¿Mbaʼépa oikóta umi rrelihióngui?

1. ¿Iporãpa entéro umi rrelihión?

Entéro rrelihiónpe oĩ persóna ipyʼaporãva. Ñandejára ohecha koʼã héntepe ha ojepyʼapy hesekuéra, ha upéva peteĩ notísia iporãitereíva. Péro ñambyasýramo jepe heta mbaʼe ivaietereíva ojejapo pe rrelihión rérape (2 Corintios 4:3, 4; 11:13-15). Umi notísia omombeʼu oĩha rrelihión oapojáva pe terrorísmo, gérra, ha umi jejuka guasu. Heta líder rrelihióso otrata vai ha oviola umi mitãme. Koʼã mbaʼe omoñeñandu vaieterei umi hénte ipyʼaporãva ha ojeroviávape Ñandejárare.​—Elee Mateo 24:3-5, 11, 12.

Pe rrelihión verdadéra omombaʼeguasu Ñandejárape péro umi rrelihión japu nahániri, upévare haʼe ndoguerohorýi umíva. Haʼekuéra omboʼe umi mbaʼe noĩriva la Bíbliape, heʼi heta japu Ñandejáragui ha umi omanóvagui. Péro Jehová oipota umi hénte oikuaa mbaʼeichagua Dióspa haʼe.​—Elee Ezequiel 18:4 ha 1 Timoteo 2:3-5.

2. ¿Mbaʼépa oikóta umi rrelihióngui?

Ñandejárape nombotavýi umi rrelihión heʼíva ohayhuha chupe péro añetehápe ohayhu Satanás múndo (Santiago 4:4). La Biblia ohenói entéro umi rrelihión japúpe “Babilonia Guasu”. Babilonia haʼe vaʼekue peteĩ siuda yma guare ha upépe oñepyrũ vaʼekue umi rrelihión japu, péva oiko ou rire pe dilúvio Noé tiémpope. Koʼẽrõitéma Ñandejára ohundietéta umi rrelihión ombotavy ha otrata vaívape umi héntepe.​—Elee Apocalipsis 17:1, 2, 5, 16, 17 ha 18:8.

Oĩ hetave notísia iporãva. Jehová ndahesaráiri umi hénte ipyʼaporãvagui oĩva umi rrelihión japúpe. Ñandejára oipytyvõ koʼã héntepe oikuaa hag̃ua la verda ha oĩ hag̃ua unído.​—Elee Miqueas 4:2, 5.

3. ¿Mbaʼépa ojapo vaʼerã umi hénte ipyʼaporãva?

Jehová ojepyʼapy umi persóna oikuaasévare la verda ha ojaposéva iporãva. Haʼe heʼi chupekuéra osẽ vaʼerãha pe rrelihión japúgui. Umi hénte ohayhúva Ñandejárape ojapose umi kámbio haʼe oguerohory hag̃ua chupekuéra.​—Elee Apocalipsis 18:4.

Jesús omano rire, umi apóstol omombeʼu umi hénte ipyʼaporãvape umi notísia porã. Haʼekuéra vyʼápe oasepta. Jehová omboʼe chupekuéra mbaʼéichapa oiko vaʼerã, péicha ovyʼave, oreko esperánsa ha oikuaa mbaʼépa ojapo vaʼerã hekovépe. Haʼekuéra ohendu umi notísia porã ha omotenonde meme Jehovápe. Ojapóvo péicha omeʼẽ ñandéve peteĩ ehémplo iporãitereíva.​—Elee 1 Tesalonicenses 1:8, 9 ha 2:13.

Jehová orresivi vyʼápe umi persóna ohejávape umi rrelihión japu ha oikéva pe rrelihión verdadérape. Nde reaseptáramo Jehová invitasión, oikóta ndehegui iñamígo, umi ótro oadoráva Jehovápe haʼéta ne família, ha avei rerresivíta vída etérna.​—Elee Marcos 10:29, 30 ha 2 Corintios 6:17, 18.

4. ¿Mbaʼépa Ñandejára ojapóta ojeiko hag̃ua vyʼápe ko yvy tuichakuére?

Umi rrelihión japu koʼẽrõite oñehundíta, ha upéva peteĩ notísia iporãitereíva. Avave ndosufrimoʼãvéima umi rrelihión japu káusare. Koʼã rrelihión ndoikomoʼãvéima ombotavy ni osepara umi héntepe. Entéro hénte oikóta peteĩ ñeʼẽme ha oadoráta pe Dios verdadérope añoite.​—Elee Apocalipsis 18:20, 21 ha 21:3, 4.