterove umi oikóva ipype omombaʼeguasúta ha iñeʼẽrendúta Ijapoharépe ha oikóta hikuái haʼe oipotaháicha (Salmo 22:27). Opa tetã rupi ojeʼe la héntepe oikuaa hag̃ua mbaʼépa Ñandejára oipota ojapo hikuái. Rejapopareína upéva?

Pe múndo pyahúpe, enterove omombaʼeguasúta Ñandejára autorida. Ndépa rehayhu Ñandejárape? Rejaposépa pe heʼíva rehayhúgui chupe? (1 Juan 5:3.) Ojekuaápa nderehe upéva nde rogapýpe, ne mbaʼapohápe térã rehohápe restudia? Ojehechápa upéva nde rekovére?

Pe múndo pyahúpe, oĩva guive yvyporakuéra oadoráta oñondivepa Ñandejára añeteguápe. Ndépa readora pe yvága ha Yvy Apoharépe? Reñandúpa pe mborayhu oĩva ne ermanokuéra apytépe, oĩva opa tetã rupi ha oguerekóva opaichagua rrása ha ñeʼẽ? (Salmo 86:​9, 10; Isaías 2:​2-4; Sofonías 3:9.)

[Rrekuádro oĩva páhina 17-pe]

Mávapa pe Ñandejára oprometevaʼekue koʼã mbaʼe?

Haʼe pe yvága ha Yvy Apohare. Jesucristo heʼivaʼekue hese haʼeha ‘Ñandejára añetegua peteĩetéva’ (Juan 17:3).

Heta oĩ omombaʼeguasúva umi diós haʼekuéra voi ojapovaʼekuépe. Oĩ millones umi hénte oadoráva taʼanga oikoveʼỹvape. Oĩ avei omombaʼeguasúva yvyporakuéra institusión, umi pensamiénto materialísta térã pe haʼekuéra oipotávante. Ha oĩ avei umi heʼíva ojapoha la Bíbliape heʼiháicha, péro nomombaʼeguasúiva pe ‘Ñandejára añetegua’ réra, oĩva la Bíbliape (Deuteronomio 4:​35).

Pe opa mbaʼe Apohare heʼi ijehe: ‘Che haʼe Jehová. Upéva haʼe che réra’ (Isaías 42:​5, 8). Upe téra ojeskrivi ypy vaʼekue siete mil vése rupi la Bíbliape. Ha Jesucristo omboʼevaʼekue isegidorkuérape ojerure hag̃ua ñemboʼépe: ‘Ore Ru yvágape reiméva, toñemombaʼeguasu nde réra’ (Mateo 6:9).

Mbaʼeichaguápa pe Ñandejára añetegua? Heʼi ijehe oguerekoha ‘poriahuvereko, pyʼaporã, ndaipochyreiriha ha henyhẽha mbaʼe porã ha verdágui’, péro mbaʼeveichavérõ ndohejareimoʼãi umi oñemombaretévape ndojaposéigui Haʼe heʼíva (Éxodo 34:​6, 7). Upéva jahecha ñamañáramo mbaʼéichapa otrata yvyporakuérape ymaite guive.

Ñamombaʼeguasuvaʼerã Ñandejárape ha avei héra. Haʼégui opa mbaʼe Apohare ha Soberano Universal, chupe añoite ñahendu ha jaadoravaʼerã. Rejapopareína upéva?

[Taʼanga ha rrekuádro oĩva páhina 18-pe]

Mbaʼépa oguerúta umi ‘yvága pyahu’ ha pe ‘yvy pyahu’?

Ko Yvýgui oikóta peteĩ paraíso Lucas 23:43

[Taʼanga ha rrekuádro oĩva páhina 19-pe]

Ndépa rehupytýta umi mbaʼe porã?

Ñandejára ndaikatúi ijapu! (Tito 1:2.)

Jehová heʼi: ‘Che ñeʼẽ [...] ndojevymoʼãi che rendápe oikoʼỹre pe haʼevaʼekue, síno ojapovaʼerã katuete che rembipota, ha osẽ porãta katuete pe haʼevaʼekue ojapo hag̃ua’ (Isaías 55:11).

Jehová ojapomahína ‘umi yvága pyahu ha peteĩ yvy pyahu’, pórke pe goviérno yvagapegua oñepyrũma oisãmbyhy, ha ojapopáma pe oñekotevẽva oĩ hag̃ua pe ‘yvy pyahu’.

Oñemombeʼu rire Revelaciónpe umi mbaʼe porãita oguerútava yvyporakuérape umi ‘yvága pyahu’ ha pe ‘yvy pyahu’, Ñandejára voi, pe Soberano Universal, heʼi: ‘Emaʼẽ!, ambopyahupaitéta opa mbaʼe’. Heʼi avei: ‘Ehai, pórke koʼã ñeʼẽ añetegua ha ijeroviapy’ (Revelación 21:​1, 5).

Upévare, iñimportanteterei ñañeporandu: “Ajapópa umi kámbio oñekotevẽva ikatu hag̃uáicha aiko pe ‘yvy pyahúpe’, oisãmbyhýtava umi ‘yvága pyahu’?”.