“Pe traváho ningo hetaiterei ha iñimportánte”

JERUSALÉNPE ojejapo peteĩ rreunión iñimportantetereíva. Rréi David ohenói entéro iprinsipekuérape, umi ofisiál ombaʼapóva pe kórtepe ha umi kuimbaʼe omanda guasuvéva upe tetãme. ¿Maʼerãpa ojapo upéva? Omombeʼu hag̃ua chupekuéra Ñandejára onkarga hague itaʼýra Salomónpe omopuʼã hag̃ua peteĩ témplo tuichaitereíva. Upépe ojeadoráta pe úniko Dios verdadérope, Jehová. Entéro umi oĩva pe rreuniónpe ovyʼaiterei ohendúvo upéva. Rréi David, itujámava upérõ guare, ojapo umi pláno Ñandejára espíritu oipytyvõ rupi chupe, ha upéi ontrega itaʼýrape. David heʼi vaʼekue: “Pe traváho ningo hetaiterei ha iñimportánte; pórke pe témplo ojejapótava ndahaʼéi yvypórape g̃uarã, síno Jehovápe g̃uarã” (1 Crón. 28:1, 2, 6, 11, 12; 29:1, TNM).

Upéi, rréi David oporandu umi oĩvape upépe: “¿Mávapa omeʼẽse ipyʼaite guive peteĩ rregálo Jehovápe g̃uarã?” (1 Crón. 29:5, TNM). ¿Mbaʼépa rejapo vaʼerãmoʼã reimérire upépe? ¿Reapojánepa raʼe upe tembiapo? Umi israelita omoĩ ñandéve ehémplo porã. La Biblia heʼi: “Pe puévlo ovyʼaiterei omeʼẽ haguére umi ofrénda voluntária Jehovápe g̃uarã” (1 Crón. 29:9, TNM).

Heta tiémpo upe rire, Jehová ojapo peteĩ mbaʼe tuichaitevéva upe témplogui, péva hína pe témplo espirituál. Kóva haʼe hína umi médio Ñandejára oprepara vaʼekue yvyporakuéra oadora hag̃ua chupe. Ko vendisión ojehupyty Jesús sakrifísio rupive (Heb. 9:11, 12). ¿Mbaʼépa Jehová ojapo ikatu hag̃uáicha umi persóna oñemoag̃ui hese ha oiko porã hendive? Oñenkarga oñemboʼe hag̃ua chupekuéra Iñeʼẽme oĩva (Mat. 28:19, 20). Káda áño oñekondusi hetaiterei estúdio bíblico, avei heta oĩ ojevautisáva ha oñeforma atýra kongregasión.

Upéicha rupi tekotevẽ oñeimprimive puvlikasión, oñemopuʼã ha oñemantene hetave Salón del Reino ha oñekotevẽve lugár ojejapo hag̃ua asambleakuéra. ¿Ajépa hetaite mbaʼe ojehupyty ojepredika rupi umi marandu porã? (Mat. 24:14).

Ñande avei ñameʼẽse ñande pyʼaite guive ñane kontrivusión Jehovápe. ¿Mbaʼérepa? Jahayhúgui chupe ha ñande rapichakuérape, ha avei jahechakuaa rupi mbykypaitemaha la tiémpo ojepredika hag̃ua. Javyʼaiterei ñamombaʼeguasu haguére Jehovápe ha ñameʼẽ rupi chupe “umi mbaʼe iporãvéva jarekóva”. Avei ñandepyʼarory jahechávo ojepuru porãha umi mbaʼerepy, ikatu hag̃uáicha ojejapo hekoitépe pe predikasión. Kóva ningo haʼe pe tembiapo iñimportantevéva ojejapóva ko yvy tuichakuére (Prov. 3:9).

MBAʼÉICHAPA IKATU ÑAKONTRIVUI IÑASÃI HAG̃UA PE MARANDU PORÃ

Heta ningo oĩ omoĩva ikontrivusión pe káha héravape “Obra mundial” oĩva Salón del Réinope (1 Cor. 16:2). Káda mes umi kongregasión omondo koʼã kontrivusión pe sukursálpe. Nde ikatu avei remondo ne kontrivusión pe asosiasión de los testigos de Jehovápe, oĩva ne retãme. Reikuaaséramo pe asosiasión réra, ikatu reñekomunika pe sukursálndi. Reikuaa hag̃ua umi sukursál direksión ikatu reike ko páhinape Internétpe: www.jw.org/gug. Jahechamína mbaʼéichapa ikatu remeʼẽ ne kontrivusión:

DONACIONES INCONDICIONALES

Ikatu retransferi ne kontrivusión umi vánko, tarhéta de krédito, tarhéta de dévito térã nde selulár rupive. Oĩ avei sukursál orresivíva umi donasión jw.org rupive, térã ótra páhina de Internétpe pe sukursál oipurúva.
Ikatu avei redona pláta, aláha térã ambue mbaʼe de valór. Reskrivi vaʼerã peteĩ kárta heʼihápe pe pláta térã ambue mbaʼe remeʼẽva haʼeha peteĩ donación incondicional.

DONACIONES CONDICIONALES

Ikatu remeʼẽ pláta, péro sapyʼa rei reikotevẽramo ikatu rejerure jey.
Rejapo vaʼerã peteĩ kárta heʼihápe reikotevẽramo ikatuha rejerure jey umi mbaʼe remeʼẽva, térã haʼeha peteĩ donación condicional.

DONACIONES PLANIFICADAS

Ndahaʼéi pláta térã kósa de valór añónte ikatúva remeʼẽ. Jahechamína koʼág̃a mbaʼéichapa ikatu avei rekontrivui reapoja hag̃ua pe predikasión ojejapóva ko yvy tuichakuére. Redesidi mboyve mbaʼéichapa redonáta, reñekomunika vaʼerã pe sukursál ndive reikuaa hag̃ua mbaʼéichapa iporãvéta rejapo upéva. Umi léi idiferénte káda paíspe, umíva apytépe umi léi impuésto rehegua, upévare reñemongeta raẽ vaʼerã umi profesionál ndive, ikatu hag̃uáicha omyesakã porã ndéve mbaʼépa okonvenive.

Seguros: Ikatu remoĩ peteĩ segúro de vída térã peteĩ huvilasión pe asosiasión oipurúva testígo de Jehová rérape.

Cuentas bancarias: Ikatu remoĩ pe asosiasión rérape peteĩ kontráto rupive (fideicomiso) umi sertifikádo de depósito, kuénta vankária ha fóndo de huvilasión. Ikatu avei remoĩ pe kontrátope koʼã mbaʼe opytataha pe asosiasiónpe remano rire, péro rejapo vaʼerã upéva pe léi vankária nde paispegua heʼiháicha

Acciones y bonos: Koʼãva ikatu avei redona pe asosiasión oipurúvape testígo de Jehová, térã ejapo peteĩ dokuménto heʼíva koʼã mbaʼe ohasataha pe asosiasiónpe remano rire.

Óga térã terréno: Koʼã mbaʼe ikatu redona testígo de Jehová asosiasiónpe ikatu hag̃uáicha oñevende. Térã oiméramo reiko pype, ikatu pejapo peteĩ akuérdo por eskríto reipurutaha reikove aja, ha remano rire opytataha pe sukursálpe.

Donaciones con renta: Ikatu remeʼẽ pláta térã ambue mbaʼe testígo de Jehová asosiasiónpe, péro pe kontrátope ikatu remoĩ mboýpa reipota ojedevolve ndéve upévagui ha mboy tiémpo rirépa. Remeʼẽ jave koʼãichagua donasión ikatu repaga saʼive impuésto upe áñope.

Testamentos y fideicomisos: Ikatu rejapo peteĩ testaménto eskrivanía rupive, térã peteĩ kontráto de transferénsia opyta hag̃ua testígo de Jehová asosiasiónpe ne terréno, óga térã pláta. Ha upéicha ikatu hína repaga saʼive impuésto.

Ñameʼẽ hag̃ua “donaciones planificadas” ñapensa raẽ vaʼerã mbaʼéichapa jajapóta. Ha jaikuaa hag̃ua upéva, ojejapo peteĩ folléto inglés ha castellánope, hérava Donaciones planificadas para favorecer el servicio del Reino en todo el mundo. Ko folléto omombeʼu mbaʼéichapa ikatu ñadona pláta térã ambue mbaʼerepy, tahaʼe koʼág̃a, amo gotyove térã ñamano rire. Ikatu umi mbaʼe oĩva ko follétope ndaideprovechopái ndéve idiferénte rupi umi léi káda paíspe, umíva apytépe umi léi impuésto rehegua. Koʼã donasión ojepuru ojepredika hag̃ua ha avei oñepytyvõ hag̃ua oiko jave sarambi, por ehémplo desástre naturál. Avei péicha pe okontrivuíva saʼive opaga impuésto. Ko folléto oĩramo ne retãme ikatu rejerure pe sekretário ne kongregasionguápe.

Reikuaasevéramo mbaʼéichapa ikatu rejapo koʼã mbaʼe, eike pe párte heʼihápe “Ojejapo hag̃ua peteĩ donasión” oĩva iguyetépe pe sítio jw.org/gug-pe, térã rehenoikuaa pe sukursálpe.