Ñaipytyvõkena ñane ermanokuérape ogueropuʼaka hag̃ua umi situasión ijetuʼúva

1. ¿Mbaʼéichapa ikatu jasegi ñande Túa ñanderayhuetéva ehémplo?

JEHOVÁ ningo ñanderayhueterei (Juan 3:16). Ha ñande jasegise ñande Túa ñanderayhuetéva ehémplo, upévare ñañehaʼã ‘jajoayhu oñoermánoicha, jahasa asy oñondive, ha jajoporiahuvereko’, ha koʼýte jahechauka vaʼerã umíva ‘ñane ermanokuérape’ (1 Ped. 3:8; Gál. 6:10). Ñande ningo ñaipytyvõse ñane ermanokuérape ohasa asy jave hikuái.

2. ¿Mbaʼépa jahecháta ko artíkulope?

² Enterove oĩséva Jehová famíliape ohasáta katuete umi situasión ijetuʼúva (Mar. 10:29, 30). Hiʼag̃uivévo ohóvo pe fin koʼýte jahasáta hetave mbaʼe ivaíva. ¿Mbaʼéichapa ikatu ñañopytyvõ? Jahecha raẽta mbaʼépa ikatu ñaaprende Lot, Job ha Noemí ehémplogui. Upéi ñaanalisáta mbaʼe mbaʼe ijetuʼúvapa ohasa ñane ermanokuéra ha mbaʼéichapa ikatu ñaipytyvõ chupekuéra ogueropuʼaka hag̃ua umíva.

ÑANEPASIÉNSIAKENA

3. Ohechaukaháicha 2 Pedro 2:7, 8, ¿mbaʼépa odesidi vai vaʼekue Lot, ha mbaʼépa oiko upe haguére?

³ Lot ningo tuicha ojavy vaʼekue odesidírõ guare oikotaha Sodómape. Iporãramo jepe upe lugár, umi hénte upepegua hekovaieterei vaʼekue (elee 2 Pedro 2:7, 8). Lot heta ohasa asy vaʼekue ova haguére upe lugárpe (Gén. 13:8-13; 14:12). Amalisia hembireko ohayhueterei pe siuda térã umi hénte oikóvape upépe, ha upévare ou naiñeʼẽrendúi Jehovápe. Haʼe omano Jehová omboúrõ guare yvágagui tatarendy ha asúfre upe lugárpe. Ñapensamíntena avei umi mokõi Lot rajýre, haʼekuéra oñekomprometéma kuri omenda hag̃ua mokõi kuimbaʼe Sodomapeguáre, ha amo ipahápe umíva omano vaʼekue. Lot ningo operde hóga, entéro mbaʼe orekóva, ha ivaiveha katu, omano chugui hembireko (Gén. 19:12-14, 17, 26). Péro umi tiémpo ijetuʼuetévape, Jehová lomímonte osegi vaʼekue ipasiénsia Lot rehe.

4. ¿Mbaʼéichapa Jehová ohechauka vaʼekue ipasiensiaha Lot rehe? (Ehecha pe taʼanga oĩva ko rrevísta apére).

⁴ Lot odesidíramo jepe oiko Sodómape, Jehová ohechauka oiporiahuverekoha chupe omondóvo umi ánhel orreskata hag̃ua chupe ha ifamíliape. Umi ánhel ombyapura Lótpe osẽ hag̃ua Sodómagui, “péro Lot omakaneaiterei osẽ hag̃ua”. Upévare umi ánhel ojagarra Lótpe ipógui ha oipytyvõ chupe ha ifamíliape pyaʼe porã osẽ hag̃ua pe siudágui (Gén. 19:15, 16). Upépe umi ánhel heʼi chupe oho hag̃ua okañy umi montáñare. Péro iñeʼẽrendu rangue Jehovápe, Lot ojerure chupe oho hag̃ua peteĩ puevloʼi ag̃ui opytávape upégui (Gén. 19:17-20). Jehová ningo ipasiénsia vaʼekue ohendu hag̃ua Lótpe, ha opermiti chupe oho upe puevloʼípe. Upe rire Lot okyhyjéma opyta hag̃ua oiko upe lugárpe, upémarõ oho oiko umi montáñare, pe lugár Jehová heʼi haguépe voi chupe oho hag̃ua oiko (Gén. 19:30). ¡Ajépa Jehová ipasiensiaite rakaʼe Lot rehe! Jahechamína mbaʼéichapa ikatu jasegi iñehémplo.

5, 6. ¿Mbaʼéichapa ikatu jasegi Jehová ehémplo jajapóvo 1 Tesalonicenses 5:14 heʼíva?

⁵ Oiko haguéicha Lot rehe, ikatu hína peteĩ ermáno kongregasionpegua odesidi vai ha tuicha iprovléma upevakuére. ¿Mbaʼépa jajapóta oikóramo upéva? Ikatu oime jaʼeseterei chupe oikoha hese upéicha odesidi vai haguére, ha ikatu voi siérto hína upéva (Gál. 6:7). Péro iporãvéta ñaipytyvõramo chupe, Jehová oipytyvõ haguéicha Lótpe. ¿Mbaʼéichapa jajapokuaa upéva?

⁶ Jehová ningo omondo vaʼekue umi ánhelpe ndahaʼéi oavisa hag̃uánte Lótpe Sodoma oñehunditaha, síno oipytyvõ hag̃ua chupe ikatu hag̃uáicha ojesalva. Upéicha avei, sapyʼánte tekotevẽ jaavisa ñane ermánope haʼe ojapoha hína peteĩ mbaʼe omoprovlématava chupe upe rire. Péro ikatu voi jajapo algúna kósa ñaipytyvõ hag̃ua chupe. Haʼe ojeretereíramo jepe osegi hag̃ua umi konsého oñemeʼẽva chupe la Biblia rupive, tekotevẽ ñanepasiénsia hese. Jasegíkena umi ánhel ehémplo. Aníkena ñañentrega ha ñapensa ñane ermáno naipohãveimaha ni jajeaparta chugui, upéva rangue jahecha vaʼerã mbaʼe mbaʼépa ikatu jajapo hesehápe (1 Juan 3:18). Jaʼe porãsérõ g̃uarã, sapyʼánte tekotevẽta voi jajagarra chupe ipógui térã ñaipytyvõ ñane ermánope osegi hag̃ua umi konsého porã oñemeʼẽ vaʼekue chupe (elee 1 Tesalonicenses 5:14).

7. ¿Mbaʼe mbaʼe rehepa jajesareko vaʼerã jasegi hag̃ua Jehová ehémplo?

⁷ Jehová ikatu kuri ojesareko Lot deféktore, péro ndojapói upéva. Tiémpo rire, ijespíritu rupive Jehová oskrivika Pédrope heʼi hag̃ua Lot haʼe hague peteĩ kuimbaʼe ihústova. ¡Ajépa ñanembovyʼaite jaikuaávo Jehová ndojesarekoiha umi ñande fállare! (Sal. 130:3). Jasegíkena Jehová ehémplo ha jajesareko umi kualida porã ñane ermanokuéra orekóvare, upéva ñanepytyvõta ñanepasiénsia hag̃ua hesekuéra. Péicha ojagarra porãvéta hikuái ñaipytyvõse jave chupekuéra.

JAIPORIAHUVEREKÓKENA ÑANE ERMÁNOPE

8. ¿Mbaʼépa jajapóta jaiporiahuverekóramo ñane ermánope?

⁸ Job heta ohasa asy vaʼekue avei, péro ndahaʼéi kuri odesidi vai rupi, oiko haguéicha Lot rehe. Haʼe ningo ohasa vaʼekue heta provléma, por ehémplo operde entéro mbaʼe orekóva, umi hénte ndorrespetavéi chupe yma guaréicha, ha avei hasyete. Ha ivaive hag̃ua la isituasión katu, chugui ha hembirekógui omanombaite ifamiliakuéra. Upéi mbohapy iñamígo guaʼu oho ovisita chupe, péro okonsola rangue Jóbpe, haʼekuéra ndoiporiahuverekói chupe ni michĩmi. ¿Mbaʼérepa ojapo hikuái upéicha? Haʼekuéra noñehaʼãi ontende mbaʼépa añetehápe ojehu Jóbpe. Upéicha rupi koʼã mbohapy amígo guaʼu opensa vai Job rehe ha heʼi hese omereseha voi osufri. ¿Mbaʼépa jajapo vaʼerã ani hag̃ua jajavy haʼekuéraicha? Jahechakuaa vaʼerã Jehová añoite oikuaaha entéro mbaʼe ohasáva peteĩ persóna. Upévare jajapysaka porã vaʼerã ñane ermánore omombeʼu jave ñandéve iprovléma. Péro ani ñahendúnte la heʼíva, síno ñañehaʼã vaʼerã ñañandu umi mbaʼe haʼe oñandúva. Upéicharõ añoite ikatúta jahasa asy ñane ermánondi ha ñañemoĩ ilugárpe.

9. ¿Mbaʼépa ndajajapomoʼãi jaiporiahuverekóramo ñane ermánope, ha mbaʼérepa?

⁹ Jaiporiahuverekóramo ñane ermánope ndajaikomoʼãi ñamosarambi upérupi umi provléma orekóva. Pe ichismósova nomombaretéi kongregasiónpe, síno omokangy (Prov. 20:19; Rom. 14:19). Upe persóna ndohechaukái imbaʼeporãha pórke oñeʼẽ opensaʼỹre, ha umi mbaʼe heʼíva ikatu omoñeñandu vaivéntema pe osufrívape hína (Prov. 12:18; Efes. 4:31, 32). Upévare ikuentave jajesareko umi kualida orekóvare ñane ermáno, ha ñapensa mbaʼéichapa ikatu ñaipytyvõ chupe ogueropuʼaka hag̃ua iprovléma.

10. ¿Mbaʼépa ñaaprende Job 6:2, 3 heʼívagui?

¹⁰ (Elee Job 6:2, 3). Job ningo ‘oñeʼẽ vaʼekue opensa porãʼỹre’, péro upe rire orrekonose oĩ vai hague umi mbaʼe heʼíva (Job 42:6). Upéicha avei peteĩ ermáno ohasa asýva hína ikatu oñeʼẽ opensaʼỹre, ha upe rire ombyasy heʼi haguére umi mbaʼe heʼiʼỹ vaʼerã. ¿Mbaʼépa jajapo vaʼerã upéicha jave? Jakritika rangue chupe, jaiporiahuvereko vaʼerã ñane ermánope. Ñanemanduʼa vaʼerã Jehová ndoipotái hague jahasa asy ni jareko umi provléma koʼág̃a jarekóva. Upévare nañanesorprendéi vaʼerã Jehová siérvo ifiélva oñeʼẽramo opensa porãʼỹre oĩ jave peteĩ situasión ijetuʼuetereívape. Oñeʼẽ vaíramo jepe Jehováre térã ñanderehe, ani ensegída voi ñandepochy upévare ni jahusga chupe umi mbaʼe heʼívare (Prov. 19:11).

11. ¿Mbaʼéichapa umi ansiáno ikatu osegi Elihú ehémplo omeʼẽ jave konsého?

¹¹ Sapyʼánte peteĩ persóna osufríva hína oikotevẽ avei oñemeʼẽ chupe konsého térã ojekorrehiʼimi oñepytyvõ hag̃ua chupe (Gál. 6:1). ¿Mbaʼéichapa umi ansiáno ikatu ojapo upéva? Haʼekuéra osegi vaʼerã Elihú ehémplo, haʼe ningo ojapysaka porã vaʼekue Job rehe ha oñemoĩ ilugárpe (Job 33:6, 7). Elihú omeʼẽ konsého Jóbpe ontende porã rire ae mbaʼépa haʼe opensa. Umi ansiáno osegíva Elihú ehémplo ojapysaka porãta pe ermánore ha oñehaʼãta ontende isituasión. Péicha ojapóramo, pe konsého omeʼẽva hikuái katuete opokóne pe ermáno korasõre.

ÑAÑEʼẼKENA ÑAPOROKONSOLA HAG̃UÁICHA

12. ¿Mbaʼéichapa oñeñandu vaʼekue Noemí omano rire chugui iména ha umi mokõi imemby?

¹² Noemí ningo ohayhu vaʼekue Jehovápe ha ifiél chupe. Péro omano rire chugui iména ha umi mokõi imemby, haʼe okambiase vaʼekue héra, ndoipotavéima oñehenói chupe Noemí síno “Mará”, heʼiséva “Iróva” (Rut 1:3, 5, 20, nóta, 21). Noemí nuéra Rut ningo opyta hendive ohasa asy aja entéro. Rut oipytyvõ vaʼekue chupe oreko hag̃ua umi mbaʼe oikotevẽva ha avei okonsola chupe umi mbaʼe heʼíva rupive. Rut ningo oipuru vaʼekue umi palávra isensíllova heʼi hag̃ua Noemíme ipyʼaite guive ohayhu ha oapojaha chupe (Rut 1:16, 17).

13. ¿Mbaʼérepa ñakonsola vaʼerã umi omano vaʼekuépe chugui imborayhu jára?

¹³ Peteĩ ermáno térã ermánagui omanóramo imborayhu jára, haʼe katuete oikotevẽ ñakonsola chupe. Umi omendáva ningo ikatu ñakompara mokõi yvyramáta okakuaávare ojoykére. Oĩ rupi oñondive, tiémpo rire umi hapo ojoajupa ojuehe, upéicha rupi ojehapoʼo jave peteĩvape ha omano, katuete ojeperhudika avei pe ótro yvyramátape. Upéicha avei oiko umi omendávagui omanóramo chugui iñirũ, haʼe opyta vaieterei ha heta tiémpore osegi ohasa asy. Jahechamína Paulab káso, iména ningo omano vaʼekue derrepentete. Haʼe omombeʼu: “Che rekove kompletoite ningo okambia ha añandu nameʼẽveimaha. Haʼéngo che amigoite kuri, ha omano chehegui. Che añemongeta vaʼekue hendive opa mbaʼére, haʼe chepytyvõ ambohovái jave umi mbaʼe ijetuʼúva ha akomparti vaʼekue hendive umi mbaʼe chembovyʼáva. Haʼe siémpre cherendu amombeʼu jave chupe che provléma. Che ména omanórõ guare, haʼete voi ku alamita che rekove omanóva avei”.

14, 15. ¿Mbaʼéichapa ikatu ñakonsola umi omano vaʼekuépe chugui hembiayhu?

¹⁴ ¿Mbaʼéichapa ikatu ñakonsola umi omano vaʼekuépe chugui hembiayhu? Primeroite ningo iporãta ñañemongetáramo hendive, ñatĩ térã ndajaikuaáiramo jepe mbaʼépa jaʼéta chupe. Paula heʼi: “Che antende la hénte ndoikuaaiha jepi mbaʼépa heʼíta térã ojapóta oĩ jave omanóva. Okyhyje hikuái heʼírõ g̃uarã álgo noĩporãiva térã ikatúva oporombopochy. Péro añetehápe ivaive hína la hénte ndeʼíriramo mbaʼevete asy”. Pe persóna oñembyasýva oiméne nohaʼarõi voi jaʼe chupe álgo iprofundoitereíva. Paula heʼive: “Amombaʼeterei vaʼekue che amigokuéra oñembojáramo che rendápe ha heʼínte chéve ombyasyetereiha la oikóva”.

¹⁵ Ojapo unos kuánto áño William rembireko omano hague, haʼe omombeʼu: “Amombaʼeterei oĩ jave omombeʼúva chéve umi mbaʼe porã ojapo vaʼekue che rembireko. Upéva ohechauka chéve che rembirekópe ojehayhu ha ojerrespeta hague. Tuichaiterei ningo chepytyvõ péicha imanduʼa jave hese hikuái. La heʼíva hikuái tuichaiterei chekonsola, pórke che ahayhueterei vaʼekue che rembirekópe ha haʼe iñimportanteterei chéve g̃uarã”. Peteĩ viúda hérava Bianca heʼi: “Chekonsolaiterei ningo oĩ jave oñemboʼéva chendive ha olee chéve peteĩ térã mokõi téxto bíblico. Avei chepytyvõ oñeñeʼẽramo che ménare ha cherendúramo hikuái añeʼẽ jave hese”.

16. a) ¿Mbaʼépa jasegi vaʼerã jajapo umi viúdo ha viúda rehehápe? b) Heʼiháicha Santiago 1:27, ¿mbaʼe rresponsavilidápa ñande jareko?

¹⁶ Rut opyta haguéicha pe viúda Noemíndi, ñande avei jasegi vaʼerã ñaipytyvõ umi viúdo térã viúdape. Paula omombeʼu: “Che ména omano riremínte hetaiterei hénte ou vaʼekue chepytyvõ ha chekonsola. Péro tiémpo riremínte haʼekuéra osegíma hembiapo jepiveguáicha. Che katu la che rekovemi okambiaite voi. Tuichaite ningo ñanepytyvõ la hénte ohechakuaa jave pe oñembyasýva oikotevẽha oñekonsola chupe ohasáramo jepe heta mése térã áño”. Péro jaikuaa káda persóna idiferenteha mbaʼéichapa ogueropuʼaka iñembyasy. Oĩ umi pyaʼeve ojerrekuperáva, ha ótrope g̃uarã katu ijetuʼu ojapo hag̃ua umi mbaʼe ymave ojapo vaʼekue hembiayhúndi, pórke omomanduʼa jey chupe umi mbaʼe ohasa vaʼekuére oñondive. Ñanemanduʼákena Jehová omeʼẽ hague ñandéve tuicha priviléhio ha rresponsavilida: Ñañangareko umi omano vaʼekuére chugui iména térã hembireko (elee Santiago 1:27).

17. ¿Mbaʼérepa tekotevẽ ñaipytyvõ umi oheja vaʼekuépe chupe iména térã hembireko?

¹⁷ Oĩ avei osufríva ha ohasa asýva oheja rupi chupe iména térã hembireko. Joyce omombeʼu mbaʼéichapa oñeñandu vaʼekue iména ohejárõ guare chupe ótro kuñáre. Haʼe heʼi: “Pe divórsio ningo hasyeterei kuri chéve, ha chéverõ g̃uarã menove hasýta kuri chéve che ména omanórire. Pórke omanórire peteĩ aksidéntepe térã peteĩ mbaʼasýgui haʼe ndaikatumoʼãi kuri odesidi, péro ko kásope che ména odesidi chereja. Che ningo atĩeterei apytávo ha añandu voi ndavaleiha mbaʼeverã”.

18. ¿Mbaʼéichapa ikatu ñaipytyvõ umi ndorekovéimavape hendive imborayhu jára?

¹⁸ Ñanembaʼeporã jave umi ndorekovéimavandi hendive imborayhu jára, ñande jahechauka añetehápe jahayhuha chupekuéra. Koʼág̃a opytápe hikuái haʼeño, koʼýte oikotevẽ umi amígo verdadéro rehe (Prov. 17:17). ¿Mbaʼéichapa ikatu jahechauka ñande haʼeha peichagua amígo? Ikatu ningo ñainvita chupekuéra okaru hag̃ua ñanendive álgo isensillomíva jepe. Jaʼekuaa avei chupekuéra osẽ hag̃ua ñanendive predikasiónpe térã oho hag̃ua ñanendive de paséo. Avei ikatu ñainvita jepi chupekuéra ñanemoirũ hag̃ua jajapo jave ñande estúdio de família. Jajapóramo koʼã mbaʼe, ñambovyʼaitereíta Jehovápe, pórke haʼe “ag̃ui oĩ umi osufrívagui” ha “odefende umi viúdape” (Sal. 34:18; 68:5).

19. ¿Mbaʼépa jajedesidi vaʼerã jajapo heʼiháicha 1 Pedro 3:8?

¹⁹ Koʼẽrõitéma Ñandejára Rréino ogovernáta ko yvy ha “umi mbaʼe vai oiko vaʼekue yma, opytáta tesaráipe”. Hiʼãitéma ñandéve og̃uahẽ pe tiémpo ‘avave naimanduʼamoʼãihápe umi mbaʼe oiko vaʼekuére yma, umíva ojeietétama ñane korasõgui’ (Is. 65:16, 17). Ñahaʼarõ aja og̃uahẽ upe tiémpo, jasegíkena ñañopytyvõ ha jahechauka jahayhuha entéro ñane ermanokuérape, umi mbaʼe jaʼéva ha jajapóva rupive (elee 1 Pedro 3:8).