¿Mbaʼéichapa ikatu ovyʼa umi família?

1. ¿Mbaʼérepa tekotevẽ omenda umi oikóva oñondive ovyʼa hag̃ua?

Umi notísia porã ou Jehovágui, haʼe hína Ñandejára ovyʼáva, ha oipota umi família ovyʼa avei (1 Timoteo 1:11). Haʼe omoñepyrũ vaʼekue pe matrimónio. Ha umi família omendárõ pe léi heʼiháicha ovyʼave, pórke pe kuña ha pe kuimbaʼe ojeroviave ojuehe ha péicha omongakuaa porã umi mitãme. Kristianokuéra orrespeta vaʼerã umi léi oĩva ipaíspe olegalisa hag̃ua imatrimónio.​—Elee Lucas 2:1, 4, 5.

¿Mbaʼéichapa Ñandejára ohecha pe matrimónio? Haʼe oipota umi omendáva opyta oñondive oikove aja. Jehová oipota ifiél hikuái ojupe ha ndoipotái oñomoakãratĩ (Hebreos 13:4). Haʼe ndochaʼéi pe divórsiore (Malaquías 2:16). Péro opermiti umi kristiáno ojedivorsia ha omenda jey iména térã hembireko omoakãratĩrõ chupe.​—Elee Mateo 19:3-6, 9.

2. ¿Mbaʼéichapa ojotrata vaʼerã ména ha tembireko?

Jehová ojapo vaʼekue kuimbaʼe ha kuñáme oñopytyvõ hag̃ua (Génesis 2:18). Pe ména ningo omoakã pe família, upévare haʼe hína pe orekóva pe rresponsavilida tuichavéva omoĩ hag̃ua ifamíliape oikotevẽva ha omboʼe hag̃ua chupekuéra Ñandejára heʼíva. Haʼe ohayhu vaʼerã hembirekópe ha nopensái vaʼerã ijehénte. Ména ha tembireko ojoayhu ha ojorrespeta vaʼerã. Mokõivévante iñimperfékto ha ojavy, upévare tekotevẽ oñoperdonakuaa, upéva iñimportanteterei ovyʼa hag̃ua oñondive.​—Elee Efesios 4:31, 32; 5:22-25, 33 ha 1 Pedro 3:7.

3. Nderevyʼáirõ ne matrimóniope, ¿iporãpa pejopoíntema?

Oiméramo peneprovléma hína oñondive, mokõivéva peñehaʼã vaʼerã pejotrata mborayhúpe (1 Corintios 13:4, 5). Pe matrimóniope oĩnte voi provléma, péro Ñandejára Ñeʼẽ ndeʼíri iporãha umi omendáva ojopoíntema péicha jave.​—Elee 1 Corintios 7:10-13.

4. Mitãnguéra, ¿mbaʼépa oipota Ñandejára peẽme g̃uarã?

Jehová oipota peẽ pevyʼa. Haʼe omeʼẽ peẽme umi konsého iporãvéva pevyʼa hag̃ua penemitã aja. Haʼe oipota avei pehendu pende tuakuérape pórke haʼekuéra iñarandu ha iñexperiensiave (Colosenses 3:20). Jehová oipota avei pedisfruta pejapóvo ivolunta ha pesegívo Itaʼýra ehémplo.​—Elee Eclesiastés 11:9–12:1; Mateo 19:13-15 ha 21:15, 16.

5. Tuakuéra, ¿mbaʼépa oikotevẽ pene familiakuéra ovyʼa hag̃ua?

Peẽ pembaʼapo jejopy vaʼerã pemoĩ hag̃ua pene famíliape hembiʼurã, ijaorã ha peteĩ lugár oiko hag̃ua (1 Timoteo 5:8). Péro pene família ovyʼa hag̃ua peipytyvõ vaʼerã chupekuéra ohayhu hag̃ua Ñandejárape ha oaprende hag̃ua chugui (Efesios 6:4). Haʼekuéra ohechárõ peẽ pehayhuha Ñandejárape, upéva ikatu opoko hesekuéra. Pejegiárõ la Bíbliare pemboʼe hag̃ua pene famíliape tuichaiterei peipytyvõta chupekuéra.​—Elee Deuteronomio 6:4-7 ha Proverbios 22:6.

Peguerohory ha pemokyreʼỹ vaʼerã pene famíliape, upéva ojapo porã hesekuéra. Umi mitã oikotevẽ avei ojekorrehi ha oñedisiplina chupekuéra. Upéva oipytyvõta pene famíliape omboyke hag̃ua umi mbaʼe ikatúva operhudika ha ombosufri chupekuéra (Proverbios 22:15). Péro pekorrehi jave pene famíliape ni mbaʼevéicharõ ndovaléi petrata vai térã pejahéi hesekuéra.​—Elee Colosenses 3:21.

Umi testígo de Jehová ojapo heta lívro tuakuéra ha mitãnguérape g̃uarã. Koʼã lívrope oĩ umi konsého oĩva la Bíbliape.​—Elee Salmo 19:7, 11.