LA BIBLIA OMBOHOVÁI KOʼÃ PORANDU
¿Mbaʼérepa jagueromanduʼa vaʼerã Jesús omano hague ára?
¿Mbaʼe esperánsapa jareko jesús omano rupi ñanderehehápe? (Isaías 25:8; 33:24)
Jesús ojapo vaʼekue ningo iñimportanteterei. Haʼe ou omano ñanderehehápe, jareko hag̃ua pe oportunida jarrekupera jeývo pe vída Ñandejára oprepara vaʼekue ñandéve g̃uarã. Haʼe nañandekreái ñaneñaña hag̃uáicha, ni ñanderasy ha ñamano hag̃ua (Génesis 1:31). Péro lastimósamente, Adán opeka ha upéicha rupi pe pekádo oike ko múndope. Ha Jesús ou omeʼẽ hekove perfékto ñandepeʼa hag̃ua pekádo ha ñemano poguýgui. (Elee Mateo 20:28 ha Romanos 6:23.)
Ñandejára ohechauka ñanderayhuetereiha omboúvo ko yvy ape ári Itaʼýrape omano hag̃ua ñanderehehápe (1 Juan 4:9, 10). Jesús omanda idisipulokuérape ogueromanduʼa hag̃ua haʼe omano hague ára ojapóvo peteĩ séna isensillomíva, oĩháme michĩmi pan ha víno. Ñande avei jajapóvo upéicha káda áño, jaagradese hína Ñandejára ha Itaʼýrape ñanderayhueterei haguére. (Elee Lucas 22:19, 20.)
¿Mávapa hoʼu vaʼerã pe pan ha víno?
Pe pyhare Jesús omano mboyve, heʼi idisipulokuérape ogueromanduʼa hag̃ua upe fécha ha avei ojapo hendivekuéra peteĩ pákto térã kompromíso (Mateo 26:26-28). Upe kompromíso opermiti chupekuéra ha hetave héntepe oiko hag̃ua rréi ha saserdóteramo yvágape. Oĩramo jepe hetaiterei hénte ogueromanduʼáva Jesús omano hague ára, saʼimínte oĩ hoʼúva pe pan ha víno, umi persóna ojelehi vaʼekuénte. (Elee Apocalipsis 5:10.)
Dos mil áño pukukuére, Jehová oiporavo oikóvo umi ogovernátavape Itaʼýrandi (Lucas 12:32). Ha ñakomparátaramo chupekuéra ha pe kantida opytátava ko yvy ape ári oiko hag̃ua pára siémpre, jahechakuaa saʼietereiha hikuái. (Elee Apocalipsis 7:4, 9, 17.)