Diez porandu sexo rehe. La Biblia ombohovái

1 Haʼépa pe rrelasión sexual pe pekádo ypykue?

▪ Rrespuésta: Heta oĩ oimoʼãva upe yva ojeproivivaʼekue hardín de Edénpe haʼeha pe rrelasión sexual. Péro la Biblia nomboʼéi upéva.

Ñapensamína. Ñandejára ojapo mboyve Évape heʼimavaʼekue Adánpe ani hag̃ua hoʼu pe ‘yva oikuaaukáva iporãva ha ivaíva’ (Génesis 2:15-18). Upérõ ningo Adán oiko gueteri haʼeño, upévare jaʼekuaa Ñandejára noñeʼẽi hague rrelasión sexual rehe. Upe rire omandavaʼekue Adán ha Évape: ‘Penderaʼýkena ha peñemboheta pemyenyhẽ meve ko yvy’ (Génesis 1:28). Mbaʼéicha piko ojapóta upe Ñandejára ojeruréva chupekuéra ndoguerekóiramo rrelasión sexual? Ivaietéta ningo ñapensáramo Ñandejára oporohayhuetéva heʼiha chupekuéra omanotaha iñeʼẽrendu haguére chupe (1 Juan 4:8).

Ambue mbaʼe iñimportánteva: Eva ndaipórikuri iménandi oñepyrũrõ guare ‘oipoʼo pe yva ha hoʼu’. La Biblia heʼi ‘upe rire ae omeʼẽ hague iménape ha haʼe hoʼu avei’ (Génesis 3:6).

Ha amo ipahápe, Ñandejára ndokastigái Adán ha Évape oguerekórõ guare rrelasión sexual ha ifamília (Génesis 4:1, 2). Hesakã porãiterei Ñandejára oproivi hague peteĩ yvánte, ndahaʼéi pe rrelasión sexual.

2 Heʼípa la Biblia ndovaleiha jaguereko rrelasión sexual javyʼa hag̃ua?

▪ Rrespuésta: La Biblia ohechauka Ñandejára ojapo hague yvyporakuérape “kuimbaʼe ha kuña”. Ha Ñandejára voi heʼi opa umi mbaʼe ojapóvare “iporãitereiha” (Génesis 1:27, 31, ÑÑB). Heta tiémpo rire ohaika peteĩ kuimbaʼépe ko konsého menakuérape g̃uarã: ‘Evyʼa ne rembireko ndive pe kuña remenda hague nemitãme [...]. Ikunuʼũ tanembopyʼarory opaite ára’ (Proverbios 5:18, 19). Ñahesaʼỹijóvo koʼã mbaʼe, mbaʼépa repensa, heʼípa la Biblia ndovaleiha jaguereko rrelasión sexual javyʼa hag̃ua?

Jahechakuaa Ñandejára ndojapói hague umi órgano sexual yvyporakuéra ifamília hag̃uánte, síno ojapo hague avei umi omendáva ohechauka hag̃ua ojupe ojoayhuha, ha péicha ovyʼa oñondive. Pe rrelasión sexual rupive peteĩ kuimbaʼe ha kuña ojoayhúva omeʼẽ ojupe oikotevẽva.

3 Heʼípa la Biblia peteĩ kuimbaʼe ha kuña ikatuha oiko oñondive omendaʼỹre?

▪ Rrespuésta: La Biblia heʼi ‘Ñandejára ohusgataha umi hekokyʼávape’ (Hebreos 13:4). Pe ñeʼẽ griégo pornéia térã “fornicación” heʼise opaichagua rrelasión sexual oguerekóva peteĩ kuimbaʼe ha kuña omendaʼỹre, upévape oike avei ojeporúramo hekopeʼỹ umi órgano sexual.a Upéicha rupi Ñandejára ndoguerohorymoʼãi peteĩ kuimbaʼe ha kuña oikórõ oñondive, omendátaramo jepe upe rire.

Ojoayhuetereíramo jepe peteĩ kuimbaʼe ha kuña, Ñandejára oipota omenda oreko mboyve rrelasión sexual oñondive. Ñandejára ningo mborayhu ha haʼe ñandeapo ikatu hag̃uáicha japorohayhu, katuete oiméne oikuaa mbaʼérepa heʼi jey jey oñemenda raẽ vaʼerãha ojeguereko hag̃ua rrelasión sexual. Pe artíkulo oúvape oñemyesakãta upéva.

4 Ikatúpa peteĩ kuimbaʼe hembireko heta?

▪ Rrespuésta: Ñandejára ningo peteĩ tiémpore ohejavaʼekue peteĩ kuimbaʼe hembireko heta (Génesis 4:19; 16:1-4; 29:18–30:24). Péro, haʼe nomoñepyrũi ko mbaʼe, jaikuaaháicha omeʼẽvaʼekue Adánpe peteĩnte hembirekorã.

Ñepyrũrã Ñandejára heʼivaʼekue káda kuimbaʼe peteĩnte hembirekovaʼerãha ha, tiémpo rire, heʼi Jesucrístope oikuaauka jey hag̃ua upéva (Juan 8:28). Ombohováivo peteĩ porandu ñemenda rehegua, Jesús heʼi: ‘Iñepyrũmbýpe Haʼe ojapo chupekuéra kuimbaʼe ha kuña, ha heʼi: “Pe kuimbaʼe ohejavaʼerã itúva ha isýpe ha ojoajuvaʼerã hembireko ndive oiko hag̃ua mokõivévagui peteĩntema”’ (Mateo 19:4, 5, ÑÑB).

Upe rire, Ñandejára ohaika ijespíritu sánto rupive peteĩ Jesús remimboʼépe ko mbaʼe: “Pe kuimbaʼe oguerekovaʼerã hembireko tee, ha pe kuña iména tee” (1 Corintios 7:2, JMP). La Biblia heʼi avei peteĩ kuimbaʼe ohupytyséva rresponsavilida kongregasiónpe ‘peteĩnte hembireko vaʼerãha’ (1 Timoteo 3:2, 12, BNP).

5 Oĩ vaípa umi omendáva oiporu pohã ani hag̃ua pe kuña hyeguasu?

▪ Rrespuésta: Jesús ni hemimboʼekuéra ndeʼirivaʼekue kristianokuérape ifamiliavaʼerãha. Ha ni peteĩ hendápe la Bíbliape ndeʼíri ndovaleiha ojesegi peteĩ tratamiénto ani hag̃ua ojeguereko mitã.

Upéicharõ, umi omendáva odesidivaʼerã ifamíliatapa, mboy ha arakaʼépa orekóta. Ha odesidíramo oiporu pohã ani hag̃ua hyeguasu, avave noñeʼẽvairivaʼerã upévare. Péro ndahaʼeivaʼerã peteĩ pohã oitýtava mitãb (Romanos 14:4, 10-13).

6 Mbaʼépa heʼi la Biblia umi oitykávare imemby?

▪ Rrespuésta: Ñandejárape g̃uarã tuichaiterei mbaʼe ñande rekove. Haʼe omombaʼe umi mitã oĩva isy ryépe ha neʼĩrava oĩmba jepe (Salmo 139:16). Upévare yma heʼi ojekastiga hag̃ua umi operhudikáva peteĩ mitãme oĩva gueteri isy ryépe. Upéicharõ, Ñandejárape g̃uarã peteĩ oitykáva imemby haʼe peteĩ oporojukáva (Éxodo 20:13; 21:22, 23).

Ha oĩramo provléma onase hag̃ua peteĩ mitã ha tekotevẽta ojedesidi ojehejátapa oikove pe mitã térã isy? Ko situasiónpe pe ména ha tembireko odesidivaʼerã upéva.c

7 Heʼípa la Biblia ikatuha ojedivorsia umi omendáva?

▪ Rrespuésta: Heʼi ikatuha. Péro Jesús omombeʼuvaʼekue mbaʼéicha añoitépa ikatu oiko upéva heʼívo: “Che katu haʼe peẽme, oĩrõ ojedivorsiáva hembirekógui, ndahaʼéiramo hekovai haguére [oreko rrelasión sexuál peteĩ ndahaʼéiva ndive iména térã hembireko], ha upéi omenda jey ambuére, upéva oporomoakãratĩhína” (Mateo 19:9, NM).

Oĩ heʼi ha ojapóva oimeraẽ mbaʼe ojedivorsia hag̃ua, ha Ñandejára ndochaʼéi ko mbaʼére. Hendive ojecháta umi vyroreírente ohejáva iména térã hembirekópe, koʼýte ojapóramo upéva omenda jey hag̃ua (Malaquías 2:13-16; Marcos 10:9).

8 Oguerohorýpa Ñandejára umi oikóvape kuimbaʼe kuimbaʼéndi térã kuña kuñándi?

▪ Rrespuésta: La Biblia ohechauka porã ivaietereiha pe tekovai térã fornicación, umíva apytépe umi kuimbaʼe oikóva kuimbaʼéndi térã kuña kuñándi (Romanos 1:26, 27; Gálatas 5:19-21). Ñandejára ningo ndoguerohorýi ko mbaʼe, péro jaikuaa avei Haʼe ‘ohayhuetereígui yvyporakuérape omeʼẽ hague Itaʼýra peteĩete, opaite umi hese ojeroviáva ani hag̃ua oñehundi, ohupyty hag̃ua guei jeikove opaveʼỹva’ (Juan 3:16, NM).

Upéicha rupi, umi kristiáno añeteguáva ndoguerohorýiramo jepe umi péicha oikóva rembiapo, otrata porã opavavépe (Mateo 7:12). Ñandejára oipotágui hembiguaikuéra ‘omombaʼe opavavépe’, ndahaʼéi ndajachaʼéiva umi oikóvare kuimbaʼe kuimbaʼéndi térã kuña kuñándi (1 Pedro 2:17, BNP).

9 Ivai piko pe sexo telefónico, sexting térã cibersexo?

▪ Rrespuésta: Pe sexo telefónico heʼise oñeñeʼẽha hekopeʼỹ sexo rehe térã oñehenduha mensáhe tieʼỹ teléfono rupive. Pe ñeʼẽ sexting heʼise ojeguerahaukaha fóto térã mensáhe itieʼỹva selulár rupive. Pe cibersexo heʼise opa mbaʼe ojeʼe térã ojejapóva hekopeʼỹ sexo rehegua Internet rupive.

La Biblia noñeʼẽi koʼã mbaʼe ojejapóvare koʼág̃a rupi. Péro heʼi: ‘Ani peñemongeta tekovai, tekokyʼa ha taryrýire, peẽ ningo penderekomarangatu. Ani peje térã pejapo ikatúva oporomotĩ, térã ñeʼẽ vyrorei, ñeʼẽ hekopeʼỹva ha opa mbaʼe naiporãiva’ (Efesios 5:3, 4, NM). Pe sexo telefónico, sexting ha cibersexo noipytyvõi umi héntepe ojejoko hag̃ua, upéva rangue omomýi chupekuéra ani hag̃ua ohecha hekópe porã pe sexo ha oguereko hag̃ua rrelasión sexual peteĩ ndahaʼéivandi iména térã hembireko. Upéicha rupi koʼã tapicha ijehéntema opensa ha ojapo umi mbaʼe chupe ogustávante.

10 Mbaʼépa opensa Ñandejára umi ojejavykývare?

▪ Respuesta: La Biblia noñeʼẽi derechoite ko mbaʼére. Umi ojejavykýva opoko hiʼórgano sexual rehe oñemoakãraku hag̃ua ha oñandu ku orekoramoguáicha rrelasión sexual. Péro Ñandejára Ñeʼẽ heʼi opavave kristiánope: ‘Pejuka pende rete rembipota vai, haʼéva tekovai, tekokyʼa, akãraku vai’ (Colosenses 3:5, NM).

Umi ojejavykýva ndohechái hekópe porã pe sexo ha ijupénte omeʼẽ gústo. La Biblia heʼi Ñandejára omeʼẽtaha ‘ipuʼaka guasuete’ umi añetehápe ohejasévape ko mbaʼe (2 Corintios 4:7, BNP; Filipenses 4:13).

[Nóta]