LEKSIÓN 6
¿Mbaʼe esperánsapa oĩ umi omano vaʼekuépe g̃uarã?
1. ¿Oikove jeýnepa umi omano vaʼekue?
Jesucristo og̃uahẽrõ guare Betániape, oĩva Jerusalén ypýpe, ojapóma kuri 4 día iñamígo Lázaro omano hague. Upémarõ Jesús oho Marta ha María ndive pe sepultúrape. Koʼã kuña ningo Lázaro ermanakuéra. Sapyʼaitépe heta hénte ijaty upépe. Epensamína mbaʼeichaitépa oiméne Marta ha María ovyʼa Jesús omoingove jeýrõ guare Lázarope.—Elee Juan 11:21-24, 38-44.
Marta ningo oikuaáma vaʼekue pe notísia porã ohechaukáva Jehová omoingove jeytaha umi omano vaʼekuépe oiko hag̃ua ko yvy ape ári.—Elee Job 14:14, 15.
2. ¿Mbaʼépa oiko umi omano vaʼekuégui?
Ñandejára heʼi Adánpe: “Ndéngo yvýguinte voi rejejapo vaʼekue ha yvy jey oikóta ndehegui” (GÉNESIS 3:19).
Ñandejára ningo ñandeapo vaʼekue yvýgui (Génesis 2:7; 3:19). Ñande ndajarekói ñande pype peteĩ álma ohóva ótro ládo ñamano rire. Ñamanóvo, omano avei ñande serévro, upéicha rupi opaite avei ñane pensamiénto ha umi mbaʼe ñañandúva. Upévare Lázaro oikove jey rire, nomombeʼúi vaʼekue mbaʼépa oiko chugui pórke omanórõ guare haʼe noñanduvéi kuri mbaʼevete.—Elee Salmo 146:4 ha Eclesiastés 9:5, 6, 10.
¿Okastigápa Ñandejára umi héntepe peteĩ infiérnope omano rire? La Biblia omboʼe umi omanóva noñanduveimaha mbaʼeve, upévare ijapu umi omboʼéva jahataha pe infiérnope jasufri hag̃ua, ha upe enseñánsa káusare heta heʼi Ñandejára ipyʼahatãha. Añetehápe Ñandejárape ombojeguaru upe enseñánsa.—Elee Jeremías 7:31.
Ehecha pe vidéo ¿Mbaʼépa oiko umi omano vaʼekuégui?
3. ¿Ikatu piko umi omanóva oñeʼẽ ñandéve?
Umi omanóva ndaikatúi oñeʼẽ ni ohendu (Salmo 115:17). Péro umi demónio iñañaiterei ha haʼekuéra ikatu ohaʼanga umi omano vaʼekuépe ha oñeʼẽ umi héntepe (2 Pedro 2:4). Upévare Jehová ndoipotaiete ni ñatantea ñañeʼẽ umi omano vaʼekuéndi.—Elee Deuteronomio 18:10, 11.
4. ¿Mávapa oikove jeýta?
Hetaiterei persóna oĩva pe sepultúrape opuʼãta oikove jey hag̃ua ko yvy ape ári. Oĩ algúno hembiapo vai ha omano vaʼekue oikuaaʼỹre Ñandejárape, haʼekuéra jepe oikove jeýta.—Elee Lucas 23:43 ha Hechos 24:15.
Umi orresusitáva ikatúta oaprende pe añetegua oúva Ñandejáragui ha ohechauka ojeroviaha Jesús rehe (Apocalipsis 20:11-13). Umi oñemoingove jeýva ha ojapóva iporãva ikatúta oiko pára siémpre ko yvy ape ári.—Elee Juan 5:28, 29.
5. ¿Mbaʼépa ñanemboʼe Jehovágui pe rresurreksión?
Ñandejára ningo ombou Itaʼýrape omano hag̃ua ñanderehehápe, upéicha rupi umi omanóva ikatu oikove jey. Ko mbaʼe ohechauka ñandéve mbaʼeichaitépa Jehová oporohayhu ha imbaʼeporã enterovévandi. ¿Mávapepa nde rehechase jey oiko vove pe rresurreksión?—Elee Juan 3:16 ha Romanos 6:23.