KO RREVÍSTAPE OÑEHESAʼỸIJO: ¿ARAKAʼE PEVÉPA OĨTA OMBOYKÉVA HAPICHÁPE?
Opárupi oĩ omboykéva hapichápe
JONATHAN onase vaʼekue Estados Unídospe, ha ituvakuéra katu koreáno, upévare heta oĩ omboyke ha oapoʼíva chupe yma imitãme. Upéi okakuaapa rire, oiko chugui doktór ha oheka ótro lugár oiko hag̃ua. Ova peteĩ puévlo opytávape nórte gotyo Aláskape (Estados Unidos). Upépe ndahaʼevéima idiferentetereíva umi ipasiéntegui ha oimoʼã avavéma nomboykemoʼãiha chupe ha oñeñandu porãvetaha.
Péro oñatendévo peteĩ kuñataĩ orekóvare 25 áño, ohechakuaa tuicha ojavy hague. Ko kuñataĩ osẽvo terápiagui, opáy ha ohechávo Jónathanpe ojaʼo vaipaite chupe ha omona chupe yvýre; ndochaʼeiete voi umi koreánore. Ko mbaʼe oiko vaʼekue omoñeñandu vaieterei Jónathanpe ha ohechakuaa ohohápente oĩha oapoʼi ha omboykéva hapichápe.
Jonathan ohasa vaʼekue ohechauka ñandéve umi lugár mombyryvehápe jepe oĩha oapoʼíva hapichápe. Jaʼe porãsérõ g̃uarã, oĩháme hénte, katuete oĩ oporoapoʼíva.
Péro oĩramo jepe heta oapoʼi ha omboykéva hapichápe, enterovénte opensa naiporãiha ojejapo upéva. ¿Mbaʼére piko upéicharõ oparupiete jahecha ko mbaʼe? Pyʼỹinte umi heʼíva ivaiha ñamboyke ñande rapichápe, ndohechakuaái haʼe voi ojapoha upéicha. ¿Ikatúpa oiko avei nderehe upéva?
ENTEROVE SAPYʼÁNTE ÑAMBOYKE ÑANDE RAPICHÁPE
Heta oĩ ni ndohechakuaáiva omboyke, oapoʼi térã ohusga vaiha hína hapichápe. ¿Mbaʼérepa? La Biblia heʼi: ‘Yvypóra korasõ itraisionéro ha iñaña’ (Jeremías 17:9, NM). Upéicharõ ñane korasõ ikatu ñanembotavy ñapensávo jaguerohoryha entéro ñande rapichápe, térã omereséguinte ñamboykeha chupe.
¿Mbaʼépa repensáta reimévo ko situasiónpe?
Rehecha hag̃ua ndahasyieteha ñapensa vai ñande rapicháre, ejepyʼamongetami ko situasión rehe: ñamoĩ chupe rehoha hína peteĩ tape iñypytũvare ha ndaiporihápe hénte. Upeichaháguinte, rehecha ou hína mokõi kuimbaʼe tuichaicháva, ha peteĩva orekóvaicha álgo ipópe.
¿Mbaʼépa repensa hesekuéra? ¿Repensápa ojapotaha nderehe ivaíva? ¿Oĩ porã piko repensáma upéicha nde rapicháre reikuaaporãʼỹre mbaʼe apohápa? Oĩ porã ningo reñeñangareko, péro koʼã porandu katuete nepytyvõta rehechakuaa hag̃ua mbaʼépa repensa hína nde rapicháre, ha noiméipa rehusgáma hína reikuaaporãʼỹre chupe.
Añetehápe, enterove yvypóra ñaimoʼãʼỹre ñapensa vaíma ñande rapicháre, jaapoʼi térã ñamboyke chupe. ¿Mbaʼérepa jajapo upéva? La Biblia heʼi: ‘Peẽ pemaʼẽ pe kuimbaʼe rovárente’ (1 Samuel 16:7). Añete upéva, pyʼỹinte ñande jahusga ñande rapichápe jaikuaaporãʼỹre chupe, ha sapyʼánte tuichaiterei ikatu jajavy térã jaiko vai upevakuére. ¿Mbaʼépa ikatu jajapo anivéma hag̃ua jahusga térã ñamboyke ñande rapichápe? ¿Ikatúnepa opa umi mbaʼe ko múndogui?