Ohótapa yvágape entéro ipyʼaporãva?
PE PYHARE Jesús omano mboyve, haʼe oñembyaty ipahaite ijapostolkuérandi. Upérõ heʼi chupekuéra: ‘Che Ru rógape oĩ heta rendag̃ua. Upévare che aháta ambosakoʼi peẽme pene rendag̃ua’ (Juan 14:2). Péicha Jesús opromete chupekuéra peteĩ mbaʼe iporãitereíva: ohotaha hikuái yvágape. Péro maʼerãpa ohóta hikuái upépe?
Upe pyharépe Jesús omombeʼu umi hemimboʼépe, oñemeʼẽtaha chupekuéra peteĩ tembiapo neporãmba jepéva. Haʼe heʼi: ‘Peẽ ningo akóinte peime chendive ha chemoirũ ijetuʼuve jave. Upévare ajapo penendive peteĩ kompromíso pegoverna hag̃ua chendive che rréinope, che Túva ojapo haguéicha avei chendive peteĩ kompromíso agoverna hag̃ua irréinope’ (Lucas 22:28, 29, NM). Ñandejára ojapovaʼekue peteĩ kompromíso Jesús ndive. Upérõ heʼi chupe oikotaha chugui Rréi. Haʼe oisãmbyhy vove omeʼẽta yvyporakuérape peteĩ mbaʼe ñaikotevẽtereíva: peteĩ goviérno oipeʼaitétava jehasa asy ha ohundítava umi iñañávape. Upe goviérno oĩramo jepe yvágape, oisãmbyhýta ko ‘yvy opaha peve’ (Salmo 72:4, 8; Daniel 7:13, 14).
Yvágape Jesús nogovernamoʼãi haʼeño, ijapostolkuéra omoirũta chupe. Chupekuéra raẽvete ojeporavo ‘oisãmbyhy hag̃ua ko yvy’ (Revelación [Apocalipsis] 5:10).
Upéicharõ, mboy yvypórapa ohóta yvágape? Ndahetái umi ohótava. Ñapensamína, koʼág̃a rupi umi goviérnope ndahetái umi oisãmbyhýva. Upéicha avei Ñandejára rréinope peteĩ aty michĩva oisãmbyhýta hetaiterei yvypórape oĩtava ko yvy ape ári. Jesús heʼi umi ohótava yvágape: ‘Ani pekyhyje peẽ che ovechakuéra mbovymi, pende Ru heʼíma omeʼẽtaha peẽme pe rréino’ (Lucas 12:32, NM). Upéicharõ la Biblia ohechauka 144.000 yvypórante ohotaha yvágape ogoverna Jesús ndive, ha koʼãvape oñehenói ‘ovecha aty mbovymi’. Péro umi opytátava oikove opa ára ko yvy ape ári ningo hetaitereive chuguikuéra (Revelación 14:1; 21:4).
Péicha jahecha ndohomoʼãiha yvágape enterove ipyʼaporãva. Apóstol Pedro ohechauka upeichaha, heʼívo rréi David ‘ndohói hague yvágape’ (Hechos 2:34). Juan Bautista ipyʼaporãvaʼekue avei, upéicharamo jepe Jesús heʼi haʼe ndohomoʼãiha yvágape oisãmbyhy: ‘Kuimbaʼekuéra apytépe ndaipóri tuichavéva Juan Bautístagui; péro pe michĩvéva pe rréino yvagapeguápe tuichave chugui’ (Mateo 11:11, NM).
Mbaʼépa ohupytýta umi ipyʼaporãva
Jahecháma haguéicha oĩta hetaitereive hénte ipyʼaporãva opytátava oiko opa ára g̃uarã ko yvy ape ári. Mbaʼépa jajapovaʼerã jahupyty hag̃ua upéva? Jesús heʼi: ‘Ñandejára ohayhuetereígui yvyporakuérape, omeʼẽvaʼekue itaʼýra peteĩete, umi hese ojeroviáva ani hag̃ua oñehundi, toikove guei opa ára g̃uarã’ (Juan 3:16). Péicha jahecha Ñandejára ñanderayhuetereígui oipotaha enterove jahupyty jeikove opaveʼỹva. Péro upearã jajeroviavaʼerã Jesús rehe.
Tekotevẽ upéicharõ jaikuaa porã Ñandejára Ñeʼẽ, ikatu hag̃uáicha jajerovia mbarete (Juan 17:3). Upévare iporãta jaikuaave mbaʼépa Ñandejára rembipota ha jaiko haʼe oipotaháicha. Jajapóramo upéicha, Jehová tuicha ñanderovasáta ha omeʼẽta ñandéve jeikove opaveʼỹva.
[Rrekuádro oĩva páhina 7-pe]
Mbaʼépa heʼi la Biblia?
Ojegueroviáva jepi:
Ñamano vove ñane ánga osẽ ñande retégui ha oho oiko ambue hendápe.
Mbaʼépa omboʼe la Biblia:
‘Umi omanovaʼekue katu nopensái ha ndoikuaavéima mbaʼeve.’ (Eclesiastés 9:5.)
Ojegueroviáva jepi:
Umi omanóva ndoikovemoʼãvéima arakaʼeve.
Mbaʼépa omboʼe la Biblia:
‘Enterove umi omanovaʼekue oĩva yvyguýpe, ohendúta Jesús ohenóirõ chupekuéra, ha opuʼã jeýta.’ (Juan 5:28, 29.)
Ojegueroviáva jepi:
Entéro ipyʼaporãva ohóta yvágape.
Mbaʼépa omboʼe la Biblia:
‘Umi hekopotĩvape opytáta ko yvy, ha upépe haʼekuéra oikovéta opa ára.’ (Salmo 37:29.)