Umi siérvo ministeriál ojapóva iñimportanteterei

PABLO oskrivi vaʼekue pe kongregasión de Filípospe: “Che Pablo, ha Timoteo, Cristo Jesús esklávo romondo ko kárta enterove umi ojeporavo vaʼekuépe haʼéva Cristo Jesús disípulo oĩva Filípospe, avei umi ansiáno ha siérvo ministeriálpe” (Filip. 1:1). Jahecha pe téxtope Pablo imanduʼa hague umi siérvo ministeriál rehe. Koʼã kuimbaʼe oreko vaʼekue peteĩ rresponsavilida tuicháva oipytyvõvo umi ansiánope kongregasiónpe. Ha koʼág̃a péicha avei haʼekuéra oipytyvõ umi ansiánope ha ombaʼapo pe kongregasión rehehápe.

² ¿Ndépa reikuaa umi siérvo ministeriál oĩvape ne kongregasiónpe? ¿Reikuaápa mbaʼeichaitépa ombaʼapo hikuái nderehehápe ha pe kongregasión rehehápe? Jehová omombaʼeterei umi siérvo ministeriál ojapóva. Pablo heʼi: “Oñeñeʼẽ porã umi kuimbaʼe ojapo porãvare hembiapo kongregasiónpe, ha haʼekuéra ndokyhyjemoʼãi oñeʼẽ hag̃ua pe jerovia orekóvare Cristo Jesús rehe” (1 Tim. 3:13).

UMI RREKISÍTO BÍBLICO UMI SIÉRVO MINISTERIÁLPE G̃UARÃ

³ Umi siérvo ministeriál okumpli porã vaʼerã umi mbaʼe oñehaʼarõva kristianokuéragui, irresponsávle vaʼerã ha okumpli porã vaʼerã iñasignasión. Upévare Pablo heʼi vaʼekue mbaʼe rrekisítopa okumpli vaʼerã umi siérvo ministeriál: “Upéicha avei umi siérvo ministeriál iñakãguapy vaʼerã, ndovaléi hovamokõi, ndoʼurasái vaʼerã vevída, ndoikói vaʼerã itarovaite oheka umi mbaʼe chupekuéra okonvenítavante iplatarayhúgui. Haʼekuéra oñakarama hatã vaʼerã pe jeroviáre, haʼéva hína peteĩ sekréto sagrádo, ha ikonsiénsia potĩ vaʼerã. Tekotevẽ avei ojehecha raẽ ikatupyrýtapa hikuái ojapo hag̃ua upe traváho, ha ndaipóriramo mbaʼeve ivaíva ojeʼéva hesekuéra, ikatu oiko chuguikuéra siérvo ministeriál. Umi siérvo ministeriál peteĩnte hembireko vaʼerã, omoakã porã vaʼerã ifamiliakuérape ha hogapy” (1 Tim. 3:8-10, 12). Oñekumplívo umi rrekisíto iñimportánteva oĩva umi siérvo ministeriálpe g̃uarã ndojeakusamoʼãi pe kongregasión omeʼẽha umi rresponsavilida oimeraẽ persónape.

⁴ Umi siérvo ministeriál imitã térã ijedáramo jepe osẽ meme predikasiónpe. Haʼekuéra osegi Jesús ehémplo ha ikyreʼỹ predikasiónpe. Ha péicha ohechauka oipotaha ojesalva umi hénte Jehová oipotaháicha avei (Is. 9:7).

⁵ Umi siérvo ministeriál omoĩ ehémplo porã oñemonde, oñeʼẽ, oñekomporta ha opensa lájape. Haʼekuéra iñakãguapy ha upévare kongregasiónpe ojerrespeta chupekuéra. Umi siérvo oñehaʼãmbaite omombarete iñamista Jehovándi ha ojagarra ensério umi rresponsavilida orekóva kongregasiónpe (Tito 2:2, 6-8).

⁶ Tekotevẽ “ojehecha raẽ ikatupyrýtapa hikuái ojapo hag̃ua upe traváho”. Oñenombra mboyve koʼã kuimbaʼépe haʼekuéra ohechaukáma vaʼerã okumpli porãha entéro mbaʼe. Ojekuaa vaʼerã hesekuéra omotenondeha Ñandejára Rréino ha oñehaʼãha ohupyty hetave priviléhio oservi hag̃ua ótrope. Péicha omoĩ ehémplo porã umi ermáno kongregasionpeguápe (1 Tim. 3:10).

UMI SIÉRVO MINISTERIÁL TRAVÁHO

⁷ Umi siérvo ministeriál ojapo heta mbaʼe umi ermáno rehehápe. Upéicha rupi umi ansiáno ikatu ohasave tiémpo oporomboʼévo ha okuidávo Jehová ovechakuérare. Pe kuérpo de ansiáno oasigna umi tembiapo umi siérvope ha upearã oreko enkuénta mbaʼépe ikatupyryve hikuái ha mbaʼépa oikotevẽ pe kongregasión.

⁸ Jahechami mbaʼe traváhopa ojapo hikuái kongregasiónpe. Peteĩ siérvo kárgope ikatu opyta umi puvlikasionkuéra, ikatu hag̃uáicha umi ermáno orretira imbaʼerã ha opredika hag̃ua. Ótro oñatende pe kongregasión kontavilida rehe térã pe territóriore. Algúnope oñeasigna oñatende hag̃ua umi mikrófono, sonído, oservi hag̃ua de akomodadór ha oipytyvõ hag̃ua ansianokuérape ótra kósa tekotevẽvape. Oĩ avei heta traváho ojejapo hag̃ua mantenimiéntope ha oñemopotĩ hag̃ua pe Salón, upévare ojejerure jepi umi siérvo ministeriálpe oorganisa hag̃ua koʼã traváho.

⁹ Algúna kongregasiónpe káda traváho ikatu oñemeʼẽ diferénte siérvope. Ótro lugárpe katu peteĩ siérvo ikatu oñenkarga hetave rresponsavilida rehe. Ha heta kásope peteĩ traváho opyta mokõi térã hetave siérvo kárgope. Péro umi kongregasión saʼihápe siérvo ministeriál, umi ansiáno ikatu oasigna koʼã traváho umi ermáno vautisádo omoĩvape ehémplo porã. Péicha haʼekuéra orekótama experiénsia ág̃a oñenombra vove chupekuéra siérvo ministeriál. Ndaipóriramo ermáno ojapo hag̃ua koʼã traváho ikatu ojapo umi ermána omoĩva ehémplo porã kongregasiónpe, péro jaikuaa haʼekuéra oipytyvõramo jepe koʼã traváhope noñenombramoʼãiha chupekuéra siérvo ministeriál. Pe ermáno térã ermána oipytyvõva koʼã traváhope omoĩ vaʼerã ehémplo porã entéro mbaʼépe, tahaʼe ifamíliape, oñemonde lájape, oelehívo umi vyʼarã ha ohóvo rreunionhápe ha predikasiónpe.

¹⁰ Umi kongregasión oĩhápe saʼieterei ansiáno, umi siérvo ministeriál ikatupyrýva ikatu ojapo umi pregúnta de vautísmo pe párte oñeporanduhápe umi mbaʼe jagueroviáva. Upéva jatopa ko lívrope pe seksión héravape Informasión pe “Párte 1 Umi enseñánsa kristianokuéra ogueroviáva”. Péro pe “Párte 2 Mbaʼéichapa oñekomporta vaʼerã umi kristiáno”, oñeʼẽ umi téma helikadovévare, upévare peteĩ ansiáno ojapo vaʼerã ko párte umi ojevautisasévandi.

¹¹ Umi ansiáno ikatu jepi okambia umi siérvo ministeriálgui itraváho ohecháramo iporãtaha ojapo upéicha. Péro ideprovécho avei peteĩ siérvo ojepokuaáramo ojapo el mísmo traváho, pórke péicha ikatupyryvéta ha orekovéta experiénsia.

¹² Umi siérvo ministeriál ‘ohechaukávape oñakãrapuʼãha ohóvo’ ikatu oñemeʼẽ ótro traváho, upéva odependéma mbaʼépa oikotevẽ káda kongregasión (1 Tim. 4:15). Por ehémplo ndaipóriramo heta ansiáno, ikatu peteĩ siérvo ministeriál oservi de auxiliár de superintendénte de grúpo. Ha oĩ káso ikatuhápe oservi de siérvo de grúpo, péro umi ansiáno ohecha vaʼerã mbaʼéichapa ojapo hembiapo. Ikatu avei oñeasigna umi siérvo ministeriálpe ojapo hag̃ua algúna párte pe rreunión héravape Mbaʼéichapa Jaiko ha Japredika vaʼerã, avei ikatu omoakã pe párte hérava Estúdio bíblico kongregasionpegua ha omeʼẽkuaa avei hikuái diskúrso púvliko. Ikatu oñemeʼẽ chupekuéra ótra rresponsavilida oñekotevẽramo álgo kongregasiónpe ha pe siérvo ministeriál okumplíramo umi rrekisíto upe travahorã (1 Ped. 4:10). Umi siérvo ministeriál oĩ vaʼerã oipytyvõ hag̃uáicha vyʼápe umi ansiánope.

¹³ Umi mbaʼe ojapóva umi siérvo ministeriál idiferénte umi ansiáno ojapóvagui, péro ndahaʼéi upe haguére naiñimportánteiva. Umi siérvo ojapóva ningo peteĩ servísio sagrádo Ñandejárape g̃uarã ha oipytyvõ oñembaʼapo porã hag̃ua pe kongregasiónpe. Ohasávo pe tiémpo, peteĩ siérvo ministeriál ikatu ohechauka okumpli porãha irresponsavilida ha ohupyty umi rrekisíto okuida hag̃ua Ñandejára ovechakuérare ha oporomboʼe hag̃ua, upéicharõ ikatu oñerrekomenda chupe oñenombra hag̃ua ansiáno.

¹⁴ ¿Ndépa hína peteĩ ermáno imitãva térã peteĩ ermáno rejevautisa ramóva? Oimérõ péicha, ¿reñehaʼãpa hína rehupyty umi rrekisíto reservi hag̃ua de siérvo ministeriál? (1 Tim. 3:1). Káda áño ningo oĩ hetaiterei hénte oikéva pe kongregasiónpe, upévare oñekotevẽterei umi ermáno ijerovia mbaretéva ikatúva ojapo umi traváho oĩva kongregasiónpe. Upévare eñehaʼã vaʼerã eipytyvõ ótrope nde pyʼaite guive. ¿Mbaʼépa ikatu rejapo reipytyvõse hag̃ua ótrope? Ikatu rejepyʼamongeta Jesús ehémplo porãitére (Mat. 20:28; Juan 4:6, 7; 13:4, 5). Rehechávo mbaʼeichaitépa revyʼa reipytyvõ jave ótrope, koʼýte reserviséta nde rapichápe (Hech. 20:35). Upéi iporãta rejeofrese reporopytyvõ hag̃ua oĩramo oikotevẽva. Avei ojejapo jave mantenimiénto pe Salón del Réinope. Ha ndoúi jave peteĩ ermáno orekóva lektúra térã demostrasión, ikatu rejeofrese rejapo hag̃ua ivése. Reñakãrapuʼã kongregasiónpe heʼise avei reñehaʼãha ereko umi kualida porã, ha upearã rejepokuaa vaʼerã restudia la Biblia (Sal. 1:1, 2; Gál. 5:22, 23). Reprogresa hag̃ua tekotevẽ avei rehechauka ikatuha ojejerovia nderehe ha rejapo porãha umi asignasión oñemeʼẽva ndéve (1 Cor. 4:2).

¹⁵ Umi siérvo ministeriálpe oñenombra pe espíritu sánto rupive ikatu hag̃uáicha oipytyvõ kongregasiónpe. Enterove ikatu ohechauka omombaʼeha pe traváho ojapóva umi siérvo ministeriál oapojávo chupekuéra okumpli jave iñasignasión. Péicha pe kongregasión ohechaukáta ovaloraha umi mbaʼe Jehová omeʼẽva ipuévlope oservi hag̃ua chupe de fórma ordenáda (Gál. 6:10).