KO RREVÍSTAPE OÑEANALISA | ¿OEXISTÍPA UMI ÁNHEL?
¿Mbaʼéichapa ñanepytyvõ umi ánhel?
Umi ánhel oñeinteresaiterei yvyporakuérare ha ombaʼapo meme hikuái ojapo hag̃ua Jehová rembipota. Ñandejára ojapórõ guare ko yvy, umi ánhel osapukái vaʼekue vyʼágui (Job 38:4, 7). Ymaite guive, hiʼãiterei chupekuéra ontende umi profesía Ñandejára oikuaauka vaʼekue umi profétape (1 Pedro 1:11, 12).
La Biblia ohechauka sapyʼánte Ñandejára ojevale hague umi ánhel rehe osalva hag̃ua isiervokuérape (Salmo 34:7). Jahechamína algúno ehémplo:
Jehová ohundírõ guare Sodoma ha Gomorra, mokõi ánhel oipytyvõ vaʼekue Lot ha ifamíliape ojesalva hag̃ua (Génesis 19:1, 15-26).
Umi tres hebréope oñemombórõ guare peteĩ tatakua rendýpe omano hag̃ua, Ñandejára “ombou peteĩ ánhel osalva hag̃ua chupekuéra” (Daniel 3:19-28, TNM).
Daniel oĩ vaʼekue peteĩ pyhare pukukue león apytépe, péro haʼe heʼi ndojehúi hague chupe mbaʼevete pórke Ñandejára “ombou peteĩ ánhelpe ha omboty umi leonkuéra juru” (Daniel 6:16, 22, TNM).
Ymaite guive Jehová oipuru umi ánhelpe oipytyvõ hag̃ua isiervokuérape
UMI ÁNHEL OIPYTYVÕ UMI KRISTIÁNO YPYKUÉPE
Sapyʼánte Jehová omanda vaʼekue umi ánhelpe oipytyvõ hag̃ua umi kristiáno ypykuépe. Jahechamína algúno ehémplo:
Umi apóstolpe ojeguerahárõ guare kárselpe, peteĩ ánhel oavri pe okẽ, olivera chupekuéra ha heʼi osegi hag̃ua hikuái opredika pe témplope (Hechos 5:17-21).
Peteĩ ánhel heʼi Felípepe osegi hag̃ua pe tape ohóva desiértore Jerusaléngui Gázape, opredika hag̃ua peteĩ etíopepe, ohóva hína kuri Jerusalénpe omombaʼeguasu hag̃ua Ñandejárape (Hechos 8:26-33).
Ñandejára odesidírõ guare umi ndahaʼéivagui hudío oikotamaha avei kristiáno, peteĩ ánhel ojeaparese Cornéliope peteĩ visiónpe ha heʼi chupe oinvita hag̃ua hógape apóstol Pédrope (Hechos 10:3-5).
Apóstol Pédrope ojeguerahárõ guare kárselpe, peteĩ ánhel olivera chupe upégui (Hechos 12:1-11).
MBAʼÉICHAPA ÑANEPYTYVÕ UMI ÁNHEL
Ndaikatúi ningo japrova Ñandejára oipuruha hína koʼág̃a umi ánhelpe oipytyvõ hag̃ua milagrósamente umi héntepe, ojapo haguéicha yma. Péro Jesús heʼi vaʼekue mbaʼépa oikóta ñane tiémpope: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mateo 24:14). ¿Ndépa reikuaa umi ánhel omotenondeha hína ko tembiapo?
Umi ánhel oipytyvõ ikatu hag̃uáicha oñemog̃uahẽ umi notísia porã ko yvy tuichakuére
Lívro de Apocalipsis omombeʼu umi ánhel ombaʼapo kyreʼỹtaha oipytyvõ hag̃ua umi héntepe oikuaa hag̃ua mbaʼépa hína Jehová rembipota ñandéve g̃uarã. Apóstol Juan heʼi vaʼekue: “Ahecha ótro ánhel ovevéva yvága mbytére, orekóva marandu porã opytátava opa ára g̃uarã. Haʼe oikuaauka ko marandu umi oikóvape ko yvy ári, entéro tetã, trívu, puévlo ha umi oñeʼẽvape opaichagua idiómape. Ha hatã heʼi: ‘Pekyhyje Ñandejáragui ha pembotuicha chupe, cháke og̃uahẽma pe óra haʼe oporohusga hag̃ua. Upévare, pemombaʼeguasúke Ñandejárape, upe ojapo vaʼekue yvága, yvy, mar ha yvukuéra’” (Apocalipsis 14:6, 7). Heta experiénsia koʼag̃agua ohechauka umi ánhel oapoja memeha pe predikasión ojejapóva ko yvy tuichakuére. La Biblia heʼi avei Ñandejára anhelkuéra ovyʼaitereiha peteĩ pekadór oñarrepentíramo ha oñemoag̃ui jey Jehováre (Lucas 15:10).
¿Ha mbaʼépa oikóta opa vove pe predikasión? Jesús pe omandapáva entéro rréire ha ijehérsito oĩva yvágape oñorairõta “Ñandejára Ipuʼakapáva ára guasúpe”, hérava Armagedón (Apocalipsis 16:14-16; 19:14-16). Umi ánhel ipoderosoitéva oipytyvõta Jesúspe ha “okastigáta [...] umi naiñeʼẽrendúivape umi marandu porãme, oñeʼẽva ñande Ruvicha Jesús rehe” (2 Tesalonicenses 1:7, 8).
Ikatu reime segúro umi ánhel ojepyʼapyha nderehe ha entéro oservisévape guive Ñandejárape. Jahecha haguéicha, Jehová oipuru meme vaʼekue umi ánhelpe omombarete ha oprotehe hag̃ua isiervokuérape ko yvy ape ári (Hebreos 1:14).
Upévare káda uno jadesidi vaʼerã peteĩ mbaʼe iñimportantetereíva: ¿jaaseptátapa pe notísia porã oñemombeʼúva hína ko yvy tuichakuére? Umi testígo de Jehová ovyʼaitereíta ikatúramo ohechauka ndéve mbaʼéichapa umi ánhel ipoderosoitéva ikatu nepytyvõ ndéve avei koʼág̃arupi.