Fín del múndo oporomongyhyje, ojekuaase ha ndojegueroviavéima

Pe kalendário maya heʼíkuri 21 de diciembre 2012-pe oikotaha peteĩ kámbio ko yvy tuichakuére, ¿mbaʼéichapa reñeñandu repensávo upévare? Ikatu ndepyʼaguapýma, ndepochy térã ndereikuaasevéima mbaʼeve. ¿Ojeʼepa reíntepa outaha pe fín del múndo?

¿Mbaʼépa repensa la Biblia heʼívo ‘opataha ko múndo’? (Mateo 24:3, ÑÑB.) Oĩ okyhyjéva ko yvy oñehundírõ g̃uarã tatápe. Ambuépe katu ogustaiterei umi taʼanga ohechaukáva mbaʼéichapa oñehundíta ko múndo. Oĩ avei nohendusevéimava pe fín del múndo hiʼag̃uimbaitemaha. Heta oĩ oñeñandúva péicha ohendúgui umi tapicha heʼívante, ndahaʼéi la Biblia heʼíva.

Ikatuhína rehecharamoiterei la Biblia heʼíva pe fín del múndore. Upépe ohechauka porã mbaʼérepa ikatu ñahaʼarõ asy pe fín; ohechauka avei ikatuha ñanekaneʼõ ñaimoʼãramo hetaitereimaha ñahaʼarõ ha nog̃uahẽi. Upévare, romokyreʼỹ rehecha hag̃ua mbaʼéichapa la Biblia ombohovái koʼã mbaʼe ojekuaaséva pe fín del múndogui.

¿Oñehundítapa ko yvy tatápe?

LA BIBLIA OMBOHOVÁI: “[Ñandejára], nde remopyendavaʼekue ko yvy ani hag̃ua okuʼe arakaʼeve” (SALMO 104:5).

Ko yvy noñehundimoʼãi arakaʼeve, ni tatápe ni ambue mbaʼépe; la Biblia omyesakã porã ko yvy opytataha opa árare yvyporakuérape g̃uarã. Salmo 37:29 heʼi: ‘Hekopotĩvape opytáta ko yvy ha upépe haʼekuéra oikóta opa árare’ (Salmo 115:16; Isaías 45:18).

Ñandejára ojapórõ guare ko yvy heʼi voi “iporãitereiha”, ha koʼag̃aite peve opensa upéicha (Génesis 1:31). Haʼe nopensaiete ohundívo ko yvy; upéva rangue, opromete ‘ohunditaha umi ombyaívape ko yvy’ ha ndohejamoʼãiha oñehundi (Revelación [Apocalipsis] 11:18, ÑÑB).

Péro ikatu repensa reína 2 Pedro 3:7-pe heʼívare: “Umi yvága ha pe yvy oĩva koʼág̃a, oñeñongatu hína oñehundi hag̃ua tatápe”. ¿Heʼisépa upéva ko yvy oñehunditaha tatápe? La Biblia sapyʼánte oñeʼẽ jave yvága, yvy ha tatáre, oiporúnte orrepresenta hag̃ua peteĩ mbaʼe. Pór ehémplo, Génesis 11:1-pe heʼi “ko yvy tuichakue osegivaʼekue oñeʼẽ peteĩ idióma añónte”. Koʼápe “yvy” heʼise yvyporakuéra.

Jaleéramo mbaʼépa heʼi 2 Pedro 3:7 mboyve ha upe rire, jahechakuaáta upépe oñeʼẽvo yvága, yvy ha tatáre ojeporunteha oñerrepresenta hag̃ua peteĩ mbaʼe. Pór ehémplo, umi versíkulo 5 ha 6-pe oñeʼẽ pe Ama Guasu oikovaʼekuére Noé tiémpope. Péro jaikuaaháicha, upéva oikórõ guare noñehundíri ko planéta. Upérõ oñehundi pe “yvy” térã umi hénte aña, ha “umi yvága” térã umi tapicha ogovernavaʼekue chupekuéra (Génesis 6:11). Upéicharõ 2 Pedro 3:7 ohechaukánte hína tatápe oñehundirõguáicha, oñehunditaha umi hénte aña ha umi goviérno korrúpto.

¿Mbaʼépa oikóta ou vove pe fín del múndo?

LA BIBLIA OMBOHOVÁI: “Ko múndo ha umi mbaʼe oipotáva, ohasa ohóvo; péro pe ojapóva Ñandejára rembipota opyta opa ára g̃uarã” (1 JUAN 2:17, NM).

¿Mbaʼépa hína pe “múndo” ohasa térã opátava? Ndahaʼéi ko yvy, síno yvyporakuéra ndojapóiva Ñandejára rembipota. Pór ehémplo, peteĩ doktór oipeʼaháicha peteĩ tumór ipasiéntegui ojesalva hag̃ua, Ñandejára ohundíta umi hénte aña ko yvy ape árigui, ikatu hag̃uáicha umi ipyʼaporãva oiko vyʼápe (Salmo 37:9). Upéicharõ, pe fín del múndo ndahaʼéi jakyhyje hag̃ua.

Heta Biblia ohechauka ou porãtaha ñandéve pe fín del múndo heʼívo ‘ko múndo koʼag̃agua ára pahaite oñemoag̃uimaha’ térã ‘opatamaha’ (Mateo 24:3; ÑÑB). Pe fín del múndope noñehundimoʼãi umi yvypóra ipyʼaporãva ni ko yvy. Upéicharõ, ikatu ñahaʼarõ oñepyrũtaha peteĩ tiémpo ojeiko porãvetaha. La Bíbliape heʼi amo gotyove oĩtaha peteĩ múndo pyahu (Lucas 18:30).

Jesús heʼi upe tiémpope “Ñandejára ombopyahupa jeytaha opa mbaʼe”. Jesús oipytyvõta yvyporakuéra oiko hag̃ua Jehová oipota haguéicha iñepyrũmbýpe (Mateo 19:28, NM). Upépe jahupytýta koʼã vendisión:

• Ko yvýgui oikóta peteĩ hardín neporãva, ojeikóta kyhyjeʼỹme ha ndofaltamoʼãi mbaʼeve (Isaías 35:1; Miqueas 4:4).

• Oĩta umi tembiapo iporã ha oporombovyʼáva (Isaías 65:21-23).

• Opáta mbaʼasykuéra (Isaías 33:24).

• Umi ijedáva imitã jeýta (Job 33:25).

• Oñemoingove jeýta umi omanovaʼekuépe (Juan 5:28, 29).

Jajapóramo “Ñandejára rembipota” ndajakyhyjemoʼãi pe fín del múndogui; upéva rangue jaipotáta og̃uahẽ upe ára.

¿Añetehápe piko og̃uahẽmbotaitéma pe fín del múndo?

LA BIBLIA OMBOHOVÁI: “Pehecha vove oikoha koʼã mbaʼe, peikuaáke hiʼag̃uimaha Ñandejára Rréino” (LUCAS 21:31, NM).

Profesór Richad Kyle ohai: “Umi kámbio noñehaʼarõiva ha umi sarambi oikóva omomýi hetápe heʼi hag̃ua arakaʼépa oúta pe fín del múndo”, koʼýte ndojekuaái jave mbaʼéicha rupípa oiko umi mbaʼe. (Lívro The Last Days Are Here Again [Los últimos días han vuelto]).

Péro, la Bíbliape umi proféta heʼivaʼekue pe fín del múndore, ndohaíri omyesakã hag̃ua mbaʼérepa oiko heta mbaʼe vai, síno Ñandejára ohaika ijespíritu rupive ohechauka hag̃ua mbaʼe mbaʼépa oikóta hiʼag̃uimbaitévo pe fín del múndo. Ehechamína koʼã profesía oñekumplípa hína térãpa nahániri.

• Gérra, ñembyahýi, yvyryrýi ha mbaʼasy vai opárupi (Mateo 24:7; Lucas 21:11).

• Hetave oĩ mbaʼe vai apoha (Mateo 24:12).

• Yvyporakuéra ombyai ko yvy (Revelación 11:18).

• Heta tapicha opensa ijehénte, ipláta rayhu, oiko vyʼarã rapykuéri ha omboyke Ñandejárape (2 Timoteo 3:2, 4).

• Familiakuéra noñontendevéi (2 Timoteo 3:2, 3).

• Ndojehechakuaaséi pe fín del múndo hiʼag̃uimbaitemaha (Mateo 24:37-39).

• Oparupiete oñemombeʼu pe marandu porã (Mateo 24:14).

Jesús heʼi haguéicha ‘jahecha vove oikoha opa koʼã mbaʼe’, jaikuaavaʼerã hiʼag̃uimbaitemaha pe fín del múndo (Mateo 24:33, NM). Ore testígo de Jehová roguerovia upéva, ha upéicha rupi ropredika 236 tetã ha territóriope.

Heta vésema ojeʼepa rei pe fín del múndo outaha, ¿ikatúpa upévarente jaʼe ndoumoʼãiha arakaʼeve?

LA BIBLIA OMBOHOVÁI: “Umi hénte heʼi vove: “Jaikóma pyʼaguapýpe ha kyhyjeʼỹme”, upepete oimoʼãʼỹve jave oñehundíta hikuái, peteĩ kuña oimoʼãʼỹve jave hasyháicha imemby hag̃ua; ha ni mbaʼevéicharõ ndojesalvamoʼãi hikuái” (1 TESALONICENSES 5:3, NM).

La Biblia ombojoja pe fín del múndo peteĩ kuña imembypotávare: umi kuña hyeguasúva hasýmante imemby hag̃ua ha upéva oiko oimoʼãʼỹve jave. Haʼekuéra ningo umi mbaʼe oñandúvare ohechakuaa imembypotamaha. Ha naimembýiramo jepe pe doktór heʼi hague árape chupe, haʼe oikuaa porã ag̃aite ag̃avépente imembytaha. Upéicha avei, umi mbaʼe oikóvare jahechakuaa hiʼag̃uimbaitemaha pe fín, ha ndoúiramo jepe pe ára ojeʼe haguépe, jahechakuaa jaikomaha “umi ára pahápe” ha og̃uahẽmbotaitemaha (2 Timoteo 3:1, NM).

Ikatu reñeporandu: ¿Mbaʼérepa hetaite hénte ndohechakuaaséi hiʼag̃uimbaitemaha pe fín del múndo ohecháramo jepe oñekumpliha umi mbaʼe ohechaukáva upéva? La Biblia heʼi pe fín del múndo hiʼag̃uimbaitévo oĩtaha hetaiterei ndogueroviáiva umi mbaʼe ohechaukáva upéva. Heta oĩta ohechakuaa rangue ñaimemaha umi ára pahápe oñembohorýtava heʼívo: “Ñande rukuéra ypykue ningo oikove ha upéi omanomba jeýma, péro upe tiémpo guive koʼág̃a peve mbaʼevete nokambiái” (2 Pedro 3:3, 4, NM). Ojehecháramo jepe oikoha heta mbaʼe ohechaukáva ñaimemaha umi ára pahápe, hetave oĩta nopenamoʼãiva umívare (Mateo 24:38, 39).

Ko artíkulope oĩ michĩmínte umi téxto ohechaukáva hiʼag̃uimbaitemaha pe fín del múndo.a Oimérõ reikuaaseve ko mbaʼégui, romokyreʼỹ rejerure hag̃ua testígo de Jehovápe peteĩ estúdio vívliko. Ikatu restudia nde rogaitépe, ambue lugár opyta porãvehápe ndéve térã teléfono rupive. Nderepagamoʼãi mbaʼevére, ne tiémponte reiporúta upearã ha ndaijojahái umi mbaʼe rehupytýtava.