KO RREVÍSTAPE OÑEANALISA | ¿OEXISTÍPA UMI ÁNHEL?

¿Mávapa añetehápe umi ánhel?

¿Reikuaasépa mávapa umi ánhel? Katuete oiméne reikuaase mbaʼéichapa oñepyrũ oexisti hikuái ha mbaʼe mbaʼépa ojapo. La Biblia ningo Ñandejára Ñeʼẽ, ha pype jatopáta pe añetegua umi ánhel rehe (2 Timoteo 3:16). ¿Mbaʼépa heʼi la Biblia hesekuéra?

Ñandejára ningo peteĩ espíritu, ha upévare ndaikatúi jahecha chupe. Ha umi ánhel upeichaite avei, haʼekuéra ndahetéi ñandéicha. Umi ánhel iñeʼẽrendúva oiko yvágape ha ombaʼapo hikuái Ñandejárandi (Lucas 24:39; Mateo 18:10; Juan 4:24).
Heta vése umi ánhel ou vaʼekue ko yvy ape ári ha oñembohete ñandéicha ojapo hag̃ua Ñandejára omandáva chupekuéra, ha upéi oho jey yvágape peteĩ espírituicha (Jueces 6:11-23; 13:15-20).
La Biblia oñeʼẽramo jepe hesekuéra haʼeramoguáicha kuimbaʼe, haʼekuéra ndahaʼéi ñandéicha oĩva kuña ha kuimbaʼe. Haʼekuéra ndaikatúi omenda ni ifamília. Umi ánhel ningo ndahaʼéi mitã térã kakuaa omano vaʼekue ha ohóva yvágape, síno Jehová voi ojapo vaʼekue káda únope. Upévare la Biblia heʼi hesekuéra haʼeha Ñandejára raʼykuéra (Job 1:6; Salmo 148:2, 5).
La Biblia oñeʼẽ umi yvypóra ha anhelkuéra idiómare, upéva ohechauka umi ánhel ikatuha oñeʼẽ ha orekoha peteĩ idióma. Ñandejára ojevaléramo jepe hesekuéra oñeʼẽ hag̃ua umi yvypórandi, haʼe ndoipotái jaadora ni ñañemboʼe chupekuéra (1 Corintios 13:1; Apocalipsis 22:8, 9).
La Biblia omombeʼu oĩha “hetaiterei ánhel” (Daniel 7:10; Apocalipsis 5:11).a
Umi ánhel ningo ipoderosoiterei ha iñaranduetereive ñandehegui. Ha ndaikatúi voi ni ñañeimahina mbaʼeichaitépa ipyaʼe hikuái (Salmo 103:20; Daniel 9:20-23).
Umi ánhel ipoderosoiterei ha iñarandúramo jepe, oĩnte avei heta mbaʼe ndoikuaáiva ha ndaikatúiva ojapo (Mateo 24:36; 1 Pedro 1:12).
Káda uno umi ánhel idiferénte ojuehegui, Ñandejára ojapo vaʼekue chupekuéra ijoguaháramo ha ñandéicha avei ikatu odesidi ojapótapa iporãva térã ivaíva. Ha ñambyasýramo jepe, oĩ vaʼekue ánhel odesidíva oñemoĩ Ñandejára kóntrape (Judas 6).

a Ko téxtope heʼívo “hetaiterei” ojepuru peteĩ ñeʼẽ griégope heʼiséva diez mil vése diez mil, ha millares de millares.

¿Mbaʼéichapa oĩ organisádo umi ánhel?

Arkánhel. Pe ánhel ipoderosovéva ha orekóva tuichave autorida ningo haʼe Miguel. La Biblia heʼi porã Miguel haʼeha Jesucristo voi (1 Tesalonicenses 4:16; Judas 9).

Umi serafín. Haʼekuéra ombaʼapo Jehová tróno ykerete, upévare ikatu jaʼe haʼekuéra orekoha tuichave priviléhio umi ótro ánhelgui (Isaías 6:1-3).

Umi keruvín. Haʼekuéra oguereko avei tuicha autorida ha ojapo heta tembiapo espesiál Ñandejára omandáva chupekuéra. La Biblia heta vése oñeʼẽ umi mbaʼe ojapóvare hikuái (Génesis 3:24; Ezequiel 9:3; 11:22).

Hetaiterei ánhel ogueraháva Ñandejára mensáhe. Haʼekuéra ojapo Ñandejára omandáva chupekuéra ha oñeʼẽ hérape (Hebreos 1:7, 14).b

b Reikuaasevéramo mbaʼépa heʼi la Biblia umi ánhel rehe, ehecha kapítulo 10 ko lívrogui: Mbaʼépa añetehápe omboʼe la Biblia?, ojapóva testígo de Jehová. Ha pe informasión oĩvéva: “Máva pe arkánhel Miguel?”. Ikatúva avei retopa Internétpe ko direksiónpe: www.jw.org/gug.