¿Mbaʼéichapa ‘repreparáta nde raperã’?

UMI isrraelíta osẽ vaʼekue Babilóniagui áño 537-pe a. C. Jehová ojepyʼapy hesekuéra oikuaágui pe tape oipurútava hikuái oho jey hag̃ua Jerusalénpe, tekotevẽha oñemyatyrõ. Upévare heʼi chupekuéra: “Pejapo pe tape. Pemopotĩ, pembojoja ha peipeʼapa umi ita ikatu hag̃uáicha ohasa pe puévlo” (Is. 62:10, NM). ¿Mbaʼéichapa umi hudío ojapo Jehová heʼíva? Oime vaʼerã oĩ ohóva henonderãkuéra ojaty hag̃ua umi yvykua ha oaplana hag̃ua pe tape. Péicha umi oúva upe rire oguatátama peteĩ tape iporãvare.

Pe tape umi isrraelíta osegi vaʼekue haʼete avei pe tape ñande jasegíva jahupyty hag̃ua heta méta Jehová servísiope. Ñandejára oipota jahupyty umíva, péro oipota jaipeʼa ñande raperãgui umi mbaʼe ñandestorvátava. Upévare heʼi: “Eprepara nde raperã, ha opa mbaʼe osẽ porãta ndéve” (Prov. 4:26, NM). Ko konsého ideprovéchota enterovépe, tahaʼe kakuaa térã imitãvape.

EPREPARA NDE RAPERÃ REDESIDI PORÃVO

Umi hénte oñeʼẽ jave umi imitãvare heʼi jepi: “Heta mbaʼe ohupytýta”, térã: “Mombyry og̃uahẽta”. Ha añetehápe ningo umi mitãrusu ha mitãkuña hesãi, iñakãporã ha ohupytyse heta mbaʼe. Ajeve voi la Biblia heʼi hesekuéra: “Umi mitãrusúpe ojeguerohory imbarete rupi” (Prov. 20:29, NM). Umi imitãva oipurúramo imbaretekue ha ikapasida oservi hag̃ua Jehovápe, ohupytýta heta mbaʼe porã iservísiope ha ovyʼaitereíta.

Jaikuaaháicha, ko múndope ojehechaiterei mbaʼe mbaʼépepa ivale umi mitãrusu. Por ehémplo, peteĩ oservíva Jehovápe inóta porãramo ijestúdiope, imboʼeharakuéra ha umi ikompañéro omboliga jepi chupe oho hag̃ua universidápe ikatu hag̃uáicha osẽ porã ko múndope. Térã ivaléramo peteĩ depórtepe, omokyreʼỹ chupe ojededika hag̃ua upévape oiko peve chugui peteĩ profesionál. ¿Ndépa rejecháma ko situasiónpe? ¿Reikuaápa peteĩ ohasávape koʼã mbaʼére? ¿Mbaʼépa oipytyvõta peteĩ kristiánope odesidi porã hag̃ua?

La Biblia ikatu nepytyvõ reguata hag̃ua pe tape iporãvévare. Eclesiastés 12:1 heʼi: “Nemanduʼákena nde Apohare Ijojahaʼỹvare nemitã aja” (NM). ¿Mbaʼéichapa nde ikatu ‘nemanduʼa’ nde Apoharére? ¿Mbaʼéichapa enterove ikatu jajapo upéva?

Ñapensamína mbaʼépa ohasa vaʼekue peteĩ ermáno África occidentalgua hérava Eric.a Chupe ningo ogustaiterei pe fútvol, ha orekórõ guare 15 áño ojepotáma chupe seleksión nasionálpe. Upéva heʼise sapyʼaitérõ g̃uarã ikatutaha oho ohuga Európape ha oiko chugui peteĩ hugadór famóso. Péro ojapórire upéva, ¿ikatútapa jaʼe osegiha pe konsého heʼíva imanduʼa vaʼerãha Ijapoharére? Jahechamína mbaʼépa Eric odesidi ha mbaʼépa ikatu ñaaprende chugui.

Oĩ tiémpope eskuélape, Eric oñepyrũ ostudia la Biblia umi testígo de Jehová ndive, ha oaprende ñande Apohare oipeʼapaitetaha umi provléma ohasáva yvyporakuéra. Eric ohechakuaa iñimportantetereiha oipurupaite itiémpo ha imbaretekue ojapo hag̃ua Ñandejára rembipota. Upévare, ojededika rangue pe depórtepe, ojevautisa ha oñehaʼãmbaite oñakãrapuʼã Jehová servísiope. Tiémpo rire oiko chugui siérvo ministeriál ha upéi oñeinvita chupe oho hag̃ua pe Eskuéla Vívlika umi Kuimbaʼe Soltérope g̃uarãme.

Ojededikárire pe depórtepe, ikatúta kuri ifamóso ha ogana heta pláta. Péro haʼe oikuaa porã la Biblia ndaijapuiha heʼívo: “Pe iplátavape g̃uarã umi imbaʼerepy haʼete peteĩ puévlo imbaretéva, ha opensa voi upéva oprotehetaha chupe peteĩ murálla yvatéicha” (Prov. 18:11, NM). Jahechaháicha, umi iplátava oñembotavy ijupe opensávo umi mbaʼerepy oprotehetaha chupe. Añetehápe, umi oikóva pláta rapykuéri ‘oike heta akãrasýpe’ (1 Tim. 6:9, 10).

Haʼetépe heta mitãrusu oñeñandu porã ha ovyʼaiterei odesidi haguére oike pe servísio de tiémpo komplétope. Eric heʼi: “Ndaikéi peteĩ ekípo de fútvolpe, péro aike peteĩ ekípo tuichavévape oĩháme hetaiterei prekursór. Ha jaʼe porãsérõ g̃uarã, ndaipóri ótro ekípo iporãvéva. Aagradeseterei Jehovápe chepytyvõ haguére adesidi hag̃ua peteĩ mbaʼe chembovyʼáva”.

Peẽ mitãrusu ha mitãkuña, ¿mbaʼépa pejapóta? Peiko rangue pehupytyse umi mbaʼe oikuaveʼẽva ko múndo, peñehaʼã vaʼerã peiporavo pe tape iporãvéva pejapóvo pende prekursorádo. (Ehecha pe rrekuádro “Umi mbaʼe ndajahupytýiva universidápe”.)

EMBOYKE UMI MBAʼE NDESTORVÁTAVA

Peteĩ matrimónio oho ovisita pe sukursál oĩva Estados Unídospe ha ohecharamoiterei mbaʼeichaitépa ovyʼa joa umi vetelíta. Upe rire pe ermána oskrivi: “Rohechakuaa tekotevẽha rojesakrifikave Jehová rehehápe”. Upéi haʼe ha iména odesidi oipuruve itiémpo oservi hag̃ua Jehovápe.

Ñepyrũrã ko matrimónio opensa tekotevẽha okambia hetaiterei mbaʼépe. Péro peteĩ árape ojepyʼamongeta hikuái pe téxto upe diapeguáre, otokáva kuri Juan 8:31, heʼihápe: “Pejapo meméramo che haʼéva, peẽ añetehápe che disípulo”. Haʼekuéra heʼi: “Rodesidi romboyke heta mbaʼe ha ropyta umi roikotevẽmívarente. Roikuaa porã ningo umíva hekoviataha oréve hetavépe”. Upéi ovende hikuái pe hóga porãite, omboyke heta mbaʼe ostorvátava chupekuéra ha ova peteĩ kongregasión oñekotevẽvehápe. Koʼág̃a ojapo hikuái iprekursorádo, ombaʼapo jepi oñemopuʼã jave umi Salón del Reino ha ombaʼapo de voluntário oiko jave Asambléa de Distríto. ¿Mbaʼéichapa oñeñandu hikuái? Haʼekuéra heʼi: “Noroimoʼãi peichaite peve rovyʼataha romboyke haguére heta mbaʼerepy ha roñekontenta pe rorekomívarente. Hiʼarive péicha rohechauka rojapoha Jehová organisasión oipotáva”.

ESEGÍKENA EGUATA PE TAPE NDEGUERAHA PORÃTAVARE

Salomón oskrivi vaʼekue: “Nde resa tenonde gotyo omaña vaʼerã, [...] ojesareko vaʼerã ne renonderãre” (Prov. 4:25, NM). Peteĩ persóna omaneháva oñatende porã vaʼerã hapére. Péicha avei ñande ñañatende porã vaʼerã ñande servísiore, por ehémplo ñamoĩ meme vaʼerã méta ha ani jaheja mbaʼeve ñandestorva.

¿Mbaʼeichagua métapa ikatu remoĩ? Por ehémplo pe servísio de tiémpo kompléto. Avei ikatu reva ótra kongregasión iterritório tuichavévape oĩva ag̃ui reikohágui ha oikotevẽva maranduhárare. Térã peteĩ kongregasión oĩháme heta puvlikadór, péro oikotevẽva ansiáno ỹrõ siérvo ministeriál. ¿Ikatúpa nde reñekuaveʼẽ reipytyvõ hag̃ua umichahárupi? Ikatu reñeʼẽ avei pe superintendénte ndive reikuaa hag̃ua mbaʼépa haʼe opensa. Ha oiméramo rehose reservi mombyryve, ikatu reporandu mbaʼe kongregasiónpepa oñekotevẽve.b

Ñañeʼẽ jeymína Isaías 62:10 heʼívare. Oiméne heta hudío ombaʼapo jejopy raʼe oprepara hag̃ua pe tape ikatu hag̃uáicha umi isrraelíta ohasa upérupi. Upéicha rupi Jehová puévlo og̃uahẽ trankílo porã ivállepe. Oiméramo reñehaʼã hína rehupyty hag̃ua heta mbaʼe Ñandejára servísiope, aníkena nekangy, Jehová nepytyvõta rehupyty hag̃ua umi méta. Emboyke umi mbaʼe ndestorvátava ha ejerure Ñandejárape tanemoarandu, ha katuete rehecháta mbaʼeichaitépa nepytyvõta ‘reprepara hag̃ua nde raperã’ (Prov. 4:26, NM).