Ñandejára oprova pe fe oguerekóva Abrahán

REHECHÁPA pe ojapovahína Abrahán? Oguereko ipópe peteĩ kyse, ha haʼetévaicha ojukátava itaʼýrape. Mbaʼére piko ojapóta upéva? Jahecha raẽta mbaʼéichapa oguerekorakaʼe Abrahán ha Sara pe mitã.

Nemanduʼáne Ñandejára oprometehague chupekuéra oguerekotaha peteĩ mitã. Péro upéva haʼetévaicha ndaikatumoʼãiva, pórke Abrahán ha Sara ijedaitereíma. Péro Abrahán oguerovia Ñandejára ikatuha ojapo peteĩ mbaʼe haʼetévaicha ku ndaikatumoʼãiva ojejapo. Upéicharamo, mbaʼépa oikorakaʼe?

Ñandejára ojapo rire ko promésa ohasa jey un áño. Koʼág̃a Abrahán oguerekóma 100 áño ha Sara 90. Ha upérõ oguereko hikuái peteĩ mitã hérava Isaac. Ñandejára okumpli pe promésa ojapovaʼekue!

Péro tuichave rire Isaac, Jehová oprova pe fe oguerekóva Abrahán. Ohenói chupe: ‘Abrahán!’. Ha Abrahán okontesta: ‘Koʼápe aime!’. Upéi Ñandejára heʼi: ‘Ejagarra nde raʼy Isaac, pe nde raʼy peteĩmíme, ha egueraha pe montáña ahechaukátavape ndéve. Upépe ejuka nde raʼy ha emeʼẽ peteĩ sakrifísioramo’.

Mbaʼeichaitépa upéva nombovyʼái Abrahánpe, pórke haʼe ohayhueterei itaʼýrape! Ha nemanduʼáne Ñandejára oprometehague Abrahán raʼykuéra oikotaha Canaánpe. Péro mbaʼéicha piko ikatúta oiko upéva omanóramo Isaac? Abrahán nontendéi upéva, péro iñeʼẽrendu Ñandejárape.

Og̃uahẽvo pe montáñape, Abrahán ojokua Isaácpe ha omoĩ pe altár ojapovaʼekue ári. Upémarõ oguenohẽ pe kyse ojuka hag̃ua itaʼýrape. Péro upe jave Ñandejára ánhel ohenói chupe: ‘Abrahán, Abrahán!’. Ha Abrahán okontesta: ‘Koʼápe aime!’.

‘Ani rejapo mbaʼeve ivaíva pe mitãrusúre’, heʼi Ñandejára. ‘Aikuaáma koʼág̃a rejeroviaha cherehe, pórke nanerakateʼỹi remeʼẽ hag̃ua chéve nde raʼy, pe nde raʼy peteĩmi’.

Tuichaitépa pe fe Abrahán oguerekovaʼekue Ñandejárare! Haʼe oguerovia ndaiporiha mbaʼeve ikatuʼỹva Jehovápe, ha Jehová ikatuha omopuʼã jey Isaácpe omanovaʼekue apytégui jepe. Péro Ñandejára ndoipotaivaʼekue Abrahán ojuka Isaácpe; upévagui oheja peteĩ ovecha opaʼã peteĩ ñana rakãre ha heʼi Abrahánpe osakrifika hag̃ua Isaac rekovia.