Pehendúkena Ñandejárape peiko hag̃ua vyʼápe oñondive

Ñandejára Jehováa omomenda vaʼekue pe primera paréhape. La Biblia omombeʼu haʼe ojapo hague pe kuña ypykuépe “ha ogueru Adán rendápe”. Ha Adán ohechávo chupe ovyʼaiterei, ha heʼi: “Kóva ningo ojejapo che kangue ha che roʼógui” (Génesis 2:22, 23, ÑÑB). Jehová ningo koʼag̃aite peve oipota umi omendáva oiko vyʼápe oñondive.

Peteĩ kuimbaʼe ha peteĩ kuña omenda jave, opensa voi naiprovlemamoʼãiha hikuái. Péro añetehápe umi ojoayhuvéva jepe ojoavy mimi (1 Corintios 7:28). Ko follétope oĩ heta konsého vívliko, ha resegíramo umíva, katuete revyʼáta ne matrimóniope ha pejogueraha porãta pende rogapýpe (Salmo 19:8-11).

1. KÁDA UNO PEJAPO VAʼERÃ JEHOVÁ HEʼÍVA

MBAʼÉPA HEʼI LA BIBLIA: Ména omoakã vaʼerã hogapy (Efesios 5:23).

Ména, Jehová oipota reñangareko porã ne rembirekóre (1 Pedro 3:7). Haʼe ojapo vaʼekue chupe nepytyvõ hag̃ua, ha oipota rehayhu, remombaʼe ha retrata porã chupe (Génesis 2:18). Rehayhu vaʼerã ne rembirekópe nde pyʼaite guive ha remotenonde vaʼerã umi mbaʼe ogustáva chupe térã oikotevẽva (Efesios 5:25-29).

Tembireko, Jehová oipota rerrespeta ne ménape nde pyʼaite guive ha reipytyvõ chupe okumpli porã hag̃ua umi mbaʼe oñehaʼarõva chugui (1 Corintios 11:3; Efesios 5:33). Eapoja chupe umi mbaʼe odesidívape ha eñemoĩ ipoguýpe (Colosenses 3:18). Rejapóramo koʼã mbaʼe, ne ména ha Jehová ndeguerohoryetereíta (1 Pedro 3:1-6).

EJAPOMÍNA KO MBAʼE:

• Eporandu ne rembiayhúpe mbaʼépepa ikatu remehorave. Ehendu porãnte chupe ha eñehaʼãmbaite ejapo heʼíva ndéve

• Nepasiénsia vaʼerã. Peikotevẽtante voi tiémpo pejokuaa porã hag̃ua ha peikuaa hag̃ua mbaʼéichapa peñombojeroviáta

2. EHECHAUKA NE REMBIAYHÚPE REMOMBAʼEHA CHUPE

MBAʼÉPA HEʼI LA BIBLIA: Iñimportanteterei ehechauka ne rembiayhúpe rejepyʼapyha hese (Filipenses 2:3, 4). Avei retrata porã vaʼerã chupe. Nemanduʼákena Jehová voi omandaha isiervokuérape siémpre imbaʼeporã hag̃ua enterovéndi (2 Timoteo 2:24). Repensa porã vaʼerã mbaʼéichapa reñeʼẽta, la Biblia heʼi voi: “Oñeʼẽmba reíva oporokutu kysepeguáicha, ha iñarandúva oporomonguera pohãmeguáicha” (Proverbios 12:18). Jehová espíritu katuete nepytyvõta reñeʼẽ hag̃ua mborayhúpe ha pyʼaporãme (Gálatas 5:22, 23; Colosenses 4:6).

EJAPOMÍNA KO MBAʼE:

• Reñeʼẽta jave ne ména térã ne rembirekóndi peteĩ téma iñimportántevare, ejerure Jehovápe tanepytyvõ reñeʼẽ hag̃ua pyʼaguapýpe porãnte ha ani hag̃ua reñemohatã nde repensávapente

• Repensa porã vaʼerã mbaʼépa eréta ha mbaʼéichapa

3. NEMANDUʼÁKENA MOKÕIVÉGUI OIKOHA PETEĨNTEMA

MBAʼÉPA HEʼI LA BIBLIA: Umi kuimbaʼe ha kuña omenda vove, mokõivégui oiko “peteĩntema” (Mateo 19:5). Péro upéva ndeʼiséi opa mbaʼépe opensataha hikuái peteĩcha, katuete idiferenteʼimíta ojuehegui. Upévare, nde ha ne rembiayhu peñehaʼãmbaite vaʼerã peiko hag̃ua peteĩ ñeʼẽme ha peñontendeve hag̃ua (Filipenses 2:2). Ha oimeraẽ mbaʼe pedesidítava, pedesidi vaʼerã oñondive. ¿Mbaʼéichapa ikatu pejapo upéva? La Biblia heʼi: “[Opa] mbaʼe osẽ porãve ñemongeta ha ñemoñeʼẽme” (Proverbios 20:18). Pesegi vaʼerã umi konsého oĩva la Bíbliape pedesidíta jave oñondive umi mbaʼe iñimportánteva (Proverbios 8:32, 33).

EJAPOMÍNA KO MBAʼE:

• Emombeʼu ne ména térã ne rembirekópe umi mbaʼe reñandúva, ani peñeʼẽ ótra kósarente

• Repromete mboyve rejapotaha peteĩ mbaʼe, reporandu raẽ vaʼerã ne rembiayhúpe mbaʼépa haʼe heʼi