KAPÍTULO 4

Mbaʼére piko papa ha mama ojopoi?

“Chemanduʼa papa orerejárõ guare. Upérõ 6 áñonte areko, aimékuri ógape ha nantendéi la oikóva. Aguapy pe písope ahecha téle ha ahendu mama hasẽ ha ojerure asy papápe anínte hag̃ua orereja. Haʼe ou che rendápe ivolsón rehevéma, oja pe aĩháme, cheretũ ha heʼi chéve: ‘Rohayhu che rajy’. Upéi osẽ oho. Heta tiémpo rire rojuecha jey. Upe guive apyta akyhyjeterei mama cherejárõ g̃uarã avei.” (Elena, 19 áño)

HETA mitãrusu opyta yvýre ituvakuéra ojopoíramo ha haʼete voi ku ndaikatumoʼãvéimava opuʼã jey. Opyta otĩ, ojahoʼi chupe vyʼaʼỹ, oñembyasyháre oiko, opensa ikáusare ituvakuéra ojedivorsia hague, sapyʼánte okyhyje ojehejárõ g̃uarã chupe haʼeño, ipochy ha ikatu voi oñevengase.

Oiméramo ndaʼareiete nde tuvakuéra ojopoi, katuete rembyasyetereíne avei. Upéva ningo ndaivaíri, péichante voi reñeñandúta. Ñande Apohare oipotavaʼekue voi sy ha túva oĩ oñondive omongakuaa hag̃ua ifamíliape (Efesios 6:1-3). Ha oiméne ijetuʼu nendive rehayhúgui mokõivévape péro koʼág̃a peteĩva ndoikovéima penendive. Pór ehémplo Daniel tuvakuéra ojueja haʼe orekópe 7 áño, ha omombeʼu: “Chéngo amombaʼetereivaʼekue che túvape ha apytasékuri hendive, péro ipahápe ropyta mama kárgope”.

Mbaʼérepa ojueja jepi hikuái

Heta túva ndohechaukái iprovlemaha oñondive upévare ifamília opyta vaieterei ojopoíramo. Péicha oikovaʼekue Raquel rehe, orekórõ guare 15 áño ituvakuéra ojedivorsia, haʼe omombeʼu: “Ni ndaroviaséi la oikóva. Chéngo aimoʼãkuri haʼekuéra ojoayhueterei”. Umi mitãrusu ha mitãkuña ohendu meméva ituvakuérape ojodiskutiha, opyta vaietereínte avei ojuejáramo hikuái.

Oĩ ojopoíva iména térã hembireko omoakãratĩgui chupe. Upéicha jave Ñandejára heʼi pe ndahekokyʼáiva ikatuha ojedivorsia ha omenda jey (Mateo 19:9). Oĩ katu ojepokuaáva ‘osapukái, iñeʼẽ guasu’ ha ipochy vaieterei. Upévare peteĩva odesidi ojueja, okyhyjégui ojejahéirõ g̃uarã hese ha ifamíliare (Efesios 4:31).

Oĩ avei umi ojopoíva oimeraẽ mbaʼére, oñehaʼã rangue osolusiona iprovléma heʼíntema hikuái ndojoayhuveimaha yma guaréicha. Péro la Biblia ohechauka Ñandejára ndoguerohoryiha umi péicha ojapóvape (Malaquías 2:16). Avei Jesús heʼivaʼekue umi omendáva ikatuha ohasa asy peteĩvante oservíramo Ñandejárape (Mateo 10:34-36).

Péro nde tuvakuéra noñeʼẽiramo nendive térã nomombeʼuséiramo ndéve mbaʼérepa ojueja, upéva ndeʼiséi nanderayhuveimaha. Haʼekuéra oiméne ombyasyeterei avei upe oikóva ha ni naimanduʼaséi hese (Proverbios 24:10). Ikatu avei otĩ ohechakuaágui ojavy hague hikuái.

Mbaʼépa ikatu rejapo

Rehechavaʼerã mbaʼéguipa rekyhyje. Nde tuvakuéra ojopoi rire ndahaʼevéima yma guaréicha ha upévare oiméne hetave mbaʼérema rejepyʼapy. Péro ndahasyivéta ndéve regueropuʼaka hag̃ua reñehaʼãramo rehecha mbaʼépa nemongyhyje. Emarka (✔) umi mbaʼe ndepyʼapyvéva.

□ Mokõivéva cherejárõ g̃uarã.

□ Ndorohupytýiramo g̃uarã ore remikotevẽ.

□ Oimérire che káusare ojopoi hikuái.

□ Amenda sapyʼárõ, ha asẽ vai avei.

□ Ambue mbaʼe ․․․․․

Emombeʼu reñandúva. Rréi Salomón heʼivaʼekue oĩha “ára oñeñeʼẽ hag̃ua” (Eclesiastés 3:7). Upévare rehechavaʼerã arakaʼépa opyta porãvéta reñemongeta hag̃ua nde tuvakuérandi umi mbaʼe ndepyʼapývare. Emombeʼu chupekuéra reñeñandu vaieterei ha ndereikuaaiha mbaʼépa rejapóta. Upéicharõ ikatu heʼi ndéve mbaʼépa añetehápe oiko ha ndepyʼaguapyvéma upéi. Péro ñamoĩ chupe noñeʼẽseiha upe jave, mbaʼépa rejapokuaa? Ikatu reñeʼẽ peteĩ ne amígo iñakãguapýva ha rejeroviávandi ha remombeʼu chupe upe rehasáva. Tuicha ningo ñanembopyʼaguapy oĩramo ñanerendúva (Proverbios 17:17).

Anikena nderesarái nde Ru yvagapegua ‘ohenduha maymáva ñemboʼe’ (Salmo 65:3; 65:2, NM). Haʼe nderayhueterei, upévare nderekyhyjeivaʼerã remombeʼu hag̃ua chupe opa mbaʼe ndepyʼapýva (1 Pedro 5:7).

Mbaʼépa ndovaléi rejapo

Ani ndepyʼaro. Daniel heʼivaʼekue: “Che tuvakuéra ijehénte opensavaʼekue ojopoítarõ guare, oimoʼã piko ndojapovaimoʼãiha mbaʼe orerehe?”. Ndaivaíri ningo haʼe oñeñandu lája ha ikatu voi añete upe heʼíva. Péro iporãta piko osegínteramo ipyʼaro? Epensamína mbaʼéichapa ikatu rembohovái koʼã porandu ha ehai iguýpe.

Mbaʼérepa ojapo vaíta Daniel rehe osegínteramo ipochy ha ipyʼaro? (Elee Proverbios 29:22.) ․․․․․

Mbaʼérepa iporãvéta operdonáramo ituvakuérape ijetuʼúramo jepe chupe? (Elee Efesios 4:31, 32.) ․․․․․

Mbaʼéichapa Romanos 3:23 ikatu oipytyvõ Daniélpe ontendeve hag̃ua ituvakuérape? ․․․․․

Ani rejeporta vai rejapo hag̃ua hesekuéra. David heʼi: “Che tuvakuéra ojedivorsia rire añembyasyhárente voi aiko ha aju ndavyʼavéi. Upe rire añepyrũ cheprovléma heta eskuélape ha aperde un áño. Añepyrũ añembopajáso klásepe ha aiko vaíma katu enterovéndi.”

Mbaʼépa oiméne oipotáraʼe David ajeve oñepyrũ oñembopajáso eskuélape? ․․․․․

Mbaʼérepa oiméne oiko vai opavavéndi? ․․․․․

Oñantoháramo ndéve rejeporta vai rejapo hag̃ua nde tuvakuérare, mbaʼéichapa ikatu nepytyvõ Gálatas 6:7 heʼíva? ․․․․․

Mbaʼépa ikatu oiko upe rire

Repẽramo nde jyvápe ohasáta heta tiémpo rekuera porã hag̃ua. Péicha avei nde tuvakuéra ojedivorsiáramo, hasýta ndéve ha tiémpo rire ae reñeñandu porãvéta. Oĩ sikólogo heʼíva 3 áño rire ojehasavetamaha ndehegui. Koʼág̃a ikatu repensa ipukumaha upéva, péro oĩ gueteri heta mbaʼe remohendavaʼerã nde rogapýpe.

Koʼág̃a ningo heta mbaʼe okambiáta nde rógape ha nde tuvakuéra oikotevẽ avei tiémpo oñeñandu porãve hag̃ua, péichamante nepytyvõkuaáta hikuái. Ha oñemohenda porãvévo ohóvo entéro mbaʼe, tuicha ndepyʼaguapyvéta.

RETOPAVÉTA INFORMASIÓN VOLÚMEN 2, KAPÍTULO 25-PE

TÉYSTO OĨVA LA BÍBLIAPE

‘Oĩ tiémpo okuera hag̃ua opa mbaʼe.’ (Eclesiastés 3:1, 3)

PETEĨ KONSÉHO

Umi omendáva ojedivorsia peteĩ térã mokõivéva voi ojavy haguére. Eñehaʼã ehecha mbaʼérepa ojopoi hikuái ani hag̃ua oiko nderehe upéicha ág̃a remenda vove (Proverbios 27:12).

REIKUAÁPARAʼE?

Nde tuvakuéra ojopoíramo ndeʼiséi resẽ vaitaha avei remenda vove.

UMI MBAʼE AJAPÓTAVA!

Añemongetáta umi mbaʼe chepyʼapývare peteĩ che amígo ajeroviáva ha iñakãguapývandi (ehai héra): ․․․․․

Ajeporta vaiséramo ajapo hag̃ua che tuvakuérare, mbaʼépa ajapóta ajejoko hag̃ua? ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼéicha rupípa oiméne nde tuvakuéra nomombeʼuséi ndéve mbaʼérepa ojopoi?

● Mbaʼérepa iporã nemanduʼa nde tuvakuéra ndojopoíri hague nde káusare?

[Komentário oĩva páhina 32-pe]

“Che sy orereja rire cherasẽháre aiko. Upéicharamo jepe pyʼỹi añemboʼe ha añehaʼã aipytyvõ che rapichakuérape. Avei ajeheʼa umi che amigokuéra iñakãguapývare. Chéverõ g̃uarã upéicha Jehová chepytyvõ agueropuʼaka hag̃ua umi mbaʼe ahasavaʼekue”. (Natalia)

[Taʼanga oĩva páhina 33-pe]

Nde sy ha nde túva ojedivorsiárõ haʼete repẽva nde jyvápe, hasýta ndéve ha tiémpo rirémante rekueráta