Japorohayhu ningo Jesucristo ñanderayhu rupi

‘Jesús ohayhuvaʼekue umi chupe omoĩrũvape ko yvy ári, ha péicha ohayhu chupekuéra ipahaite peve.’ (JUAN 13:1.)

1, 2. a) Mbaʼérepa jaʼe Jesús ñanderayhuetereiha? b) Mbaʼépa jahecháta ko artíkulope?

JESÚS ningo ehémplo ñandéve japorohayhu hag̃ua. Haʼe opa mbaʼe ojapo, heʼi ha omboʼevaʼekuére ohechauka ñanderayhuetereiha. Hekove jepe omeʼẽ ñanderehehápe. Jesús ningo omano meve otrata porã hemimboʼekuérape ha opavavépe avei.

² Pe ehémplo Jesús omoĩva ñandéve ningo ndaijojahái. Upéva ñanemomýi jahayhu hag̃ua ñane ermanokuérape ha ambue ñande rapichápe. Ko artíkulope jahecháta mbaʼéichapa umi ansiáno ikatu osegi Jesús ehémplo ha otrata porã umi ermáno ofalla vaívape jepe. Jahecháta avei mbaʼéichapa Jesús ñanderayhu rupi, ñanemokyreʼỹ ñaipytyvõ hag̃ua umi ermáno ombohováivape heta mbaʼe vai, hasykatúvape ha umi ama guasu térã yvytu atã rapykuerépe ohasa asývape.

3. Mbaʼéichapa Jesús otrata Pédrope ofalla vaíramo jepe?

³ Pe pyhare Jesús omano mboyvemi ningo apóstol Pedro onega chupe tres vése (Mar. 14:​66-72). Péro upéva oiko mboyve, Jesús heʼíma Pedro ombyasytaha ojapovaʼekue. Upeichaite ojapo rire Pedro, Jesús operdona chupe, ha upéi katu omeʼẽ chupe heta hembiaporã iñimportánteva (Luc. 22:32; Hech. 2:14; 8:​14-17; 10:​44, 45). Mbaʼépa ñaaprende jahechávo mbaʼéichapa Jesús otrata peteĩ ofalla vai vaʼekuépe?

Japorotratákena Jesús otrata haguéicha umi ojavyvaʼekuépe

4. Mbaʼe situasiónpepa tekotevẽ japorotrata Jesucrístoicha?

⁴ Heta situasiónpe ningo tekotevẽ japorotrata Jesucrístoicha. Péro ijetuʼueterei upéva peteĩ ñande rogaygua térã peteĩ ermáno jahayhúva ofalla vaíramo. Ñambyasýramo jepe, hiʼag̃ui ag̃uivévo oñehundi hag̃ua ko múndo aña, hetápe ogueraha hapykuéri. Tahaʼe peteĩ ermáno imitãva térã itujáva ikatu ndahekopotĩsevéi ha opuʼã voi Ñandejárare. Ha upévare avei ikatu ndoguatasevéima Ñandejára rapére. Yma ningo oĩvaʼekue umi kristiáno ypykue apytépe oñemosẽva kongregasióngui ha ambuépe katu tekotevẽvaʼekue ojekorrehi. Koʼág̃a rupi upeichaite avei ojejapo (1 Cor. 5:​11-13; 1 Tim. 5:20). Péro umi ansiáno mborayhúpe ojapóramo koʼã mbaʼe, ikatu hína oipytyvõ pe ermáno ojavyvaʼekuépe.

5. Mbaʼéichapa umi ansiáno ikatu Jesucrístoicha otrata umi ofallávape?

⁵ Jesucrístoicha ningo umi ansiáno odefendevaʼerã opa árape Ñandejára heʼíva. Upearã haʼéicha avei ipyʼaporã, imbaʼeporã ha ohayhuvaʼerã Jehovápe. Peteĩ ermáno ‘ohasa asy ha oñembyasýramo’ ofalla vai haguére, ndahasyivéta umi ansiánope ‘oipytyvõ hag̃ua chupe pyʼaporãme’ (Sal. 34:18; Gál. 6:1). Péro mbaʼépa ojejapóta pe ofallavaʼekue irrevélde ha noñembyasýiramo?

6. Mbaʼépa ndojapoivaʼerã umi ansiáno, ha mbaʼérepa?

⁶ Umi ansiáno ha ambue ermáno ningo ikatu ipochy pe ofalláva nohenduséiramo umi konsého Ñandejára Ñeʼẽme oĩva térã ombojasénteramo ótrore hembiapo vaikue. Ha umi ansiáno oikuaa rupi pe ofalláva oporoperhudika vaieterei hague, ikatu voi ohechaukase chupe ipochyha hendive. Péro haʼekuéra ndojapoivaʼerã upéicha, pórke ipochýramo avavépe noipytyvõmoʼãi hikuái ha ndosegimoʼãi Jesucristo ehémplo (1 Cor. 2:16; jaleemína Santiago 1:​19, 20). Heta vése ningo Jesús heʼivaʼekue derechoite la opensáva, péro ndojapói upéva iñañágui térã omoñeñandu vai hag̃ua hapichápe (1 Ped. 2:23). Ojapo uvei ohechauka hag̃ua ikatuha oĩ porã jey Jehová ndive umi ombyasýva hembiapo vai hague. Jesús ningo ouvaʼekue voi ko yvy ape ári ‘osalva hag̃ua hembiapo vaívape’ (1 Tim. 1:15).

7, 8. Mbaʼéichapa umi ansiáno otratavaʼerã umi ofallávape?

⁷ Jesús ehémplo ñanepytyvõ jaikuaa hag̃ua mbaʼéichapa jatratavaʼerã umi ermáno ojekorrehivaʼekuépe. Haʼe ningo ñanepytyvõ jahechakuaa hag̃ua ojekorrehiha peteĩ ermánope oñeñangareko hag̃ua kongregasiónre ha pe ofalláva ojevy hag̃ua hembiapo vaígui (2 Cor. 2:​6-8). Ñambyasy ningo oĩ jave oñemosẽva kongregasióngui ndojevýi rupi hembiapo vaikuégui. Péro ñandepyʼaguapy jaikuaávo oĩha heta umíva apytégui oñemboja jeýva Jehováre. Ha umi ansiáno oñehaʼãramo otrata Jesús otrata haguéicha peteĩ ofallávape, ikatu hína upe rire haʼe ombyasy hembiapo vai hague ha oho jey kongregasiónpe. Pe ofalláva ikatu hesarái umi konsého omeʼẽvaʼekuégui chupe umi ansiáno, péro ndahesaraichéne mborayhúpe otrata hague chupe.

⁸ Ivaivéramo jepe la situasión, umi ansiáno ohechaukavaʼerã orekoha Ñandejára espíritu sánto ha upéicha mborayhúpe oporotrata (Gál. 5:​22, 23). Ndahaʼeivaʼerã omosẽsénteva hikuái kongregasióngui pe hembiapo vaívape. Upéva rangue, ohechaukavaʼerã añetehápe oipytyvõseha chupe. Ha umíva ojevývo hembiapo vaikuégui, katuete oagradeséta Jehovápe ha umi ansiánope oipytyvõ haguére chupe ou jey hag̃ua kongregasiónpe (Efe. 4:​8, 11, 12).

Jajoayhuvaʼerã ko ára pahápe

9. Emombeʼumi mbaʼépa Jesús ojapovaʼekue avei oporohayhúgui.

⁹ Pe lívro de Lucas omombeʼu avei mbaʼe mbaʼépa Jesús ojapo oporohayhúgui. Haʼe oikuaavaʼekue pe Roma ehérsito omongorataha Jerusalén ha umi oikóva upépe ndaikatumoʼãiha osẽ upégui. Upévare heʼi hemimboʼekuérape: ‘Pehechávo Jerusalén omongora umi ehérsito, peikuaáke koʼẽrõitéma oñehunditaha’. Mbaʼépa ojapovaʼerã hikuái upéicha oiko vove? Jesús ningo heʼi porã vaʼekue voi: ‘Umi Judéape oikóva pyaʼéke toho tokañy umi montáñape. Ha umi oĩva ñúme, ani oho jey upépe. Umi árape oikóta rupi pe jehasa asy ha oikopaitéta upe ojehai haguéicha’ (Luc. 21:​20-22). Roma ehérsito omongora Jerusalén áño 66-pe ha umi Jesús remimboʼe iñeʼẽrendúva ojapo Imboʼehára heʼi hagueichaite.

10, 11. Mbaʼe ehémplopa oheja ñandéve umi osẽvaʼekue Jerusaléngui?

¹⁰ Umi kristiáno osẽnguévo Jerusaléngui tekotevẽ vaʼekue ojotrata porã hikuái. Ha Jesús ohayhu haguéicha chupekuéra ojoahayhuvaʼerã hikuái ha ombojaʼo hapichakuérape la orekomíva. Péro upérõ noñekumplipái gueteri Jesús heʼivaʼekue. Haʼe heʼi voi: “Upe árape tuicha ojehasa asy vaʼerã, ndoikói gueteriháicha ára ñepyrũmby guive, ha ndoikoveimavaʼerã upeichagua arakaʼeve” (Mat. 24:​17, 18, 21, JMP). Oñepyrũ mboyve ‘pe jehasa asy guasu’ ha oiko jave avei ikatu hína ñande jahasa heta mbaʼe vai. Ha tuicha ñanepytyvõta jaikóramo Jesucristo oiko haguéicha.

¹¹ Upe tiémpope avei tekotevẽta jasegi Jesús ehémplo ha mborayhúpe ñañangareko ñane ermanokuérare. Apóstol Pablo heʼi voi: ‘Opavave ñande, jajapovaʼerã iporãva ñande rapichakuérare ha upéicha ñañomombareteve hag̃ua. Jesucristo niko ndohekaivaʼekue iporãva ijupe g̃uarãnte. Upéicha avei Ñandejára pe omeʼẽva tekombarete ha pyʼaguapy, tapenepytyvõ peiko hag̃ua Jesucristo oiko haguéicha’ (Rom. 15:​2, 3, 5).

12. Mbaʼéichapa jajoayhuvaʼerã ha mbaʼérepa?

¹² Jesús ningo ohayhuvaʼekue avei Pédrope. Upévare ko apóstol heʼi kristianokuérape ‘ojoayhu hag̃ua tovamokõiʼỹre ha iñeʼẽrendu hag̃ua Ñandejára Ñeʼẽme’. Upéicharõ haʼekuéra ‘ojoayhuvaʼerã ipyʼaite guive’ (1 Ped. 1:​22, BNP). Koʼág̃a rupi tekotevẽvéntema jahayhu upéicha ñane ermanokuérape, pórke opáicha rei ojejopyhína Ñandejára siervokuérape. Ndovaléi avei jajerovia ko múndo oñehundipotaitémavare, jahechaháicha mbaʼeve iporãva ndoguerúi, krísimante oĩ (jaleemína 1 Juan 2:​15-17). Og̃uahẽmbotaitéma ningo pe fín, upévare ñañemoʼag̃uivevaʼerã Jehováre ha ñane ermanokuérare, ha jajoayhu oñoamigoitéicha. Apóstol Pablo heʼivaʼekue voi: ‘Pejoayhúke añetehápe . Pejoayhu oñopehẽnguéicha, peñombojerovia ha peñomombaʼe’ (Rom. 12:10). Ha apóstol Pedro heʼi avei: “Opa mbaʼe mboyve toĩ mborayhu tuicháva pende apytépe. Pe mborayhúko heta tembiapo vaikue oheja rei hína” (1 Ped. 4:8).

13-15. Mbaʼéichapa ermanokuéra ohechauka ojoayhuha oiko jave sarambi?

¹³ Opárupi ojekuaa testigos de Jehová oporohayhúgui ojapoha heta mbaʼe hapichakuéra rehehápe. Pór ehémplo, upe 2005-pe ou peteĩ yvytu atã ha sarambi ojapo Estados Unídospe. Upérõ heta Testígo oho oipytyvõ umi oikotevẽvape. Jaʼekuaa Jesús ehémplo omomýi hague veinte mil testígope oporopytyvõ hag̃ua. Heta oĩ ohejavaʼekue hóga ha itraváho jepe oho hag̃ua oipytyvõ iñermanokuérape.

¹⁴ Peteĩ lugárpe ningo yvytu atã ombopochy pe már ha umi oláda 10 métro ha mbaʼe ijyvate. Upéicha rupi 80 kilometrohápe jepe upégui ojagarrapa y. Ha hetaiterei óga oitypa avei pe yvytu atã ouvaʼekue. Upévare umi ermáno heta tetãgui oho oipytyvõ hag̃ua chupekuéra. Mokõi testigo de Jehová oñoermánava ha viúdava, ojeprepara ha oho hikuái peteĩ kamionétape pe sarambi oiko haguépe, opytáva 3.000 kilómetro upégui. Peteĩva ningo opyta oiko upépe, oservi de precursora regular ha osegi oipytyvõ ermanokuérape oiko jave peichagua sarambi.

¹⁵ Upépe cinco mil seiscientos ógama oñemyatyrõ ha oñemopuʼã jey, tahaʼe ermáno térã ambue tapicha róga. Ha mbaʼépa heʼi umi ermáno oñepytyvõ haguére chupekuéra? Peteĩ ermána hoʼapavaʼekue chugui hóga ova peteĩ kása rrodanteʼípe, la itécho otykypa ha ndoikói ni la ikosína. Ha umi ermáno omopuʼã chupe hogarã michĩ ha iporãva, upéi hasẽ anga oñemeʼẽrõ guare chupe. Oagradeseterei upévare Jehovápe ha iñermanokuérape! Heta Testígo ningo opyta avei un áño rasa oiko ótro hendápe oñemopuʼã jeýmaramo jepe hogakuéra. Mbaʼérepa ndováima hikuái? Ikatu hag̃uáicha opyta upépe omohuʼã meve hembiapo umi ermáno ouvaʼekue oporopytyvõ hag̃ua. Aje piko imbaʼeporãite koʼã ermáno! Haʼekuéra ningo oñehaʼã oiko Jesús oiko haguéicha.

Jaiporiahuverekókena umi hasývape Jesús ojapo haguéicha

16, 17. Mbaʼépa ikatu jajapo umi hasýva rehehápe?

¹⁶ Pe yvytu atã térã ama guasu ningo ndahaʼéi enterovégui oitypáva hóga, péro pe mbaʼasy enterovépe ñanderupyty. Yma ningo Jesús imbaʼeporãiterei umi hasýva ndive ha upéicha omoĩ ehémplo ñandéve. Haʼe ningo oiporiahuvereko umi hasývape ojeguerúrõ guare hendápe ha ‘omonguera enterovépe’ (Mat. 8:16; 14:14).

¹⁷ Jaikuaa ningo ñande ndaikatuiha ñamonguera umi hasývape Jesús ojapo haguéicha, péro ikatu jaiporiahuvereko ha jatrata porã chupekuéra. Pór ehémplo, oĩramo ermáno hasýva kongregasiónpe umi ansiáno ohecha mbaʼéichapa ikatu oñepytyvõ chupe. Upéicha osegihína Jesús ehémplo ha ojapo heʼíva Mateo 25:​39, 40.a (Jaleemína.)

18. Mbaʼéichapa mokõi ermána ohechauka ohayhuha peteĩ ermána hasývape, ha mbaʼépa oiko upévare?

¹⁸ Enterove ningo ikatu ñaipytyvõ umi oikotevẽvape, ndahaʼéi umi ansiánonte. Jahechamína oikovaʼekue ermána Charlene rehe. Haʼe ningo oreko 44 áño ha ikánser, umi doktór heʼi voi diez díantema oikovetaha. Ha mokõi ermána, Sharon ha Nicolette ohechakuaa mbaʼeichaitépa ijetuʼu iménape oñangareko hag̃ua hese. Upémaramo heʼi hikuái ohoseha oñangareko Charlene rehe ára ha pyhare omano meve. Péro ndahaʼéi diez díante síno seis semána oho oiko heseve hikuái. Ijetuʼúramo jepe, umi mokõi ermána ohechauka mbaʼeichaitépa ohayhu iñermanokuérape. Sharon heʼi: “Roikuaa ningo Charlene ndorrekuperaveimaha ha rombyasyeterei upéva, péro Jehová oremombarete roaguanta hag̃ua. Upe tiémpo rohasavaʼekue ko ermánandi oremoag̃uive Jehováre ha ore avei rojokuaa porãve”. Charlene ména katu heʼi: “Arakaʼeve ndacheresaraimoʼãi mbaʼeichaitépa umi mokõi ermána orepytyvõ ha imbaʼeporã orendive. Ore ningo rohechakuaa oñehaʼã ha ikyreʼỹha hikuái. Upéicha rupi tuicha oipytyvõ Charlénepe ogueropuʼaka hag̃ua imbaʼasy omano meve ha chéve avei ikatu hag̃uáicha apytuʼumi ha agueropuʼaka upe situasión. Akóinte aagradeséta chupekuéra upévare. Umi ermána ningo naikaneʼõi oñangareko hag̃ua orerehe ha upéva omombareteve che jerovia Jehováre ha chemoag̃uive ermanokuérare”.

19, 20. a) Mbaʼépa jahechákuri koʼã mbohapy artíkulope? b) Mbaʼépa nde rejapóta koʼág̃a?

¹⁹ Koʼã mbohapy artíkulope jahechákuri mbaʼéichapa Jesús oikovaʼekue ha mbaʼépa ojapo. Jahecha avei mbaʼéichapa ikatu ñapensa ha jajapo opa mbaʼe haʼéicha. Ñañehaʼãkena ‘ñaneumílde ha ñandepyʼaporã’ Jesucrístoicha (Mat. 11:29). Ñañehaʼã avei ñanembaʼeporã ñande rapichakuéra ndive, iñimperféktoramo jepe hikuái. Ñandepyʼaguasu ha ñaneñeʼẽrendúkena Jehovápe ijetuʼúramo jepe.

²⁰ Iporã avei jahayhu ermanokuérape Jesucristo ohayhu haguéicha hemimboʼekuérape ‘ipahaite peve’. Upéva ningo ohechaukáta ñande kristianoiteha (Juan 13:​1, 34, 35). Upévare ‘jajoayhúkena oñopehẽnguéicha’ (Heb. 13:1). Jajedesidíkena ñamombaʼeguasu hag̃ua Ñandejárape ha ñaipytyvõ ñande rapichakuérape. Jehová ningo katuete ovendesíta opa mbaʼe ñañehaʼãva jajapo.

[Nóta]

Embohovaimína koʼã porandu

• Mbaʼéichapa umi ansiáno ikatu ohechauka otrataha Jesús otrata haguéicha umi ofallávape?

• Mbaʼérepa tekotevẽ jajoayhu ko ára pahápe Jesús ñanderayhu haguéicha?

• Mbaʼéichapa jahechaukáta jaiporiahuverekoha umi hasývape Jesús ojapo haguéicha?

[Nóta oĩva taʼanga ndive páhina 17]

Ansianokuéra ningo oipota umi ofallavaʼekue oñemoag̃ui jey Jehováre

[Nóta oĩva taʼanga ndive páhina 18]

Umi kristiáno osẽnguévo Jerusaléngui ohechauka ojoahayhuha Jesús ohayhu haguéicha chupekuéra

[Nóta oĩva taʼanga ndive páhina 19]

Opárupi ojekuaa testigos de Jehová oporohayhúgui ojapoha heta mbaʼe hapichakuéra rehehápe