Ñañemoag̃uíkena Ñandejárare

Ne rréino ndopamoʼãi arakaʼeve

2 SAMUEL 7:1-16

HETA mburuvicha oheja ipuésto, oĩ ndojeporavovéimava oisãmbyhy hag̃ua ha ambue katu mbaretépe ojepeʼa chugui ipuésto. Mbaʼépa ikatu jaʼe Jesucristo rehe, pe Rréi Ñandejára oiporavovaʼekue oisãmbyhy hag̃ua yvága guive? Oĩpa ikatuvaʼerã ojoko chupe ani hag̃ua oisãmbyhy? La Biblia ombohovái koʼã porandu Segundo de Samuel kapítulo 7-pe, upépe ojehai Jehová heʼivaʼekue Israel ruvicha Davídpe.

Oñepyrũre ko kapítulo jahecha David iñangekoiha oiko haguére peteĩ óga guasu ne porãvape, ha Ñandejára karameg̃ua marangatu oĩ rupi óga kárpape.a Upévare heʼi ojaposeha peteĩ témplo porã Jehovápe g̃uarã (versíkulo 2). Péro ñambyasýramo jepe Jehová ndohejái haʼe ojapo, upéva rangue ojevale proféta Natán rehe heʼi hag̃ua chupe itaʼýra omopuʼãtaha pe témplo (versíkulo 4, 5, 12 ha 13).

David ningo ipyʼaite guive ojapose peteĩ mbaʼe iporãitereíva, ha Jehová oguerohoryeterei upéva. Upéicha rupi opromete chupe ifamiliarégui osẽtaha peteĩ rréi oisãmbyhýtava opa ára peve. Ha ojevale Natán rehe heʼi hag̃ua Davídpe: ‘Nde rogaygua rehe añangarekóta, ha nde guapyha ha ne goviérno oĩ hatãta opa ára g̃uarã’ (versíkulo 16). Mávapa hína upe oisãmbyhýtava ko goviérno opa ára g̃uarã? (Salmo 89:20, 29, 34-36.)

Jesús Nazaretgua, oúva David familiarégui. Ha ánhel Gabriel omyesakãve heʼívo: ‘Jehová omoĩta chupe rréiramo itúva David rendaguépe. Haʼe oisãmbyhýta Jacob rogayguáre opa ára g̃uarã, ha igoviérno ndopamoʼãi arakaʼeve’ (Lucas 1:32, 33, NM). Jesucrístope ndojeporavói votasión rupive, síno Ñandejaraite voi oiporavo chupe ha upéicha rupi haʼe iderécho oisãmbyhývo opa ára g̃uarã. Upéicha avei Jehová ohechauka okumpliha oprometevaʼekue Davídpe. Ñandejára promésa arakaʼeve ndopytareíri, jajeroviakuaa opa mbaʼe heʼíva katuete oñekumpliha (Isaías 55:10, 11).

Umi versíkulo ñahesaʼỹijovaʼekue ñanemboʼe mokõi mbaʼe iñimportantetereíva. Primero, ndaiporiha mbaʼeve ni avave ikatúva ojoko Jesucrístope oisãmbyhy hag̃ua. Upéva ñanembopyʼaguapy jaikuaágui igoviérno rupive ojejapotaha Ñandejára rembipota ko yvy ape ári yvagapeguáicha (Mateo 6:9, 10).

Ha segundo, ñanemboʼe peteĩ mbaʼe iporãitereíva Jehovágui. Haʼe ningo omombaʼetereivaʼekue David ojaposéva. Ajépa ñanembopyʼaguapyete jaikuaávo mbaʼeichaitépa Jehová omombaʼe ñande jajapóva hesehápe! Péro sapyʼánte ndaikatúi ñamombaʼeguasu Chupe ñande jajaposeháicha, ñanderasy katúgui térã nañanemitãvéima rupi. Upéicharamo jepe ñanemokyreʼỹ jey jaikuaávo Jehová omombaʼeha umi mbaʼe jajaposéva jepe chupe g̃uarã.

[Nóta]