Ehechauka ikatuha oñekonfia nderehe

Jehová oipota jaiko “hekoitépe” (Salmo 15:2, ÑÑB). Ko mbaʼe ningo iñimportanteterei, pórke umi omendáva ndoikóiramo hekópe, ndaikatumoʼãi okonfia ojuehe. Ha umi omendáva okonfiáramo añoite ojuehe, ikatúta ára ha ára ojoayhuve.

Koʼã tiémpope ningo ijetuʼueterei umi omendávape oiko hag̃ua hekoitépe. Upévare, reprotehe hag̃ua ne matrimónio rejapo vaʼerã mokõi mbaʼe iñimportánteva.

1. REMOTENONDE VAʼERÃ NE MATRIMÓNIO

MBAʼÉPA HEʼI LA BIBLIA: “Pehechakuaa [vaʼerã] umi mbaʼe iñimportantevéva” (Filipenses 1:10). Ne matrimónio ningo iñimportanteterei, upévare remombaʼe vaʼerã ha ani rembotapykue.

Jehová oipota remaña ne rembiayhúrente, ha peiko vyʼápe oñondive (Eclesiastés 9:9). Haʼe ohechauka porã voi pejepyʼapy vaʼerãha ojuehe ha pehecha mbaʼépa ikatu pejapo pevyʼave hag̃ua (1 Corintios 10:24). Ehechaukákena ne rembiayhúpe ndaikatuiha voi reiko heseʼỹ ha remombaʼetereiha chupe.

EJAPOMÍNA KO MBAʼE:

• Eñemotiémpo ne rembiayhúpe g̃uarã ha ehechauka chupe mbaʼéichapa haʼe iñimportánte ndéve g̃uarã

• Emotenonde ne rembiayhúpe ha ani repensa ndejehénte

2. REÑATENDE VAʼERÃ NDE PYʼAPÝRE

MBAʼÉPA HEʼI LA BIBLIA: “Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína” (Mateo 5:28). Upéicharõ, umi opensáva jepe mbaʼe tieʼỹre jaʼekuaa otraisionamaha hína hembiayhúpe.

Jehová heʼi porã tekotevẽha reñangareko nde pyʼapýre (Proverbios 4:23; Jeremías 17:9). Upearã reñatende vaʼerã mbaʼépa rehecha hína reikóvo (Mateo 5:29, 30). Resegi vaʼerã Job ehémplo, haʼe ningo oñemoĩ vaʼekue peteĩ ñeʼẽme hesakuéra ndive ani hag̃ua omaña peteĩ kuñáre oĩse hag̃uáicha hendive (Job 31:1). Aníkena ehecha pornografía. Ha ni mbaʼevéicharõ nderejegustái vaʼerã peteĩ persóna ndahaʼéivare ne ména térã ne rembireko.

EJAPOMÍNA KO MBAʼE:

• Ehechauka enterovépe remombaʼe ha rerrespetaha ne rembiayhúpe

• Eñatende ani hag̃ua remoñeñandu vai ne rembiayhúpe retrata lájare ótrope, ha oimérõ rejapo hína, pyaʼe rekambia vaʼerã