LA BIBLIA OMBOHOVÁI KOʼÃ PORANDU

¿Mbaʼéichapa umi omendáva ikatu ovyʼa hogapýpe?

La Biblia ikatu oipytyvõ umi omendávape ovyʼa hag̃ua. Ipype jatopa umi konsého oúva Ñandejáragui, ha haʼe ningo omoñepyrũ vaʼekue pe ñemenda. Avei heʼi umi omendávape mbaʼépa ojapo vaʼerã ojogueraha porã hag̃ua, ha mbaʼépa tekotevẽ omboyke pono ombyai hogapy. Ohechauka avei iñimportanteha akóinte oñemongeta oñondive ovyʼa hag̃ua. (Elee Colosenses 3:8-10, 12-14.)

Ména ha tembireko ojorrespeta vaʼerã. Káda uno ojapóramo Ñandejára ojeruréva katuete ovyʼáta hikuái. (Elee Colosenses 3:18, 19.)

¿Mbaʼépa oipytyvõta chupekuéra pono ojopoi?

Umi omendáva ndojopoimoʼãi ojoayhúramo. Ñanderayhúgui Ñandejára ha Itaʼýra ojapo heta mbaʼe ñanderehehápe. Péicha ohechauka mbaʼépa jajapo vaʼerã japorohayhúrõ. (1 Juan 4:7, 8, 19.)

Ména ha tembireko omombaʼérõ pe ñemenda ndojopoimoʼãi. Ñandejára oipota opyta oñondive opa árare, péicha oñangareko porãta ojuehe ha ifamíliare. Upévare ojapo vaʼekue kuimbaʼe ha kuñáme oñopytyvõ hag̃uáicha ha omeʼẽ hag̃ua ojupe oikotevẽva. Ojapo chupekuéra ijoguaháramo, upévare ikatu ojoayhu hikuái. (Génesis 1:27 ha 2:18, 24.)