Marandu Reino rehegua núm. 37

Marandu opavave yvypórape g̃uarã

Koʼẽrõitéma oñehundíta rrelihión japu!

▪ Mbaʼépa hína pe rrelihión japu?

▪ Mbaʼéichapa opáta?

▪ Mbaʼéichapa opokóta nderehe oñehundi vove?

Mbaʼépa hína pe rrelihión japu?

Nandepyʼapýipa umi mbaʼe vai ojejapóva rrelihión rérape? Nanembopochýipa umi tapicha omoakãva gérra, terrorísmo térã korrupsión heʼíramo oserviha Ñandejárape? Mbaʼérepa haʼete ku rrelihióngui oúva heta provléma?

Ndajaʼéi opa rrelihión upeichaha, pe rrelihión japu añónte ojapo umi mbaʼe vai. Jesucristo heʼivaʼekue rrelihión japu hembiapo vaiha. Ha ombojojávo yvyra mátare heʼi: “yvyra ivaíva katu hiʼa vai” (Mateo 7:​15-​17).a Mbaʼe mbaʼépa ojapo rrelihión japu?

Rrelihión japu...

◼ OIKE ÑORAIRÕ HA POLÍTIKAPE. “Asia ha heta hendápe avei, umi omoakãva rrelihión orekoségui ipoguýpe hetave mbaʼe ombotavy umi tapicha oserviséva Ñandejárape”, heʼi pe rrevísta hérava Asiaweek. Avei heʼi upévare “ko múndo itarovapotaitemaha”. Estados Unídospe peteĩ karai omoakãva rrelihión heʼi: “Opa hag̃ua umi jejuka, ojejukapavaʼerã umi terrorísta”. Haʼe heʼi ko mbaʼe: “Pejukapavaʼerã umíva Ñandejára rérape”. La Biblia katu heʼi: “Oĩrõ heʼíva: ‘Che ahayhu [Ñandejárape]’, ha upekuévo ndohayhúi hapichápe, ijapu” (1 Juan 4:​20). Jesús heʼivaʼekue avei: “Pehayhu umi pende rehe ijaʼeʼỹvape” (Mateo 5:​44). Ohejápa umi rrelihión ojeho gerrahápe?

◼ OMOSARAMBI JAPU. Heta rrelihión omboʼe jaguerekoha peteĩ álma térã espíritu omanoʼỹva. Upéicha heta rrelihión oipeʼa rei tapichakuéragui ipláta, okovrávo chupekuéra oñemboʼe hag̃ua ihentekuéra omanovaʼekuére. Péro la Biblia nomboʼéi upéva. Heʼi guei: ‘Álma opekáva... upéva omanóta’ (Ezequiel 18:4, NM). “Oikovéva oikuaa omanovaʼerãha, omanóva katu ndoikuaái mbaʼeve” (Eclesiastés 9:5). Jesús omboʼevaʼekue oñemoingove jeytaha umi omanovaʼekuépe, upéva noñekotevẽivaʼerãmoʼã jarekórire peteĩ álma omanoʼỹva (Juan 11:11-​25). Omboʼépa ne rrelihión álma nomanoiha?

◼ NDEʼÍRI IVAIHA TEKO VAI. Heta tetã rupi, oĩ rrelihión ohejáva omoakã chupekuéra kuimbaʼe oikóva hapicha kuimbaʼéndi térã kuña oikóva hapicha kuñándi. Avei ojopy mburuvichakuérape ikatu hag̃ua omenda hikuái. Umi rrelihión heʼíva jepe teko vai naiporãiha, oheja omoakã chupekuéra umi ojavykýva mitãme. Péro, mbaʼépa heʼi la Biblia? Heʼi porã: “Aníke pejejavy, umi oporoguerekóva mendaʼỹ rehe, térã taʼanga omombaʼeguasúva, térã omendáva ha oikóva ambue ndive, térã kuimbaʼe oguerekóva hapicha kuimbaʼépe [...] ndoikemoʼãi [...] Ñandejára rréinope” (1 Corintios 6:​9, 10, BNP). Ndépa rehendúma oĩha rrelihión omoneĩva teko vai?

Mbaʼépa oikóta umi rrelihión hembiapo vaívare? Jesús heʼivaʼekue: “Opa yvyra ndahiʼaporãiva oñekytĩva ha oñemombo tatápe” (Mateo 7: 19). Ha upéva oikóta, pe rrelihión japu oñekytĩta ha oñehundíta. Péro, mbaʼéichapa ha arakaʼépa oikóta ko mbaʼe? Peteĩ visión oĩva Ñandejára Ñeʼẽme, Apocalípsispe [Revelación], kapítulo 17 ha 18, omombeʼu ñandéve.

Mbaʼéichapa oñehundíta rrelihión japu?

Epensamína rehechaha ko mbaʼe. Peteĩ kuña reko vai oguapýva peteĩ mymba ivaietereíva ári. Ko mymba siete iñakã ha diez hatĩ (Apocalipsis [Revelación] 17:​1-4). Mávapepa orrepresenta ko kuña reko vai? Haʼe oreko ipoguýpe “mburuvicha guasu kuéra yvy ariguápe”, isái pytã, oiporu insiénso ha oreko hetaiterei mbaʼe. Avei, ipaje apópe ‘ombotavy opa tetãme’ (Apocalipsis 17:18; 18:12, 13, 23). La Biblia ohechauka ñandéve ko kuña reko vai orrepresentaha peteĩ aty guasúpe, oikehápe opa rrelihión hembiapo vaíva.

Pe mymba katu haʼe umi goviérno orekóva ko múndo ipoguýpe (Apocalipsis 17:10-​13).b Pe rrelihión japu oguapy hiʼári ha oñehaʼã ojapouka chupekuéra haʼe oipotáva.

Péro koʼẽrõitéma oikóta peteĩ mbaʼe avave ohaʼarõʼỹva. “Ha umi diez hatĩ, ha upe [mymba ñarõ] voi ndochaʼemoʼãi pe kuña reko vaíre; ombyaíta ichupe oheja peve opívo; hoʼúne pe hoʼo ha ohapýne ichupe tatápe” (Apocalipsis 17:16, JMP). Oñehaʼarõʼỹve jave, umi goviérno opuʼãta pe rrelihión japúre ha ohundietéta chupe. Mbaʼérepa ojapóta hikuái ko mbaʼe? Pe lívro Apocalipsis omombeʼu ñandéve: “[Ñandejára] omoĩ chupekuéra ipyʼápe ojapo hag̃ua pe haʼe oipotáva” (Apocalipsis 17:17). Upeichaite, Ñandejára ombohováita pe rrelihión japúpe hembiapo vaikuére. Ha omoĩta hustísia oiporúvo umi polítiko ohundi hag̃ua pe kuña reko vaípe.

Mbaʼépa rejapovaʼerã ani hag̃ua nderupyty pe oikótava rrelihión japúre? Ñandejára heʼi: ‘Pesẽ chugui, peẽ chembaʼéva’ (Apocalipsis 18:4). Upeichaite hína, koʼág̃a ñasẽvaʼerã rrelihión japúgui. Péro, mamo piko ikatu jaha? Ani jaha umi heʼíva Ñandejára ndaiporiha rapykuéri, haʼekuéra oñehundíta avei (2 Tesalonicenses 1:​6-9). Jaikove hag̃ua jahekavaʼerã pe rrelihión añetéva. Mbaʼéichapa ikatu jatopa?

Mbaʼéichapa jatopáta pe rrelihión añetéva

Mbaʼe iporãvapa ojekuaavaʼerã rrelihión añetévare? (Mateo 7: 17.)

Rrelihión añetéva...

◼ OHECHAUKA MBORAYHU. Umi oservíva Ñandejárape ‘ndojeheʼái ko múndore’, ndoikovaíri irrása térã ikostúmbre rehe, ‘ojoayhu’ katu hikuái (Juan 13:35; 17:16; Hechos 10:34, 35). Ojojukarangue, oĩ omano hag̃uáicha hapichakuéra rehehápe (1 Juan 3:​16).

◼ OJEROVIA ÑANDEJÁRA ÑEʼẼRE. Omboʼerangue yvypóra ‘omoĩvante ojejapo hag̃ua’, rrelihión añetéva omboʼe la Biblia heʼíva (Mateo 15:​6-9). Mbaʼérepa? ‘Ñandejára Ñeʼẽ niko henyhẽ ipuʼakágui, ha iporã ñamboʼe ha ñañemoñeʼẽ hag̃ua ñande rapichápe, japorohekomboʼe ha ñaporomoarandu hag̃ua hekopete’ (2 Timoteo 3:​16).

◼ OIPYTYVÕ OJEIKO PORÃ HAG̃UA OGAPÝPE HA OMOMBAʼE TEKO POTĨ. Rrelihión añetéva omboʼe menakuérape ‘ohayhu hag̃ua hembirekópe, haʼekuéra ojehayhuháicha ijupe voi’, oipytyvõ tembirekokuérape ‘omombaʼe hag̃ua iménape’, ha mitãnguéra iñeʼẽrendu hag̃ua ituvakuérape (Efesios 5:​28, 33; 6:1). Avei umi omoakãva heko potĩ vaʼerã (1 Timoteo 3:​1-​10).

Oĩpa peteĩ rrelihión ojapóva koʼã mbaʼe? Pe lívro hérava Holocaust Politics, osẽvaʼekue 2001-pe, heʼi: “Heta tapicha oikórire testigos de Jehová omboʼe ha oikoháicha, ndoikoivaʼerãmoʼã pe Holocausto [umi nazi ojukárõ guare hetaite hudíope Segunda Guerra Mundial aja], ha ko múndope ndaiporivaʼerãmoʼã jejuka guasu”.

Upéicha, testigos de Jehová oĩva 235 tetãme ndahaʼéi opredikánteva la Biblia heʼíva, oiko avei upépe heʼiháicha. Iporãiténepa rejeruréramo chupekuéra tanepytyvõ reikuaa hag̃ua mbaʼéichapa Ñandejára oipota ñamombaʼeguasu chupe. Koʼág̃a jajapovaʼerã ko mbaʼe. Aníke rehaʼarõ upearã. Koʼẽrõitéma oñehundíta rrelihión japu! (Sofonías 2:​2, 3.)

Reikuaasevéramo testigos de Jehová omboʼévagui, ikatu remyenyhẽ ko kupón ha remondo pe direksión oñemoĩvape.

□ Aipota pe folléto Peñatende porãke peikóvo!

□ Astudiase la Biblia che rógape

[Nóta]

[Komentário oĩva páhina 3-pe]

Rrelihión japu oreko ipoguýpe ‘mburuvicha guasu kuéra yvy arigua’

[Komentário oĩva páhina 3-pe]

‘Pesẽ chugui, peẽ chembaʼéva’