Koʼẽrõitéma opáta opaichagua jeiko asy!
Oimevaʼerã nde reñeporandúma, ‘Mbaʼére piko oĩ hetaiterei jeiko asy?’ Ymaite guivéma la héntepe ombohasa asy umi ñorairõ guasu, mboriahu, heta desástre, krímen, inhustísia, mbaʼasy ha ñemano. Umi cien áño ohasavaʼekuépe, hetaitereive ojehasa asy ymave guarégui. Opánepa sapyʼánte koʼã jehasa asy?
Ikatu javyʼa pórke opáta, ha opáta koʼẽrõite! Ñandejára Ñeʼẽ, la Biblia, heʼi: ‘Pe iñañáva noĩmoʼãvéima... Péro umi heko porãvape opytáta ko Yvy, ha umíva ovyʼaitereíta tuicha pyʼaguapýpe.’ Ha arakaʼe pevépa ovyʼáta hikuái? ‘Umi heko potĩvape opytáta ko Yvy, ha umíva oikóta hiʼári opa ára g̃uarã’—Salmo 37:10, 11, 29.
Ñandejára oipeʼa rire umi mbaʼe vai ha jeiko asy, ko yvýgui ojejapóta peteĩ paraíso. La hénte ikatúta oiko opa ára g̃uarã tesãi porã ha vyʼápe. Ñandejára Ñeʼẽ heʼi mbaʼeichaitétapa upéva: ‘Ha haʼe (Ñandejára) omokãta hesaykuéra, ha ndaiporimoʼãvéi ñemano, térã jaheʼo, térã pyahẽ, térã tasy.’—Revelación 21:4.
Pe múndo pyahúpe, umi omanóva jepe oñemoingove jeýta, ovyʼa hag̃ua avei umi mbaʼe porã apytépe. ‘Oñemoingove jeýta umi heko potĩva ha umi heko potĩʼỹva avei’ (Hechos 24:15) Upévare Jesús ikatuvaʼekue heʼi peteĩ hembiapo vai vaʼekuépe, ha koʼág̃a oñembyasýva ha ojeroviáva hese: ‘Nde reiméta chendive pe Paraísope’. —Lucas 23:43.
Mbaʼérepa Oñepyrũ pe Jeiko Asy?
Ñandejára oipotárire umi mbaʼe porã yvypórape g̃uarã, mbaʼére piko oheja oñepyrũ pe jeiko asy? Ha mbaʼére oheja ojeiko asy areterei?
Ñandejára ojapóvo Adán ha Évape, ojapo chupekuéra perfékto hetépe ha iñapytuʼũme. Omoĩ chupekuéra peteĩ hardínpe, peteĩ paraíso, ha hembiapokuerarã omeʼẽ umi mbaʼe ombovyʼátava chupekuéra. La Biblia heʼi: ‘Ñandejára omaʼẽ umi hembiapokuére, ha ohecha iporãitereiha’ (Génesis 1:31) Iñeʼẽrendúrire hikuái Ñandejárape, itaʼyrakuéra iperfektovaʼerãmoʼã, ha ko yvýgui oikovaʼerãmoʼã peteĩ paraíso oparupiete, ojeikohápe pyʼaguapy ha vyʼápe.
Ñandejára omeʼẽ Adán ha Évape pe liverta oiporavo hag̃ua haperã; upe liverta haʼe omoĩ ñande pype. Ndojapói chupekuéra oiko hag̃ua umi mákinaicha, ndaikatúiva opensa. Péro, ovyʼa are hag̃ua hikuái, oiporu porã vaʼerã pe liverta oguerekóva— iñeʼẽrendu hag̃ua Ñandejárape. Heʼiháicha Ñandejára: ‘Che haʼe Ñandejára Jehová, Upe nemboʼéva pe ou porãtava ndéve, Upe ohechaukáva ndéve mbaʼe tapérepa reguatavaʼerã’ (Isaías 48:17) Peteĩ persóna oiporu vaíramo pe liverta oguerekóva oiporavo hag̃ua, osẽ vaietereíta, pórke yvypóra ndojejapói oiko porã hag̃ua Ñandejaraʼỹre. La Biblia heʼi: ‘Pe tape yvypóra oguatáva ndahaʼéi imbaʼe. Noperteneséi pe kuimbaʼe oguatávape heʼi moõpa opyrũvaʼerã’—Jeremías 10:23.
Ñambyasy, péro ñande ru ha ñande sy ypykue oimoʼãvaʼekue ikatutaha oiko ha osẽ porã Ñandejaraʼỹre. Péro oñemomombyrývo Ñandejára goviérnogui, Haʼe noĩvéima hendivekuéra, ohundi hikuái pe perfeksión oguerekovaʼekue. Oñepyrũ oñembyai ha upéi ituja ha omano. Ñande itaʼyrakuéra, ha upévare ñanderupyty avei pe imperfeksión ha ñemano.—Romanos 5:12.
Pe Mbaʼe iñimportantevéva—Ñandejára Goviérno
Mbaʼére piko Ñandejára nohundíri Adán ha Évape ha ndojapói jeýnte ótro kuña ha kuimbaʼe? Pórke oĩ oñemoĩva Ñandejára goviérnore, odesafiáva pe derécho haʼe oguerekóva ogoverna hag̃ua opa mbaʼe ári. Ojejapo koʼã porandu: Mávapa oguereko derécho ogoverna hag̃ua, ha máva ogovernárõpa oĩ porãta? Ha avei: Oiko porãvénepa yvypóra Ñandejára nogovernáiramo hiʼarikuéra? Omeʼẽmbaite rupi liverta ha tiémpo yvypórape oñehaʼã hag̃ua oiko Ñandejaraʼỹre, Ñande Apohare ohechauka ojeiko porãvépa Igoviérno guýpe térãpa yvypóra goviérno guýpe. Omeʼẽmbaite tiémpo yvypórape ohaʼã hag̃ua ijehegui opaichagua sistéma polítiko, sosiál, ekonómiko ha relihióso.
Mbaʼépa ohechauka pe tiémpo ohasáva? Umi miles de áño ohasámava ohechauka opaichagua jehasa asy hetaveha ohóvo. Ko cien áño ohasavaʼekuépe yvypóra hetaite ohasa asy, ojehechaʼỹhaguéicha gueteri koʼág̃a peve. Millones ojejuka pe Holocáustope, Segunda Guerra Mundiálpe. Umi ñorairõ guasúpe hetave 100 millónesgui ojejuka. Krímen ha violénsia isarambi opárupi. Pésteicha pe dróga opárupi oike. Umi mbaʼasy ojerováva relasión seysuál rupive isarambive ohóvo. Millones omano káda áño ñembyahýi ha mbaʼasýgui. Pe família ha teko potĩ jahahápe noñemombaʼevéi. Ha ndaipóri ni peteĩ goviérno umáno ikatúva omyatyrõ umi provléma. Ndaipóri ni peteĩ ikatúva oipeʼa pe tuja, mbaʼasy ha ñemano.
Koʼã situasión oiko heʼihagueichaite la Biblia ko tiémpope g̃uarã. Ñandejára Ñeʼẽ ohechauka koʼág̃a ñaimeha ko sistéma ‘ára pahápe’, oĩtahápe ‘tiémpo ijetuʼúva, hasýva ñamaneha hag̃ua’. Ha heʼihagueichaite la Biblia, ‘umi iñañáva ha umi oporombotavýva hembiapo vaive ohóvo.’—2 Timoteo 3:1-5, 13.
Umi mbaʼe oikóva ohechauka koʼẽrõitéma opataha pe tiémpo yvypóra oguerekóva oñehaʼã hag̃ua, heta jehasa asýpe, oiko ogovernaʼỹre hiʼarikuéra Ñandejára. Ohechauka porã ndaikatuiha ni mbaʼevéicha osẽ porã peteĩ goviérno umáno oñemomombyrýva Ñandejáragui. Ñandejára goviérno añoite ikatu ogueru pyʼaguapy, vyʼa, tesãi porã ha jeikove opaʼỹva. Opapotaitéma pe tiémpo Jehová omeʼẽva umi mbaʼe vai ha jehasa asýpe. Koʼẽrõitéma Ñandejára ojokóta yvyporakuéra rembiapo ha ohundipaitéta ko sistéma vai avavépe nombovyʼáiva
Opa potaitéma pe jeiko asy
La Biblia heʼivaʼekue mbaʼépa oikóta: ‘Ha umi rréi oisãmbyhy aja (umi goviérno oĩva koʼág̃a), Ñandejára yvagapegua omoĩta peteĩ rréino (yvágape) arakaʼeve noñehundimoʼãiva... Omonguʼipáta ha ohundipáta koʼã rreinokuéra (umi goviérno koʼag̃agua), ha haʼete voi opytáta opa ára g̃uarã’ (Daniel 2:44) Ojehecháta Jehová haʼeha pe omereséva ogoverna, oguerekóva derécho ogovernávo, irréino yvagapegua rupive. Upéva haʼe pe mbaʼe iñimportantevéva omboʼéva la Biblia. Omeʼẽvo pe señál ko ‘ára pahápe’ g̃uarã, peteĩ párte prinsipálpe Jesús heʼi: ‘Koʼã marandu porã Rréino rehegua ojekuaaukavaʼerã opa ojeikohárupi testimoniorã opa tetãnguérape; ha upe rire og̃uahẽta pe ipaha.’—Mateo 24:14.
Og̃uahẽvo pe ipaha, mávapa oikovéta? La Biblia omombeʼu ñandéve: ‘Umi heko potĩva oikovéta ko Yvy ape ári, ha umi heko marãʼỹva opytáta ipype. Umi iñañáva katu oñehundipáta ko Yvy ape árigui’ (Proverbios 2:21, 22) Peteĩ heko porãva haʼe pe oaprende ha ojapóva umi mbaʼe oipotáva Jehová: ‘Kóva heʼise pe jeikove opaʼỹva, toguerekove ohóvo hikuái konosimiénto ndehegui, Ñandejára añetegua peteĩetéva, ha upe nde rembouvaʼekuégui, Jesucristo.’ (Juan 17:3) Upéicha, ‘ko múndo ohasa ohóvo... péro pe ojapóva Ñandejára oipotáva opytáta opa ára g̃uarã.’—1 Juan 2:17.
Ñandejára Ñeʼẽ ojeporúva oñenohẽ Traducción del Nuevo Mundo de las Santas Escritúrasgui (pe oguerekóva rreferénsia)