LA BIBLIA OMBOHOVÁI KOʼÃ PORANDU
¿Mbaʼérepa heta hénte oguerovia oexistiha peteĩ Kreadór?
Ñanemopirĩmba jahechávo Ñandejára ñandeapo porãiterei hague
Ojapóma 3.000 áñorupi peteĩ poéta oskrivi hague: ‘Chemopirĩmba ha chembojurujái cheapo porãiterei haguére. Upévare romombaʼeguasu’ (Salmo 139:14). Ha ñapensáramo mbaʼéichapa peteĩ mitã okakuaa isy retepýpe upeichaite avei ñañeñandu, ¿ajépa? Upévare heta hénte oguerovia oĩmante vaʼerãha peteĩ Kreadór ojapóva umi plánta, animál ha umi héntepe. (Elee Salmo 139:13-17 ha Hebreos 3:4.)
Upe ojapo vaʼekue ko univérso ha ko yvy, ojapo avei opa mbaʼe oikovéva (Salmo 36:9). Haʼe oñekomunika ñanendive ikatu hag̃uáicha jaikuaa chupe. (Elee Isaías 45:18.)
¿Añetehápe piko ñande jaju umi animálgui?
Ñande rete ha umi animál rete ningo heta mbaʼépe ojojogua. Péro upéva ningo oiko pórke ñandeapo la mísma persóna ha mokõivévante ñaime preparádo jaiko hag̃uáicha ko yvy ape ári. Ñande Apohare ojapo yvypórape yvytimbógui, ndahaʼéi peteĩ animálgui. (Elee Génesis 1:24 ha 2:7.)
Mokõi mbaʼépe idiferénte yvyporakuéra ha umi animál. Primero, ñande ikatu jaikuaa, jahayhu ha jarrespeta ñande Kreadórpe. Ha segundo, haʼe ñandeapo jaiko hag̃uáicha opa árare, ha umi animálpe katu nahániri. Ñande ningo ñamanónte pórke ñande ru ypykue omboyke vaʼekue ñande Kreadór autorida. (Elee Génesis 1:27 ha 2:15-17.)