Jesús ogueru pe paraíso ha omohuʼã hembiapo

Jesús ojevautisa riremínte, ombohovái kuri peteĩ enemígo oñehaʼãmbaitévape ohapejoko chupe oñepyrũ mboyve voi hembiapo ko yvy ape ári. Añetehápe Satanás heta vése oipyʼaraʼã Jesúspe. Péro upéi Jesús heʼi hese: “Oúma [...] pe múndo ruvicha. Haʼe ndaipuʼakái cherehe” (Juan 14:30).

Apóstol Juan ohecha vaʼekue peteĩ visiónpe mbaʼépa oikóta “pe dragón [guasúgui], haʼéva pe mbói ypykue oñehenóiva Diablo ha Satanás”. Ko enemígo iñañaitéva oñemoĩva yvyporakuéra kóntrape, oñemosẽ yvágagui ha “orrenegaiterei hína oikuaágui mbykypaitemaha itiémpo” (Apocalipsis 12:9, 12). Enterove Cristo segidorkuéra oikuaa ñaimeha upe tiémpo ‘mbykypaitévape’. Koʼẽrõitéma ‘pe dragón guasu, haʼéva pe mbói ypykue’, ojeitýta peteĩ yvykua pypukúpe ha ndaikatumoʼãvéima ojapo mbaʼevete 1.000 áñore. Ha upe aja Jesús ogovernáta Ñandejára Rréinope (Apocalipsis 20:1, 2).

¿Mbaʼépa oikóta upe aja ko yvy ape ári? ¿Mávapa oikóta koʼápe, ha mbaʼe situasiónpa oĩta? Jesús voi omyesakã mbaʼépa oikóta. Omombeʼúrõ guare pe ehémplo oñeʼẽva umi ovecha ha kavaráre, ohechauka mbaʼépa ohupytýta umi persóna hekojojáva oñekomparáva ovecháre, ha oipytyvõ meméva Jesús ermanokuérape. Avei omombeʼu vaʼekue mbaʼépa ohaʼarõ umi oñekomparávape kavaráre, ha ndojapóiva umi ovecha ojapóva. Jesús heʼi: “Koʼãva [umi kavara] oñehundíta opa ára g̃uarã, péro umi hekojojáva [umi ovecha] oikovéta opa ára g̃uarã” (Mateo 25:46).

Jesús omyesakã rupi koʼã mbaʼe, ñande ikatu ñantende pe promésa haʼe ojapo vaʼekue pe mondahápe, oĩ vaʼekue ijykére pe yvyráre. Jesús ningo noprometéi pe kuimbaʼépe ohotaha yvágape ogoverna hag̃ua hendive, opromete haguéicha umi apóstol iñeʼẽrendúvape. Upéva rangue, heʼi chupe: “Añetehápe haʼe ndéve koestedía: Reiméta chendive pe hardín neporãvape” (Lucas 23:43). Péicha jahechakuaa Jesús omeʼẽha pe kuimbaʼépe pe esperánsa oikove hag̃ua peteĩ paraísope, térã peteĩ hardín neporãvape ko yvy ape ári. Ha umi persóna oñekomparáva ovecháre, “oikovéta opa ára g̃uarã” pe paraísope.

Apóstol Juan omombeʼu vaʼekue avei mbaʼéichapa ojeikóta ko yvy ape ári. Haʼe heʼi: “Ñandejára róga oĩta yvyporakuérandi, haʼe oikóta hendivekuéra ha haʼekuéra haʼéta ipuévlo. Ha Ñandejára voi oĩta hendivekuéra. Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Apocalipsis 21:3, 4).

Péro ikatu hag̃uáicha pe kuimbaʼe oĩ pe paraíso Jesús opromete vaʼekuépe, oñemoingove jeýta chupe. Ha ndahaʼéi haʼe añónte la orresusitátava. Jesús omyesakã porã vaʼekue upéva, heʼírõ guare: “[Og̃uahẽta] pe óra opavave umi oĩva pe sepultúrape ohendutaha iñeʼẽ ha osẽta. Umi ojapo vaʼekue iporãva oñemoingove jeýta oikove hag̃ua, umi ojapo vaʼekue ivaíva katu oñemoingove jeýta ojehusga hag̃ua” (Juan 5:28, 29).

Péro, ¿mbaʼépa oikóta umi apóstol iñeʼẽrendúvagui, ha umi ótro kristiáno ohótavagui yvágape? La Biblia heʼi: “Oikóta chuguikuéra Ñandejára ha Cristo saserdóte, ha ogovernáta hendive mil áñore” (Apocalipsis 20:6). Koʼã persóna ningo kuña ha kuimbaʼe oiko vaʼekue ko yvy ape ári. Upéicha rupi, haʼekuéra ogoverna vove Cristo ndive ontende porãta ha oiporiahuverekóta umi hénte oikóvape ko yvy ape ári (Apocalipsis 5:10).

Jesús oipurúta isakrifísio repykue yvyporakuéra rehehápe ha oipeʼáta chupekuéra pe pekádo poguýgui. Jesús ha umi ogovernáva hendive oipytyvõta entéro oĩvape ko yvy ape ári ohupyty hag̃ua perfeksión. Upépe ae yvyporakuéra oikóta Ñandejára oipota haguéicha iñepyrũmby guive, heʼírõ guare Adán ha Évape ifamília hag̃ua ha omyenyhẽ hag̃ua ko yvy. Upe tiémpope avave nomanomoʼãvéima pe pekádo káusare.

Ojapopávo koʼã mbaʼe, Jesús okumplipaitéta Jehová ojerure vaʼekue chupe. Ha omohuʼãvo pe goviérno de 1.000 áño, ontregáta Irréino ha entéro yvypóra perfékto Itúvape. Upéva ojapóvo, Jesús ohechauka iñumildetereiha, ha apóstol Pablo oñeʼẽ vaʼekue upévare heʼírõ guare: “Oñemoĩ vove ipoguýpe opa mbaʼe, upévo pe Taʼýra oñemoĩta avei Ñandejára poguýpe, haʼe ningo Upe omoĩ vaʼekue opa mbaʼe Cristo poguýpe. Upéicha Ñandejára añoite omoakãta opa mbaʼe” (1 Corintios 15:28).

Jahechaháicha, Jesús ojapopaite opa oñekotevẽva ikatu hag̃uáicha oñekumpli Ñandejára rembipota. Ha Ñandejára rembipota osegíta ojejapo opa árare, ha péicha ojekuaa porãvétantema añeteha Jesús heʼi vaʼekue ijehe: “Che hína pe tape, pe añetegua, ha pe jeikove” (Juan 14:6).