Umi israelita nokumplíri ipromésa

Jehová heʼi Moiséspe: “Ejupi che rendápe ko sérrope ha mokõi ita ipévare askrivíta ndéve umi léi ameʼẽtava umi israelítape”. Moisés ojupi pe Sérro Sinaípe ha opyta upépe 40 día. Haʼe oĩ aja upépe, Jehová oskrivi umi mokõi ita ipévare umi 10 léi iñimportantevéva omeʼẽtava umi israelítape ha upéi omeʼẽ Moiséspe. Koʼã léipe oñehenói 10 mandamiénto.

Umi hénte ohechakuaávo Moisés hiʼaretereimaha pe sérrope, oimoʼã hikuái oheja reimaha chupekuéra. Upévare heʼi hikuái Aarónpe: “Roipota peteĩ oremoakã vaʼerã. Ejapo ñandéve peteĩ dios ñandegia hag̃ua”. Aarón heʼi chupekuéra: “Peguerupaite chéve la óro perekóva guive”. Upéi Aarón omboyku umi óro ojeguerúva chupe, ojapo chugui peteĩ vaka raʼy raʼanga ha umi hénte heʼi joa: “Kóva hína pe dios ñaneguenohẽ vaʼekue Egíptogui”. Upéi ojapo hikuái peteĩ fiésta ha oadora pe vaka raʼy raʼanga. ¡Ajépa ivaiete la ojapóva hikuái! Haʼekuéra opromete kuri oadorataha Jehovápe añoite, péro nokumplíri hikuái ipalávra.

Jehová ohecha la oikóva ha heʼi Moiséspe: “Pyaʼéke eguejy pórke umi israelita ojapo hína peteĩ mbaʼe ivaietereíva. Haʼekuéra oadora hína peteĩ dios fálsope”. Moisés pyaʼe porã oguejy pe sérrogui ha ogueru ipópe umi mokõi ita orekóva Ñandejára Léi.

Moisés og̃uahẽvo umi israelita rendápe, otopa opurahéi joa hína hikuái, ojeroky ha oadora hína pe vaka raʼy raʼanga. Moisés ipochyeterei ha upévare ojapete yvýre umi mokõi ita orekóva umi léi ha ijakuʼipaite. Ensegída voi haʼe oho ohundi pe vaka raʼy raʼanga ha upéi oporandu Aarónpe: “¿Mbaʼe mbaʼéiko heʼi ndéve koʼã hénte ajeve rejapo ko mbaʼe vaiete?”. Aarón heʼi chupe: “Anína ndepochy chendive. Ndéko reikuaa porã mbaʼéichapa hikuái. Haʼekuéra ojerure chéve ajapo hag̃ua chupekuéra peteĩ dios, upévare amboyku pe óro oguerúva chéve hikuái ha ajapo chugui peteĩ vaka raʼy raʼanga”. ¡Ajépa ivaiete la Aarón ojapo vaʼekue! Upéi Moisés ojupi jey pe sérrope ha ojerure asy Jehovápe operdona hag̃ua pe puévlope.

Jehová operdona umi israelita iñeʼẽrenduse vaʼekuépe chupe. ¿Rehechakuaápa mbaʼérepa iñimportánte vaʼekue umi israelita iñeʼẽrendu avei Moiséspe?