LA BIBLIA OMBOHOVÁI KOʼÃ PORANDU
¿Maʼerãpa ojeskrivi umi profesía oĩva la Bíbliape?
¿Mbaʼérepa la Biblia opredesi umi mbaʼe oikóva koʼág̃a? (Lucas 21:10, 11)
Umi profesía oĩva la Bíbliape oreko heta detálle ha entéro umi mbaʼe oñekumplipa. Ndaipóri ningo ni peteĩ kuimbaʼe ikatúva oikuaa mbaʼépa oikóta tenonderã, Ñandejára añoite ikatu. Upévare jahechávo oñekumpliha umi profesía jaguerovia la Biblia añetehápe haʼeha Ñandejára Ñeʼẽ. (Elee Josué 23:14; 2 Pedro 1:20, 21.)
Umi profesía oñekumplímava ñanepytyvõ jajeroviave hag̃ua Ñandejárare (Hebreos 11:1). Avei omeʼẽ ñandéve segurida oñekumplitaha katuete umi promésa Ñandejára ojapóva amo gotyove g̃uarã. Upévare jaʼekuaa umi profesía omeʼẽha ñandéve esperánsa. (Elee Salmo 37:29; Romanos 15:4.)
¿Mbaʼéichapa ñanepytyvõ umi profesía?
Oĩ profesía oipytyvõva kristianokuérape ojesalva hag̃ua. Por ehémplo, umi kristiáno síglo primeropegua ohechakuaárõ guare oñekumpliha umi profesía heʼíva Jerusalén oñehunditamaha, osẽ upégui. Upe siuda oñehundi vaʼekue pórke la majoría omboyke vaʼekue Jesúspe, péro umi kristiáno iñeʼẽrendúva ojesalva. (Elee Lucas 21:20-22.)
Oĩ heta profesía oñekumplímava ha ohechaukáva Ñandejára Rréino koʼẽrõitéma ohunditaha yvyporakuéra goviérno (Daniel 2:44; Lucas 21:31). Upévare ñande tekotevẽ jajapo Ñandejára oipotáva ikatu hag̃uáicha ñandeguerohory Jesucristo, upe ogovernátava ko Rréino. (Elee Lucas 21:34-36.)