LEKSIÓN 02
La Biblia omeʼẽ ñandéve esperánsa
Oparupiete ko múndope umi hénte oreko heta provléma. Upévare oĩ oñembyasýva, ojepyʼapýva ha osufríva. ¿Reñeñandúmapa nde avei upéicha? Ikatu oime koʼag̃aite voi resufri nderasykatu rupi térã omano rupi peteĩ rehayhúva. ¿Ikatúnepa oñesolusiona koʼã mbaʼe? La Bíbliape oñembohovái upéva upe porandu.
1. ¿Mbaʼeichagua esperánsapa omeʼẽ ñandéve la Biblia?
La Biblia ningo ndahaʼéi heʼínteva mbaʼérepa oĩ hetaite provléma ko múndope, síno omombeʼu avei ñandéve umíva koʼẽrõitéma opataha. Heʼi voi katu: “Péicha perekóta esperánsa ha peneraʼarõta heta mbaʼe porã” (elee Jeremías 29:11, 12). Jaikuaávo koʼã promésa iporãitéva ñanepytyvõ ñambohovái hag̃ua ñane provlemakuéra, ñandepositívo hag̃ua ha javyʼa hag̃ua pára siémpre.
2. ¿Mbaʼépa heʼi la Biblia oikotaha koʼẽrõite?
La Biblia heʼi koʼẽrõitéma ndaiporiveitamaha “omanóva, oñelamentáva, hasẽva ni hasýva” (elee Apocalipsis 21:4). Koʼág̃arupi ningo oĩ hetaiterei imboriahúva, oĩ inhustísia, mbaʼasy ha omanóva. Upévare heta hénte nohaʼarõvéima mbaʼeve iporãva ha operdéma la esperánsa. Péro entéro koʼã mbaʼe opátama pára siémpre. La Biblia opromete yvyporakuéra oikotaha peteĩ paraísope ko yvy ape ári opa ára g̃uarã.
3. ¿Mbaʼépa nepytyvõta reĩ hag̃ua segúro Ñandejára okumplitaha umi promésa oĩva la Bíbliape?
Hetaiterei persónape ningo hiʼãiterei okambia ko múndo, péro haʼekuéra ndaikatúi oasegura oikotaha upéva. Umi promésa oĩva la Bíbliape katu idiferénte pórke katuete oñekumplíta. Ha ñamombarete hag̃ua ñane konfiánsa la Bíbliare tekotevẽ ‘ñahesaʼỹijo porã Ñandejára Ñeʼẽ’ (Hechos 17:11). Amáske restudia la Biblia, ndete ikatúta redesidi rejeroviátapa umi promésa oĩvare pype.
EJEPYʼAMONGETAMÍNA
Jahechami mbaʼéichapa jaikóta oñekumpli vove umi promésa oĩva la Bíbliape. Ha jahecháta avei mbaʼéichapa pe esperánsa omeʼẽva oipytyvõ koʼág̃ama voi heta héntepe.
4. La Biblia opromete ikatuha jaiko vyʼápe pára siémpre ko yvy ape ári
Emañamína pe lístape umi promésa porãite jatopáva la Bíbliape. ¿Mavaitévapa ndegustave? ¿Mbaʼérepa?
Elee umi téxto oĩva káda promésa ykére ha upéi ekontesta koʼã porandu:
¿Omeʼẽpa ndéve esperánsa umi promésa oĩva koʼã téxtope? ¿Ikatúpa oipytyvõ avei ne famíliape ha ne amigokuérape?
Eñeimahinamína mbaʼéichapa jaikóta pe paraísope ko yvy ape ári:
NDAIPORIMOʼÃVÉIMA: |
ENTEROVE IKATÚTA: |
|---|---|
|
|
|
|
|
|
|
|
|
|
5. Pe esperánsa omeʼẽva la Biblia tuichaiterei ikatu ñanepytyvõ
Heta hénte oñedesanima térã ipochyeterei voi ohechávo ko múndo henyhẽha provlémagui. Algúno oñehaʼã voi ojapo ikatúva entéro okambiamie hag̃ua ko múndo. Ehechamína mbaʼéichapa umi promésa oĩva la Bíbliape oipytyvõma heta persónape koʼág̃ama voi. Ehecha pe VIDÉO, ha upéi erresponde koʼã porandu:
Según pe vidéo, ¿mbaʼépa oipyʼapy vaʼekue Rafíkape?
Ndopáiramo jepe pe inhustísia, ¿mbaʼéichapa la Biblia lomímonte oipytyvõ chupe?
Pe esperánsa omeʼẽva la Biblia ñanepytyvõ ñambohovái hag̃ua ñane provlemakuéra ha ñanepytyvõ ani hag̃ua ñañentrega. Elee Proverbios 17:22 ha Romanos 12:12, ha upéi erresponde koʼã porandu:
¿Ndépa ere umi promésa oĩva la Bíbliape ikatuha nepytyvõ avei ndéve koʼág̃ama voi? ¿Mbaʼérepa?
OĨRAMO HEʼÍVA: “No kréo la oñekumpli umi promésa oĩva la Bíbliape, umíva ningo peteĩ suéño reínte”.
¿Mbaʼépa nde ere, mbaʼérepa iñimportánte ndete rekomprova siértopa la Biblia heʼíva?
RRESÚMEN
La Biblia ningo opromete koʼẽrõitéma jaikotaha vyʼápe pára siémpre, ha upe esperánsa ñanepytyvõ koʼág̃ama voi ñambohovái hag̃ua umi ñane provlemakuéra.
Rrepáso
¿Mbaʼérepa umi hénte tekotevẽ oikuaa Ñandejára promesakuéra?
¿Mbaʼépa opromete la Biblia oikotaha koʼẽrõite?
¿Mbaʼéichapa pe esperánsa omeʼẽva la Biblia ikatu nepytyvõ koʼág̃ama voi?
EINVESTIGA HAG̃UA
Ehecha mbaʼéichapa pe esperánsa ikatu nepytyvõ embohovái hag̃ua umi ne provlemakuéra.
“Pe esperánsa: ¿añete piko ikatu ñanepytyvõ?” (¡Despertad! 22 de abril de 2004)
Ehecha mbaʼéichapa pe esperánsa omeʼẽva la Biblia ikatu oipytyvõ umi oaguantávape peteĩ mbaʼasy heta tiémporema.
“¿Ikatúpa la Biblia ñanepytyvõ ñanderasykatúramo?” (Artíkulo oĩva jw-pe)
Ehechávo pe vidéo musikál eñeimahinamína mbaʼéichapa reikóta vyʼápe ne famíliandi oñekumpli vove Ñandejára promésa.
Ehechamína mbaʼéichapa umi promésa oĩva la Bíbliape oipytyvõ peteĩ karaípe okambiaite hag̃ua opensa lája.
“Napensavéima tekotevẽha che akambia ko múndo” (Ñemañaha 1 de julio de 2013)