Abrahán ha Sara iñeʼẽrendu vaʼekue Ñandejárape

Babel ypýpe oĩ vaʼekue peteĩ siuda hérava Ur. Umi oikóva upépe ndoadorái Jehovápe, síno umi dios fálsope. Péro oĩ vaʼekue peteĩ kuimbaʼe oadoráva Jehovápe añoite, upe kuimbaʼe héra vaʼekue Abrahán.

Jehová heʼi Abrahánpe: “Eheja nde róga ha ne parientekuéra ha eho pe lugár ahechaukátavape ndéve”. Ha upéi opromete chupe: “Che ajapóta ndehegui peteĩ nasión tuicháva, ha nde rupive oñevendesíta heta hénte ko múndo tuichakuére”.

Abrahán ndoikuaái vaʼekue moõpa omondóta chupekuéra Jehová, péro okonfia hese. Abrahán, hembireko Sara, itúa Taré ha isovríno Lot iñeʼẽrendu Ñandejárape. Upévare oprepara hikuái ikosakuéra ha upéi osẽma hikuái Úrgui.

Abrahán orekóma kuri 75 áño haʼe ha ifamiliakuéra og̃uahẽrõ guare pe yvy Jehová omondo haguépe chupekuéra. Upe lugár héra vaʼekue Canaán. Upépe Jehová opromete chupe: “Ko yvy koʼág̃a nde rehecháva hína ameʼẽmbaitéta nde raʼykuérape”. Péro heʼírõ guare chupe upéva, haʼe ha hembireko ijedaitereíma vaʼekue ha naifamíliai gueteri hikuái. ¿Mbaʼéichapa upéicharõ Jehová okumplíta pe opromete vaʼekue Abrahánpe?