Jesús omboʼevaʼekue

Rrelihión añeteguáva

Oguerohorýpa Ñandejára opaichagua rrelihión?

▪ Jesús ombyasyeterei mbaʼéichapa umi rrelihión omoakãva ombotavy la héntepe. Upévare heʼi hemimboʼekuérape: ‘Peñeñangarekóke umi proféta guaʼúgui, oúva penerendápe ovecháicha, ipyʼapýpe katu lóvo pochýicha’ (Mateo 7:15). Opárupi ojekuaa rrelihión rérape ojejapomaha heta mbaʼe vai.

Peteĩ jey Jesús oñemboʼe jave Ñandejárape heʼi: “Ne ñeʼẽ niko añetegua” (Juan 17:17, JMP). Upéicharõ, Ñandejára ndoguerohorýi ni peteĩ rrelihión ndojapóiva la Biblia heʼíva. Upévare Jesús heʼi umi rrelihión omoakãva rovamokõime ko Ñandejára heʼíva: ‘Chemombaʼeguasu rei ningo peẽ, pemboʼévo yvypóra rembipotánte’ (Mateo 15:9, ÑÑB).

Oĩpa peteĩ rrelihión añeteguáva?

▪ Jesús oñemongeta jave peteĩ kuña Samariayguándi, heʼi chupe: ‘Peẽ niko pemombaʼeguasu peteĩ peikuaaʼỹvape’. Jesús ohechakuaa umi Samariayguápe ombotavyha irrelihión. Upévare heʼi chupe: ‘Umi omombaʼeguasu añetéva Ñandejárape, omombaʼeguasu espíritu ha añetegua reheve. Ñandejára niko oipota upéicha oñemombaʼeguasu chupe’ (Juan 4:22, 23, BNP). Péicha oĩramo omombaʼeguasu añetéva Ñandejárape oĩmantevaʼerã avei peteĩ rrelihión añeteguáva.

Upe rrelihión haʼe pe Jesús omboʼevaʼekue. Haʼe voi heʼi: ‘Che ndajapói mbaʼeve chejeheguínte, che Ru chemboʼévante amombeʼu peẽme’ (Juan 8:28). Upévare heʼi: “Che hína upe tape, upe añete ha upe tekovete. Che rupímante ikatu oñeg̃uahẽ che Ru rendápe” (Juan 14:6). Upéicharõ, peteĩ tapénte oĩramo ñandegueraháva ñande Ru Jehovápe, peteĩ rrelihión añeteguávamante oĩvaʼerã avei.

Mbaʼéichapa ikatu jaikuaa mávapa pe rrelihión añeteguáva?

▪ Umi kristiáno añetéva osegi Jesús ehémplo cuatro mbaʼépe.

1. Jesucristo heʼi Jehovápe: ‘Aikuaauka chupekuéra nde réra ha mávapa nde’ (Juan 17:26). Umi kristiáno añetéva oiporu avei Ñandejára réra.

2. Jesús oñeʼẽ la héntepe Ñandejára Rréinore ha heʼi hemimboʼekuérape omombeʼu hag̃ua upe marandu ogaha rupi. Haʼe heʼi voi chupekuéra: ‘Peg̃uahẽvo peteĩ távape térã oimeraẽ ojeikohápe, peheka umi ipyʼaporãvape’. Ha tiémpo rire heʼive: ‘Tapeho aipóramo opa tetã rupi ha pejapo chuguikuéra che remimboʼe’ (Mateo 10:7, 11; 28:19). Koʼág̃a opárupi ojekuaa avei umi kristiáno añetévape osegígui ojapo upéva.

3. Jesús arakaʼeve ndoikeivaʼekue polítikape ha hemimboʼekuéra avei upéicha. Haʼe heʼi voi: ‘Haʼekuéra ndahaʼéi ko mundopegua, che ndahaʼeiháicha ko mundopegua’ (Juan 17:14). Upéicharõ, umi kristiáno añetéva ndoikeivaʼerã polítikape.

4. Jesús ningo ohayhúgui la héntepe ojesakrifikavaʼekue hesehapekuéra. Ha umi hemimboʼépe heʼi: “Peẽ pejoayhúramo opavave ohechakuaáta peẽ haʼeha che remimboʼe” (Juan 13:35). Upéicharõ, umi kristiáno añetéva ojoayhu ha ndohói gerrahápe.

Mbaʼéichapa oipytyvõ la héntepe pe rrelihión añeteguáva?

▪ Jasegi hag̃ua rrelihión añeteguáva, jaikuaa porã raẽ vaʼerã Ñandejárape. Upéva oipytyvõta la héntepe oiko porãve hag̃ua ha ohayhuve hag̃ua Jehovápe. Ha Haʼe opromete jeikove opaveʼỹva umi ohayhúvape chupe. Upévare voi Jesús heʼi: “Upe jeikove opaʼỹva niko kóva: Tandekuaa ndéve Ñandejára añetetéva, ha Jesucrístope, upe nde rembouvaʼekuépe” (Juan 17:3).

Retopavéta informasión ko lívro kapítulo 15-pe, Mbaʼépa añetehápe omboʼe la Biblia? oguenohẽva testigos de Jehová.

[Nóta oĩva taʼanga ndive páhina 22]

‘Peñeñangarekóke umi proféta guaʼúgui, oúva penerendápe ovecháicha, ipyʼapýpe katu lóvo pochýicha.’ (Mateo 7:15)