¿Mbaʼérepa jastudia vaʼerã la Biblia?

¿Ndépa reñeporandúmava koʼã mbaʼe? Oime vaʼerã katuete upéicha hína. Heta persóna ko múndo tuichakuére oikuaase avei koʼã mbaʼe. Péro, ¿ikatúne piko oñekontesta ñandéve koʼã porandu?

Heta persóna otopáma la rrespuésta la Bíbliape. Upépe ningo oñembohovái porãiterei umi mbaʼe jaikuaaséva. ¿Ndépa reikuaase avei mbaʼépa omboʼe la Biblia? Upéicharõ ikatu restudia gratiete umi testígo de Jehová ndive, haʼekuéra ovyʼáta ikatu haguére nepytyvõ.a

Oĩ ningo heʼíva naitiempoiha ostudia hag̃ua la Biblia, ijetuʼuetereiha ontende hag̃ua térã ndojagarraseiha kompromíso. Péro ehechamína avei mbaʼépa heʼi heta persóna oasepta vaʼekue peteĩ estúdio de la Biblia.

• “Che aha vaʼekue heta iglésia katólika ha protestántepe, avei peteĩ témplo síjpe, peteĩ monastério vudístape ha astudia teolohía pe universidápe. Péro lomímonte noñekontestapái chéve umi mbaʼe aikuaaséva. Upéi og̃uahẽ ógape peteĩ testígo de Jehová. Ahecharamoiterei oipuru haguére la Biblia okontesta hag̃ua chéve umi mbaʼe aikuaaséva, upévare aasepta astudia hendive la Biblia.” (Gill, Inglaterra.)

• “Oĩ vaʼekue heta mbaʼe chepyʼapýva, ha umi mbaʼe heʼíva chéve pe pastór che iglesiapegua nachekonvenséi vaʼekue. Péro peteĩ testígo de Jehová oipuru la Biblia okontesta hag̃ua chéve umi mbaʼe aikuaaséva, upéva si chekonvense. Ha oporandúrõ guare chéve ndastudiaséipa, pyaʼe voi aasepta.” (Koffi, Benín.)

• “Che aikuaasémi mbaʼépa oiko umi omano vaʼekuégui. Aimoʼã ikatuha ñandeperhudika hikuái, ha aikuaaseterei mbaʼépa heʼi la Biblia upe témare. Upémarõ añepyrũ astudia peteĩ che amígondi, haʼéva testígo de Jehová.” (José, Brasil.)

• “Añepyrũ vaʼekue alee la Biblia, péro nantendéi mbaʼevete. Peteĩ díape, umi testígo de Jehová og̃uahẽ che rógape ha oexplika porãiterei chéve heta profesía oĩva la Bíbliape. Upéva chembokuriósama voi ha aikuaase hetave mbaʼe la Bíbliagui.” (Dennize, México.)

• “Che aikuaasémi añetehápepa Ñandejára ojepyʼapy cherehe, upévare añemboʼe chupe. Al día sigiénte og̃uahẽ ógape umi testígo de Jehová ha añepyrũ astudia hendivekuéra la Biblia.” (Anju, Nepal.)

Koʼã komentário ohechauka porã siertoha Jesús heʼi vaʼekue: “Ovyʼa umi ohechakuaáva oikotevẽha Ñandejárare” (Mateo 5:3). Enterovénte voi ningo ñaikotevẽ Ñandejárare ha la Biblia ñanepytyvõ jaikuaa porãve hag̃ua chupe.

¿Mbaʼéichapa ojejapo peteĩ estúdio vívliko? ¿Mbaʼéichapa upéva ikatu nepytyvõ? Jahechamína koʼã mbaʼe pe ótro artíkulope.