Oñeporandúva jepi
Jehová ningo ndoipotái ñamombaʼeguasu taʼanga, mbaʼérepa upéicharõ ndokastigairakaʼe Aarónpe ojapo haguére pe tororaʼy raʼanga?
Éxodo kapítulo 32-pe omombeʼu Aarón ojapo hague peteĩ tororaʼy raʼanga de óro ha upéicha naiñeʼẽrendúi Jehovápe. Ñandejára léipe heʼi voi ndovaleiha ñamombaʼeguasu taʼanga (Éxo. 20:3-5). Upévare ‘Jehová ipochyeterei Aarón ndive ha ojukase voi chupe’. Péro Moisés oñeʼẽ iñermáno Aarón rehehápe (Deu. 9:19, 20). Péicha oñekumpli Ñandejára Ñeʼẽme heʼíva: ‘Pe ñemboʼe osẽva pe imarangatúva pyʼaite guive tuicha ipuʼaka’ (Sant. 5:16). Jahechaháicha Moisés oñemboʼe rupi Aarónpe rehehápe Jehová ndokastigái chupe. Péro amalisia oĩve mokõi mbaʼére Jehová ndokastigái hague chupe.
Primero, Aarón ohechaukavaʼekue iñeʼẽrenduetereiha Jehovápe ha upéinte ou ojapo upe mbaʼe vaiete. Pór ehémplo, Jehová heʼírõ guare Moiséspe oho hag̃ua faraón rendápe ha oguenohẽ umi Israelguápe Egíptogui, omondo Aarónpe ikatu hag̃uáicha omoirũ Moiséspe ha oñeʼẽ ivése (Éxo. 4:10-16). Mokõivéva ojapo Jehová heʼihaichaite ha heta vése oho hikuái pe faraón rendápe. Péro pe faraón ipyʼahatãiterei ha otrata vai chupekuéra. Ha péicha jahecha Aarón osẽrõ guare Egíptogui ohechaukáma hague akóinte ojepytaso mbareteha Jehová ykére (Éxo. 4:21).
Segundo katu jahechakuaavaʼerã mbaʼérõ guarépa ojapo pe tororaʼy raʼanga. Upérõ ningo Moisés cuarenta díama oĩ pe mónte Sinaípe. Ha ‘umi Israelgua ohechávo Moisés ndoguejyveiha pe montáñagui’ ojopy Aarónpe ojapo hag̃ua peteĩ taʼanga ha amo ipahápe haʼe ojapo (Éxo. 32:1-6). Péro Aarón ojapóva upe rire ohechauka ndogustaiha chupe umi hetãygua omombaʼeguasu pe taʼanga. Ha ojekuaa hese ojejopýgui chupénte ojapo hague. Moisés oporandúrõ guare mávapa oñemoĩta Jehová ykére, omoirũ chupe Leví raʼykuéra ha umíva apytépe Aarón. Péro umi oñepyrũvaʼekue opuʼã Jehováre katu oñehundipaite: tres mil isrraelíta voi omano (Éxo. 32:25-29).
Tiémpo rire Moisés heʼi umi Israelguápe ‘ivaieterei hague hembiapokue’ (Éxo. 32:30). Upéicharõ ndahaʼéi Aarón añónte hembiapo vai vaʼekue. Péro Jehová imbaʼeporãiterei rupi operdona Aarónpe ha umi Israelguápe.
Upe rire Jehová heʼi Moiséspe omoĩ hag̃ua Aarónpe saserdóte guasúramo, heʼi chupe: ‘Remonde Aarón rehe saserdóte guasu ao ha remona hese aséite oiko hag̃ua che saserdóteramo’ (Éxo. 40: 12, 13). Jahechaháicha Jehová operdona Aarónpe hembiapo vaikue pórke haʼe akóinte odefendéva Jehovápe, ha ndahaʼéi peteĩ tapicha omombaʼeguasuséva taʼanga.