Tuakuéra, ¿peipytyvõpa hína pene famíliape oprogresa ha ojevautisa hag̃ua?

1. ¿Mbaʼépa tuakuéra oipota ifamília ontende porã ojevautisa mboyve?

PETEĨ ermána hérava Blossom Brandt heʼi: “Unos kuánto mésere haʼe vaʼekue papa ha mamáme ajevautisasemaha, ha haʼekuéra oñemongetámi chendive upe témare. Oikuaa porãse hikuái ahechakuaápa hína iñimportantetereiha upe desisión. Upéi, ajevautisa el 31 de diciembre de 1934”. Koʼág̃arupi avei tuakuéra oipytyvõse ifamíliape odesidi porã hag̃ua opa mbaʼe. Haʼekuéra oikuaa ndovaleiha ojoko chupe oimérõ ojevautisaséma, pórke upéva ikatu odesanima ifamíliape (Sant. 4:17). Péro ojevautisa mboyve, tuakuéra ohecha raẽ vaʼerã añetehápepa ifamília oĩma preparádo oiko hag̃ua chugui Jesús disípulo.

2. a) ¿Mbaʼe provlémapa ohecha jepi umi superintendénte de sirkuíto? b) ¿Mbaʼépa jahecháta ko artíkulope?

² Heta superintendénte ojepyʼapy ohechávo oĩha heta mitãrusu ha mitãkuña michĩ guive oikuaámava pe añetegua, péro ndojevautisáiva gueteri. La majoría umíva apytégui oho rreunionhápe, osẽ predikasiónpe ha heʼi ijehe haʼeha testígo de Jehová. ¿Péro mbaʼérepa upéicharõ ndojedesidíri ojevautisa? Sapyʼánte ituakuéra voi heʼi chupekuéra ohaʼarõvénte hag̃ua. ¿Mbaʼérepa? Ko artíkulope jahecháta 4 mbaʼe ikatúva oipyʼapy tuakuérape ha upéva káusare oipotánte ifamília ohaʼarõve ojevautisa hag̃ua.

¿NOIMÉIPA IMITÃITEREI GUETERI OJEVAUTISÁMA HAG̃UA?

3. ¿Mbaʼépa oipyʼapy kuri Blossom tuakuérape?

³ Jahecha haguéicha, Blossom tuakuéra ojepyʼapy haʼe heʼírõ guare chupekuéra ojevautisaseha. Blossom ningo imitãiti kuri upérõ, ha ituakuéra oikuaase haʼépa ontendéma mbaʼépa heʼise pe vautísmo ha tuichaha upe rresponsavilida. ¿Mbaʼéichapa tuakuéra ikatu oikuaa oimépa ifamília oĩma preparádo oñemeʼẽ hag̃ua Jehovápe?

4. ¿Mbaʼéichapa ikatu oipytyvõ tuakuérape pe mandáto Jesús omeʼẽva Mateo 28:19 ha 20-pe?

⁴ (Elee Mateo 28:19, 20). Jahecha haguéicha pe ótro artíkulope, la Biblia nomoĩri peteĩ eda jajevautisa hag̃ua. Péro iporãta tuakuéra ojepyʼamongetáramo Mateo 28:19 heʼívare. Upépe Jesús omanda: “Pemboʼe umi hénte opa tetãyguápe oiko hag̃ua chuguikuéra che disípulo”. Upéva heʼise ñamboʼe vaʼerãha peteĩ persónape ikatu hag̃uáicha oiko chugui Jesús segidór. Pe palávra disípulo heʼise peteĩ persóna oaprende ha ontende porãha umi mbaʼe Jesús omboʼe vaʼekue ha iñeʼẽrenduseha chupe. Upéicharõ tuakuéra omboʼe vaʼerã ifamíliape imichĩete guive ikatu hag̃uáicha oñemeʼẽ Jehovápe ha oiko hag̃ua chugui Jesús disípulo. Jaikuaaháicha, peteĩ mitãraʼy ndaikatumoʼãi gueteri okumpli umi rrekisíto ojevautisa hag̃ua, péro la Biblia ohechauka porã umi mitã okakuaamiémava ikatumaha ontende ha omombaʼe Ñandejára Ñeʼẽ omboʼéva.

5, 6. a) ¿Mbaʼépa heʼi la Biblia Timotéore, ha mbaʼépa ñanemboʼe upéva pe vautísmogui? b) ¿Mbaʼépepa tuakuéra oipytyvõ vaʼerã ifamíliape?

⁵ Timoteo odesidi vaʼekue oservi Jehovápe imitãreheve. Apóstol Pablo heʼi Timoteo imitãite guive oñepyrũ hague oaprende pe añetegua oĩva Ñandejára Ñeʼẽme. Itúa ningo ndoservíri vaʼekue Jehovápe, péro isy ha ijavuéla oipytyvõ kuri chupe omombaʼe hag̃ua Ñandejára Ñeʼẽ. Upéicha rupi Timoteo ou ojeroviaiterei Jehováre (2 Tim. 1:5; 3:14, 15). Upéi haʼe orekórõ guare 20 áñorupi térã upe mboyvemi ja oĩma preparádo orresivi hag̃ua umi asignasión espesiál kongregasiónpe (Hech. 16:1-3).

⁶ Jaikuaaháicha, káda mitã idiferénte. Ndaikatúi jaʼe peteĩ edápe iñakãguapytamaha katuete hikuái. Oĩ umi mitã pyaʼe voi ontende porãva pe añetegua, iñakãguapýmava ha odesidi porãva heta mbaʼe, upévare ojevautisaséma voi. Oĩ katu otardamiéva oĩ hag̃ua preparádo ikatu hag̃uáicha ojevautisa. Umi sy ha túa iñarandúva ontende koʼã mbaʼe ha ndojopýi ifamíliape ojevautisa hag̃ua, upéva rangue oipytyvõ chupekuéra oprogresa hag̃ua ohóvo ojedesidi peve hikuái. Sy ha túa ovyʼa ifamília ojapo jave la heʼíva Proverbios 27:11 (elee). Péro haʼekuéra siémpre oreko vaʼerã enkuénta oipytyvõ vaʼerãha ifamíliape oiko hag̃ua chuguikuéra Jesús disípulo. Upévare, tuakuéra iporã oñeporandu: “¿Oikuaámapa che família la tekotevẽva ikatu hag̃uáicha oñemeʼẽ Ñandejárape ha ojevautisa?”.

¿OIKUAÁMAPA HETA MBAʼE LA BÍBLIAGUI?

7. ¿Tekotevẽpa umi mitã oikuaapaite entéro mbaʼe omboʼéva la Biblia ikatu hag̃uáicha ojevautisa? Emyesakã.

⁷ Tuakuéra ningo oñehaʼã omboʼe ifamíliape pe añetegua ha oipota ontende porã hikuái umíva. Haʼekuéra oikuaa umi mbaʼe oaprendéva oipytyvõtaha ifamíliape odesidi hag̃ua oñemeʼẽ Jehovápe. ¿Heʼisépa upéva umi mitã tekotevẽha oikuaapaite entéro mbaʼe omboʼéva la Biblia ikatu hag̃uáicha oñemeʼẽ Jehovápe ha ojevautisa? Nahániri. Umi persóna ojevautisáva ningo osegi vaʼerã oaprende heta mbaʼe la Bíbliagui (elee Colosenses 1:9, 10). ¿Mbaʼépa upéicharõ ñane família tekotevẽ oikuaa ikatu hag̃uáicha ojevautisa?

8, 9. ¿Mbaʼépa ñaaprende pe rreláto oñeʼẽvagui Pablo ha pe guárdia kársel rehe?

⁸ Tuakuérape tuichaiterei oipytyvõta oanalisáramo peteĩ família yma guare ehémplo (Hech. 16:25-33). Áño 50-rupi Pablo ovisita kuri Silas ndive Filipos, ojapórõ guare pe isegúndo viáhe kómo misionéro. Upérõ ojejagarra Pablo ha Sílaspe ha ojegueraha reiete chupekuéra préso. Péro upe pyharépe oiko peteĩ yvyryrýi, okuʼepaite pe kársel simiénto ha ojavripa umi kalavóso rokẽ. Pe guárdia kársel oimoʼã okañymbaha umi préso ha haimete ojesuisida. Péro Pablo ojoko chupe ani hag̃ua ojapo upéva. Upéi haʼe ha Silas opredika upe guárdia kársel ha ifamiliakuérape, ha omboʼe chupekuéra heta mbaʼe Jesúsgui. Koʼã persóna omombaʼeterei la oaprendéva, iñeʼẽrendu ha ensegída ojevautisa. ¿Mbaʼépa ñanemboʼe ko rreláto?

⁹ Ikatu oime pe guárdia kársel peteĩ soldádo romano ojerretiráma vaʼekue pe ehérsitogui, ha ndoikuaái mbaʼevete la Bíbliagui. Upévare, ojevautisa hag̃ua tekotevẽ vaʼekue oaprende raẽ unas kuánta kósa iñimportánteva omboʼéva Ñandejára Ñeʼẽ. Upéi oikuaa vaʼerã avei mbaʼépa Jehová ohaʼarõ isiervokuéragui ha oĩ vaʼerã dispuésto ojapóvo umi mbaʼe Jesús omboʼe vaʼekue. Umi mbaʼe haʼe sapyʼaitépe oaprendéva omomýi chupe ojevautisa hag̃ua. Katuete ningo upe rire osegi raʼe oaprende hetave mbaʼe. ¿Mbaʼépa upéicharõ ikatu ojapo tuakuéra ifamília heʼíramo chupekuéra ojevautisasemaha pórke ohayhu Jehovápe ha ojapose hembipota? Ikatu heʼi chupe oñeʼẽ hag̃ua umi ansiánondi, ikatu hag̃uáicha haʼekuéra ohecha okumplímapa umi rrekisíto ojevautisa hag̃ua.a Umi ótro kristiánoicha avei, pe mitã ojevautisa rire osegíta opa árare oaprende hetave mbaʼe Jehovágui (Rom. 11:33, 34).

¿MBAʼEICHAGUA EDUKASIÓNPA IPORÃVE CHE FAMÍLIAPE G̃UARÃ?

10, 11. a) ¿Mbaʼépa opensa heta sy ha túa? b) ¿Mbaʼépa oipytyvõvéta hína umi mitãme?

¹⁰ Heta túa opensa iporãvetaha ifamília oho raẽ fakultápe ha okonsegi peteĩ traváho iporãva ojevautisa mboyve. Añetehápe ningo haʼekuéra oipota iporãvante ifamiliakuérape g̃uarã. ¿Péro umíva piko oipytyvõta ifamíliape ovyʼa añete hag̃ua? ¿Mbaʼépa omboʼe la Biblia? ¿Mbaʼépa Jehová oipota jajapo? (elee Eclesiastés 12:1).

¹¹ Aníkena ñanderesarái ko múndo ha umi mbaʼe oĩva ipype ndojapói ni nopensaiha Jehová oipotaháicha (Sant. 4:7, 8; 1 Juan 2:15-17; 5:19). Pene família oñemoag̃uíramo Jehováre, ojeprotehéta hína Satanás ha imúndogui, ha nopensamoʼãi avei umi hénte opensaháicha. Péro peẽ tuakuéra ndapeikói vaʼerã pemombaʼeterei umi estúdio ijyvatéva ni umi traváho. Pórke pejapóramo upéva pene família ikatu hína opensa umi mbaʼe oofreséva ko múndo iñimportanteveha pe amista orekóvagui Jehovándi. Ha upéva ningo ipeligrosoiterei. Peteĩ túa ohayhúva ifamíliape ndoipotamoʼãi asy ko múndo omboʼe ifamíliape mbaʼépa odesidi vaʼerã. Añetehápe ningo javyʼa añete hag̃ua ñamotenondeve vaʼerã Jehovápe opaite mbaʼégui (elee Salmo 1:2, 3).

¿HA UPEICHAHÁGUI OÚRÕ OPEKA?

12. ¿Mbaʼérepa heta sy ha túa oipota ifamília ohaʼarõvénte ojevautisa hag̃ua?

¹² Peteĩ sy omombeʼu mbaʼérepa heʼi vaʼekue imembykuñáme ohaʼarõvénte hag̃ua ojevautisa hag̃ua. Haʼe heʼi: “Atĩ ningo amombeʼu hag̃ua mbaʼérepa ndaipotái kuri che memby ojevautisa. Che ningo akyhyje kuri oúrõ g̃uarã upe rire oñemosẽ kongregasióngui”. Heta oĩ opensáva péicha ha heʼi voi iporãvetaha ifamília ohaʼarõnte ojevautisa hag̃ua, pórke tuichave vove oikuaátama mbaʼépa la oipotáva ha odesidi porãvéta (Gén. 8:21; Prov. 22:15). Ikatu voi opensa ifamília ndojevautisáiramo ndaikatumoʼãiha oñemosẽ kongregasióngui. Péro tuichaiterei ningo ojavy umi opensáva péicha. ¿Mbaʼérepa jaʼe upéva? (Sant. 1:22).

13. ¿Ikatúpa jaʼe peteĩ persóna ndojevautisái haguérente ndojechamoʼãiha Jehovándi umi mbaʼe ojapóvare?

¹³ Tuakuéra ningo ndoipotái ifamília ojevautisa oimérõ noĩri gueteri preparádo oñemeʼẽ hag̃ua Jehovápe. Péro tuichaiterei ojavýta hikuái opensáramo ifamília ndojevautisái haguére ndojechamoʼãiha Jehovándi umi mbaʼe ojapóvare. Penemanduʼákena pene família oikuaa guive mbaʼépa iporã ha mbaʼépa ivai, orrenditaha kuénta Jehovápe umi mbaʼe ojapóvare (elee Santiago 4:17). Upévare, tuakuéra iñarandúva ndeʼimoʼãi ifamíliape tohaʼarõmiénte ojevautisa hag̃ua. Imitãramo jepe, omboʼéta chupekuéra ohayhu hag̃ua umi mbaʼe Jehová oguerohorýva ha omboyke hag̃ua umi mbaʼe Jehovápe ndogustáiva, ha haʼekuéra voi omoĩta ehémplo ifamíliape umi mbaʼépe (Luc. 6:40). Pene família ohayhúramo Jehovápe ojaposéta umi mbaʼe iporãva, ha upéva oipytyvõta chupe ani hag̃ua opeka vai (Is. 35:8).

ERMANOKUÉRA IKATU AVEI OIPYTYVÕ UMI IMITÃVAPE

14. ¿Mbaʼéichapa umi ansiáno ikatu hína oipytyvõ tuakuérape?

¹⁴ Umi ansiáno ningo tuichaiterei ikatu oipytyvõ tuakuérape kyreʼỹme oñeʼẽramo umi mitãndi la ikatútavare ohupyty Jehová servísiope. Peteĩ ermána omombeʼu haʼe orekórõ guare 6 áño, ermáno Russell oñemongeta hague hendive 15 minúto aja ha oporandu chupe mbaʼépa ohupytyse Jehová servísiope. ¿Mbaʼépa oiko upe rire? Tiémpo rire ko ermána omoñepyrũma iprekursorádo ha osegi ojapo upéva 70 áñore. Ko ehémplo ohechauka porã ñandéve mbaʼeichaitépa ikatu oipytyvõ peteĩ persónape ñañeʼẽramo hendive umi mbaʼe omokyreʼỹtavare chupe (Prov. 25:11). Umi ansiáno ikatu avei oinvita umi túa ha ifamiliakuérape oipytyvõ hag̃ua umi traváho ojejapótavape Salónpe. Péicha jave ikatu omeʼẽ hikuái mitãnguérape umi traváho ikatútava ojapo.

15. ¿Mbaʼéichapa ermanokuéra ikatu omokyreʼỹ umi imitãvape?

¹⁵ ¿Mbaʼéichapa ikatu avei ermáno ha ermanakuéra oipytyvõ umi imitãvape? Ohechaukávo oñeinteresaha hesekuéra. Ikatu hína jaguerohory chupekuéra jahechávo mbaʼéichapa oprogresa ohóvo hikuái. Por ehémplo, oñehaʼã jave okomenta iñeʼẽtépe, ojapo jave ipárte rreunión éntre semanaguápe, jaikuaa jave ombohovái porã hague peteĩ tentasión térã opredika hague ikompañerokuérape eskuélape. Ani jaheja ohasa rei pe oportunida jafelisita hag̃ua chupekuéra ñande pyʼaite guive. Ikatu hína ñamoĩ peteĩ méta ñañeʼẽ hag̃ua umi mitãrusu ha mitãkuñándi rreunión mboyve térã opa rire. Koʼã mbaʼe ningo oipytyvõitereíta chupekuéra oñeñandu porã hag̃ua kongregasiónpe (Sal. 35:18).

EIPYTYVÕKENA NE FAMÍLIAPE OPROGRESA HA OJEVAUTISA HAG̃UA

16, 17. a) ¿Mbaʼérepa iñimportánte ñane família ojevautisa? b) ¿Mbaʼépa ombovyʼaitereíta umi sy ha túa oservívape Jehovápe? (Ehecha pe taʼanga oĩva iñepyrũme).

¹⁶ Tuakuéra ningo oreko peteĩ priviléhio tuichaitereíva omboʼévo ifamíliape ohayhu hag̃ua Jehovápe (Efes. 6:4; Sal. 127:3). Yma ningo umi israelita onaséma vaʼekue voi peteĩ tetã oñemeʼẽmavape Jehovápe. Péro ñane família nahániri. Ñande jahayhúramo jepe Jehovápe ha umi mbaʼe haʼe ñanemboʼéva, upéva ndeʼiséi ñane família ojapotamaha avei upéicha. Upévare, ñane família onase guive ñañehaʼãmbaite vaʼerã oiko hag̃ua chugui Jesús disípulo, oñemeʼẽ hag̃ua Jehovápe ha ojevautisa. ¿Mbaʼérepa iñimportantete jajapo upéva? Pórke ñane família oñemeʼẽramo Jehovápe, ojevautisa ha osegíramo ifiél, ikatúta hína ojesalva ou vove pe jehasa asy guasu (Mat. 24:13).

¹⁷ Ko artíkulo oñepyrũre ñañeʼẽ kuri peteĩ ermána héravare Blossom Brandt. Haʼe heʼírõ guare itúa ha isýpe ojevautisasemaha, haʼekuéra oikuaa porãse kuri oimépa ifamília oĩma preparáda upearã. Ohechakuaávo hikuái upeichaha, oapoja chupe ojevautisa hag̃ua. Pe pyhare Blossom ojevautisa mboyve, itúa ojapo peteĩ mbaʼe iporãitereíva. Blossom heʼi: “Che túa heʼi oréve enterove roñesũ hag̃ua ha ojapo peteĩ orasión. Haʼe omombeʼu Jehovápe ovyʼaitereiha itajýra odesidi haguére oservi avei chupe”. Ohasáma mas de 60 áño ha Blossom heʼi: “Añetehápe, núnka ndacheresaraimoʼãi upévagui”. Roipotaite ningo entéro peẽ sy ha túa pevyʼa avei péicha pehechávo pene família oñemeʼẽ Jehovápe ha ojevautisa.