Nemanduʼákena mbaʼépa oiko vaʼekue Lot rembirekóre

Abrahán ha isovríno Lot oiko vaʼekue Canaánpe. Mokõivévante ou vaʼekue hetaiterei hymba ha michĩma chupekuéra g̃uarã pe lugár oikoha hikuái. Upémarõ Abrahán heʼi Lótpe: “Ko yvy ningo michĩma ñandéve g̃uarã, eiporavóna moõ gotyopa nde rehóta ha che ahátante pe ótro ládo”. ¡Ajépa ivuenoite Abrahán!

Lot ohecha peteĩ lugár vérde asýva peteĩ siuda hérava Sodoma ypýpe. Upépe iporãiterei vaʼekue pe yvy ha ndofaltái y. Upémarõ haʼe oho oiko Sodómape hembireko ha itajyrakuérandi.

Sodoma ypýpe ningo oĩ vaʼekue peteĩ siuda hérava Gomorra. Ha umi hénte oikóva umi mokõi siudápe iñañaiterei vaʼekue. Upévare Jehová odesidi ohunditaha Sodoma ha Gomorra. Péro Jehová ndoipotái vaʼekue Lot ha ifamília oñehundi, upéicha rupi omondo mokõi ánhelpe heʼi hag̃ua chupekuéra: “¡Pesẽke pyaʼe koʼágui, pórke Jehová ohundíta ko siuda!”.

Péro Lot omakaneaiterei osẽ hag̃ua, upévare umi ánhel ojagarra chupe, hembireko ha umi mokõi itajýrape ipógui, ha onohẽ chupekuéra pe siudágui. Upéi peteĩva umi ánhel heʼi chupekuéra: “¡Pyaʼéke tapeho ani pemano! ¡Aníke pemaña pende rapykue gotyo!”.

Lot ha itajyrakuéra og̃uahẽrõ guare pe siuda de Zóarpe, Jehová omongy asúfre ha tatarendy Sodoma ha Gomorra ári. Koʼã mokõi siuda oñehundiete. Upéva oikórõ guare omano Lot rembireko. Haʼe naiñeʼẽrendúi kuri Jehovápe ha omaña hapykue gotyo ha oiko chugui peteĩ estátua de sal. Péro Lot ha itajyrakuéra iñeʼẽrendu ha upévare ojesalva. Oiméne Lot ombyasy raʼe hembireko omano haguére ha itajyrakuéra oiméne upéicha avei. Upéicharõ jepe, haʼekuéra ohechakuaa vaʼekue iñimportanteveha iñeʼẽrendu Jehovápe.