Ndetépa reiporavovaʼerã mbaʼe rrelihiónpa resegíta?

POLÓNIAPE ningo heta oĩ heʼíva jepi testigos de Jehovápe: “Ko rrelihiónpe che anasevaʼekue ha kóvape jey amanovaʼerã”. Oimevaʼerã nde rehendúmava ojeʼévo upéva. Mbaʼéicha rupi piko heta oĩ opensáva upéicha? Oimoʼãgui pe rrelihión isy ha itúva omboʼevaʼekue chupénte osegivaʼerãha. Ikatúpa oiko avei péicha testigos de Jehová familiakuérare?

Yma ningo Timoteo rehe ndoikoivaʼekue upéicha. Chupéngo isy ha ijavuéla omboʼevaʼekue Ñandejára Ñeʼẽ ‘imitã guive’. Upévare ‘ojerovia añete’ Ñandejárare ha ohayhu chupe ipyʼaite guive (2 Tim. 1:5; 3:​14, 15). Timoteo ohechakuaa osegíramo Jesús pypore oguatataha Ñandejára rapére. Haʼe ningo omombaʼeterei isy ha ijavuéla omboʼevaʼekue chupe ha oñehaʼã oiko upéicha. Mbaʼépa upéicharõ ñaaprende Timotéogui? Jahechakuaa ñande sy ha ñande ru ñanepytyvõramo jepe jaservi hag̃ua Jehovápe, ñande voi jajaposevaʼerã upéva (Mar. 8:34).

Ñandete ningo jaikuaavaʼerã mbaʼérepa jaʼe pe rrelihión jasegivañaína haʼeha pe añeteguáva. Upéicharõmante jajerovia mbaretéta Jehováre ha jahayhúta chupe. Ha toiko la oikóva ñañehaʼãta ñaneñeʼẽrendu Chupe (Efe. 3:17; Col. 2:​6, 7).

Mbaʼépa ojapovaʼerã mitãkuña ha mitãrusukuéra?

Peteĩ mitãrusu hérava Albertoa ningo itúva ha isy testigos de Jehová ha michĩmi guive omboʼe chupe oguata hag̃ua Jehová rapére. Alberto heʼi: “Che ningo ajeroviaiterei testigos de Jehová omboʼeha Ñandejára Ñeʼẽ heʼíva péro ndaipotái avave heʼi chéve mbaʼéichapa aikovaʼerã”. Oiméramo nde avei reñeñandu upéicha, iporãta reñehaʼãmi reikuaa porãve mbaʼéichapa Ñandejára oipota reiko. Rejapóramo upéicha, ndahasyivéta ndéve rejapo hag̃ua hembipota (Sal. 40:8). Alberto heʼi: “Peteĩ árape haʼe añepyrũtaha añemboʼe Ñandejárape. Ijetuʼu chéve ñepyrũrã, péro añehaʼãmbaite añemboʼe. Upe riremínte ahechakuaáma Jehová oguerohoryetereiha añehaʼãramo ajapo porã opa mbaʼe. Ha upéva chepytyvõ akambia hag̃ua heta mbaʼépe”. Nde reñehaʼãramo reñemoag̃uive Jehováre, rejaposéta avei hembipota (Sal. 25:14; Sant. 4:8).

Epensamíntena sapyʼaite pe partído rehe térã peteĩ depórte ndegustávare. Oiméne nde reikuaa porã káda huégo orekoha mbaʼéichapa jahugavaʼerã, ajépa? Péro mbaʼépa oikóta nde ndereikuaaporãiramo mbaʼéichapa rehugavaʼerã? Katuete ningo ndaigustomoʼãi ndéve ha nderehugasemoʼãi voi, ajépa? Péro reikuaa porãramo mbaʼéichapa rehugavaʼerã ha reñensaja meme, katuete revyʼáta ha rehugaséta voi. Upeichaiténte avei oiko jaservívo Ñandejárape. Mbaʼépa ikatu rejapo revyʼave hag̃ua reservívo Ñandejárape? Ikatu rejeprepara porã umi rreunionrã ha eñehaʼã rekomenta. Nemitãramo jepe ikatuhína remokyreʼỹ ha remoĩ ehémplo porã ambue nde rapichakuérape (Heb. 10:​24, 25).

Upéicha vaʼerã avei repredikáta jave. Ko tembiapo rejapovaʼerã rehayhúgui Jehovápe ha nde rapichakuérape, ndahaʼéi ojeʼéguinte ndéve. Upévare iporã reñeporandumi: “Mbaʼérepa añeʼẽse che rapichakuérape Jehováre? Mbaʼérepa ahayhu Ñandejárape?”. Eñehaʼãkena rehechakuaa ñande Ru Jehová ñanderayhuetereiha. Jeremías rupive ningo Haʼe heʼivaʼekue: ‘Peẽ cherekáta ha chejuhúta, cherekáta rupi pende pyʼaite guive’ (Jer. 29:​13, 14). Mbaʼépa jajapovaʼerã jaheka hag̃ua Jehovápe péicha? Jakub heʼi: “Che ningo tekotevẽvaʼekue tuicha akambia. Chemitã guive ningo aháva rreunionhápe ha asẽ apredika, péro ajepokuaágui reínte ajapóva koʼã mbaʼe. Upévare tekotevẽvaʼekue aikuaave Jehovápe ha aiko iñamígoramo ikatu hag̃uáicha aservi chupe che korasõite guive”.

Nde revyʼa ha nekyreʼỹ hag̃ua predikasiónpe, ehekavaʼerã ne amigorã umi kyreʼỹme oservíva Jehovápe. Ñandejára Ñeʼẽ ningo heʼi voi: “Ne aranduséramo, eiko iñarandúva ndive” (Pro. 13:20). Ehekákena ne amigorã umi oñehaʼãva koʼẽ koʼẽre oservi porãve Jehovápe. Peteĩ ermána hérava Jola heʼi: “Che ningo ajeheʼa umi mitãrusu ha mitãkuña oservívare ipyʼaite guive Ñandejárape ha upéva chemokyreʼỹeterei. Upéicha rupi asẽ meme predikasiónpe ha avyʼaiterei”.

Mbaʼépa ojapovaʼerã sy ha túva

Jola heʼi: “Aagradeseterei ningo che sy ha che rúpe chepytyvõ haguére aservi hag̃ua Jehovápe”. Añetehápe ningo tuvakuéra tuichaiterei oipytyvõkuaa ifamíliape ojapo hag̃ua umi mbaʼe iporãva. Apóstol Pablo heʼivaʼekue voi: ‘Peẽ tuvakuéra, pemongakuaa ha pehekomboʼe pene famíliape Ñandejára oipotaháicha’ (Efe. 6:4). Péicha la Biblia ohechauka porã tuvakuéra omboʼevaʼerãha ifamíliape Jehová oipotaháicha ha ndahaʼéi haʼekuéra ogustaháichante. Ha iporãta avei omokyreʼỹramo ifamíliape ojapove hag̃ua umi mbaʼe Jehová oguerohorýva. Ha anítei omoinge chupe iñakãme ohupyty hag̃ua haʼekuéra ndaikatuivaʼekue ohupyty.

Peẽ sy ha túva, peñehaʼãvaʼerã pemboʼe pene famíliape Jehová heʼi haguéicha umi Israelguápe: ‘Che ñeʼẽre ehekomboʼe nde raʼykuérape, nemanduʼa hese manterei chupekuéra, nde rógape, tapére, reñenonguévo ha repuʼãnguévo’ (Deu. 6:​6, 7). Ewa ha Ryszard ningo mbohapy ifamília, ha haʼekuéra heʼi: “Ógape ningo pyʼỹinte roñemongetavaʼerã mbaʼeichaitépa iporã jaiporupaite ñane tiémpo Jehová servísiope. Upéicha rupi, michĩ reheve voi umi mitãkuimbaʼe ojeruréma oreko hag̃ua párte Eskuélape. Upéi oiko chuguikuéra puvlikadór ha amo gotyove katu ojevautisáma. Upe rire oiporupaite hikuái itiémpo Jehová servísiope”.

Péicha jahecha mbaʼeichaitépa oipytyvõ sy ha túva omoĩramo ehémplo ifamiliakuérape. Ryszard heʼi: ‘Che rembireko ha che ningo roʼe voi akóinte rojeporta porãtaha toroime roimehápe. Tahaʼe roime jave kongregasiónpe térã ore rógape”. Upévare iporã tuvakuéra oñeporandumi: “Mbaʼépa ohechahína che familiakuéra cherehe? Ohechakuaápa ahayhuha Jehovápe? Mbaʼépa ohechakuaa hikuái cherehe añemboʼe ha astudia jave cheañohápe? Mbaʼéichapa ahechaʼaína pe predikasión, umi vyʼarã ha pláta? Añeʼẽ porãpa ermanokuérare?” (Luc. 6:40). Penemanduʼákena pene família ojesarekoha penderehe mbaʼépa peje ha mbaʼépa pejapo.

Sy ha túva ningo oñemoñeʼẽvaʼerã avei ifamíliape. Ñandejára Ñeʼẽ ningo heʼi voi: “Mitãme ehechauka michĩ reheve haperã” (Pro. 22:6). Upéicha ojapo Ewa ha Ryszard, haʼekuéra heʼi: “Káda uno ndive rostudiavaʼekue la Biblia haʼeñohápe”. Sy ha túva ningo oikuaáta tekotevẽpa ojapo avei upéicha. Péro iporã ohechakuaa hikuái mbaʼépa oikotevẽ káda ifamília ikatu hag̃uáicha oipytyvõ chupekuéra. Tuvakuéra ningo imbaʼerechakuaa ha ndojopyetereirivaʼerã. Pór ehémplo, pejerangue pene famíliape opaichagua músika ivaiha, iporãvéta peipytyvõramo chupe la Biblia rupive haʼete voi ohechakuaa hag̃ua mbaʼeichaguápa ikatu ohendu.

Ikatu avei pepensa pene familiakuéra oikuaa porãha mbaʼépa peipota ojapo ha ojapo porãha voi. Upéicharõ jepe pesegivaʼerã peipytyvõ chupekuéra opa mbaʼe ojapóvape. Penemanduʼákena pe konsého heʼívare: ‘Ñande pyʼapypegua ningo ku y ipypukúvaicha, iñakã porãvamante oguenohẽkuaa’ (Pro. 20:5). Upéicharõ peñehaʼãkena pehechakuaa mbaʼépa oĩ pene família pyʼapýpe ha pehecháramo ojaposeha ivaíva, pyaʼe porã peipytyvõvaʼerã chupe. Peñeʼẽvaʼerã hendive ha peje chupe pejepyʼapyha hese. Peporandukuaantevaʼerã ani hag̃ua pembopochy chupe. Upéicharõmante haʼe ohechakuaáta pejepyʼapy añeteha hese ha ndahasyivéta avei peẽme peipytyvõ hag̃ua chupe.

Mbaʼéichapa ikatu oipytyvõ ermanokuéra?

Umi ermáno ningo ikatu oipytyvõ umi mitãkuña ha mitãrusúpe omombaʼe hag̃ua opa mbaʼe oikuaáva Ñandejára Ñeʼẽgui. Jaikuaa ningo tuvakuéra omboʼevaʼerãha ifamíliape, péro opavave puvlikadór ikatu oipytyvõ chupekuéra ha koʼýte umi ansiáno. Ha iporãvétantema ñaipytyvõramo umi isy térã itúvante testígovape.

Mbaʼépa ikatu ojapo umi ansiáno oipytyvõ hag̃ua umi mitãrusu ha mitãkuñáme ohayhuve hag̃ua avei Jehovápe? Mbaʼéichapa ikatu ohechauka hikuái omombaʼeha chupekuéra ha ideprovechoha kongregasiónpe? Peteĩ superintendénte oikóva Polóniape ha hérava Mariusz heʼi: “Ñande ansiáno ningo ñañeʼẽvaʼerã umi mitãrusu ha mitãkuña ndive. Ha ndahaʼéi iprovléma javénte hikuái, ñañehaʼãvaʼerã katu ñañemongeta hendivekuéra oimeha órante. Ikatu predikasiónpe, rreunión rire térã ñainvita chupekuéra oho hag̃ua hoʼu ñanendive kafe”. Peporandumivaʼerã avei umi mitãrusúpe mbaʼépa opensahína kongregasión rehe. Peñemongeta porãramo hendivekuéra peipytyvõtapeína chupekuéra oñembojave hag̃ua kongregasiónre ha oñeñandu porãve hag̃ua.

Oiméramo nde ansiáno, reñehaʼãpareína reikuaave umi mitãrusu ha mitãkuña ne kongregasiónpe oĩvape? Alberto ningo superintendéntema koʼág̃a, péro heta mbaʼe ohasavaʼekue imitãrusúpe. Haʼe heʼi: “Chemanduʼa peteĩ árape umi ansiáno oho chevisita, chemokyreʼỹ ha oñemoñeʼẽ hag̃ua chéve”. Ikatu ningo rehechauka avei rejepyʼapyha umi mitãkuña ha mitãrusúre reñemboʼévo hesekuéra ojerovia mbarete hag̃ua Ñandejárare (2 Tim. 1:3).

Iporã ningo avei rejerure umi mitãrusu ha mitãkuñáme nepytyvõ hag̃ua kongregasiónpe. Upéicharõ hasyvéta ko múndo ogueraha hag̃ua chupekuéra hapykuéri. Ikatu reinvita chupekuéra osẽ hag̃ua opredika nendive ha upéicha peiko hag̃ua oñoamígoramo. Ikatu avei peprepara pejapo hag̃ua ambue mbaʼe ha pehasa porã oñondivepa. Jola heʼi voi: “Peteĩ prekursóra oñemboja cherendápe ha chepytyvõ. Hendive añepyrũvaʼekue apredika aipytyvõségui che rapichakuérape ha ndahaʼéi ojeʼéguinte chéve ajapo hag̃ua”.

Ndete redesidivaʼerã

Nde mitãrusu ha mitãkuña, mbaʼépa repensa rejapóvo nde rekovépe? Oiméramo neʼĩra gueteri rejevautisa, repensámapa rejapo hag̃ua upéva? Péro aníkena nderesarái rejevautisavaʼerãha rehayhúgui Jehovápe ne korasõite guive ha ndahaʼéi ne hentekuéra heʼíguinte ndéve.

Nde ningo ikatu erekoreína Jehovápe ne amígoramo ha remombaʼetereíta avei Iñeʼẽ. Jehová heʼivaʼekue voi proféta Isaías rupive: “Ani rejepyʼapy, che hína nde Jára”. Jehová ningo oĩta nendive, nde rejepytaso aja entéro ijykére. Nemombaretéta, ‘nepytyvõ ha oñangarekóta nderehe ipuʼaka rupive’ (Isa. 41:​10, ÑÑB).

[Nóta]

[Nóta oĩva taʼanga ndive páhina 4]

Peñehaʼãkena pehechakuaa mbaʼépa oĩ pene família pyʼapýpe

[Nóta oĩva taʼanga ndive páhina 6]

Rejevautisavaʼerã rehayhúgui Jehovápe ne korasõite guive