¿Mbaʼérepa iñimportánte ñaneumílde?

1, 2. ¿Mbaʼérepa Jehová omboyke Saúlpe? (Ehecha pe taʼanga oĩva iñepyrũme).

SAÚL iñumílde vaʼekue Jehová oiporavórõ guare chupe oiko hag̃ua chugui rréi (1 Sam. 9:1, 2, 21; 10:20-24). Péro oñepyrũ rire ogoverna, ou oñembotuicha. Peteĩ jey, hetaiterei filisteo ou oñorairõ hag̃uáicha umi israelítandi. Upérõ Saúl ohaʼarõ vaʼerã kuri Samuel ou hendápe ikatu hag̃uáicha ko proféta oofrese peteĩ sakrifísio Jehovápe. Péro Saúl ohecha mbaʼéichapa heta israelita okyhyje ha oñepyrũ ohejarei pe lugár oñeñorairõtahápe. Upémarõ ojedesespera ha oofreséntema pe sakrifísio. Péro haʼe ndorekói kuri autorida ojapo hag̃ua upéva. Upéicha rupi Jehová ipochy hese (1 Sam. 13:5-9).

² Samuel og̃uahẽrõ guare Saúl rendápe, omongavaju chupe naiñeʼẽrendúi haguére Jehovápe. Péro ko rréi norrekonoséi ojavy hague. Upéva rangue, omoĩ exkúsa ha omboja ótrore hembiapo vaikue (1 Sam. 13:10-14). Upe guive Saúl osegi oñembotuicha, ha Jehová ndoguerohoryvéima chupe (1 Sam. 15:22, 23). Jahechaháicha, ñepyrũrã Saúlpe oho porã kuri, péro upéi ou oñembotuicha ha upéva káusare opa vai (1 Sam. 31:1-6).

3. a) ¿Mbaʼépa opensa heta persóna umi iñumíldevare? b) ¿Mbaʼépa ñambohováita ko artíkulope?

³ Ñane tiémpope oĩ oimoʼãva iñumílderamo ndaikatumoʼãiha ohupyty mbaʼeve ko múndope. Upévare oñepyrũ oñembotuicha oipotágui ojeʼe hese iñimportanteveha hapichágui. Por ehémplo, peteĩ persóna ifamósova, haʼéva aktór ha polítiko heʼi: “Che apensa voi ndaiporiha mbaʼeve ikatuʼỹva ajapo, ha ekapáde siémpre apensa upéicha”. ¿Mbaʼérepa kristianokuéra tekotevẽterei iñumílde? ¿Mbaʼépa heʼise ñaneumílde, ha mbaʼépa ndeʼiséi upéva? Ko artíkulope ñambohováita koʼã porandu. Ha pe ótro oúvape jahecháta mbaʼéichapa ikatu jasegi ñaneumílde, sapyʼánte hasýramo jepe jajapo hag̃ua upéva.

¿MBAʼÉREPA IÑIMPORTÁNTE ÑANEUMÍLDE?

4. ¿Mbaʼépa heʼise ñañembotuicha?

⁴ La Biblia ohechauka porã mbaʼeichaitépa idiferénte peteĩ persóna iñumíldeva peteĩ oñemombaʼeguasúvagui (elee Proverbios 11:2). David ojerure asy vaʼekue Jehovápe: “Chepytyvõmína ani hag̃ua aiko añembotuichase” (Sal. 19:13, TNM). ¿Mbaʼépa heʼise ñañembotuicha? Heʼise jajapoha peteĩ mbaʼe ndajarekóiramo jepe derécho ni autorida jajapo hag̃ua, tahaʼe nañanepasiénsiai rupi térã ñandeorgullósogui. Entéro ningo ñaneimperfékto, upéicha rupi oime vaʼerã jajapóma raʼe peteĩ mbaʼe ohechaukáva ñañembotuicha hague. Péro ñaaprende haguéicha rréi Saúl ehémplogui, ñañepyrũramo ñañemombaʼeguasu, ñambopochýta Jehovápe. Salmo 119:21 heʼi mbaʼépa Ñandejára ojapo peichagua persónare: “Nde rekondena umi oñemombaʼeguasúvape” (TNM). ¿Mbaʼérepa Jehová ojapo upéva?

5. ¿Mbaʼérepa naiporãiete ñañepyrũ ñañembotuicha?

⁵ ¿Mbaʼérepa ivaiete ñañemombaʼeguasu? Primero, pórke péicha jahechauka hína ndajarrespetaiha Ñandejára ha ñane Governántepe, Jehová. Segundo, jajapóramo peteĩ mbaʼe ndajarekóiva autorida jajapo hag̃ua, ikatu ñaneprovléma ñande rapichándi (Prov. 13:10). Ha tercero, ikatu ñañemotĩ umi ótro ohechakuaávo ñañembotuichaseha (Luc. 14:8, 9). Ndareíri ningo Jehová oipota ñaneumílde.

¿MBAʼÉPA HEʼISE ÑANEUMILDEHA?

6, 7. ¿Mbaʼéichapa opensa umi persóna iñumíldeva?

⁶ Umi persóna orrekonoséva oĩha heta mbaʼe ndaikatumoʼãiva ojapo, ohechauka iñumildeha. Koʼãichagua persóna noñembotuichái, ha oñemeʼẽ enkuénta oĩha ótro ikatupyryvéva chugui (Filip. 2:3). Avei orrekonose ojavy jave, ohendu ótro heʼíva ha oikuaa ikatuha oaprende chugui. Añetehápe Jehová oguerohoryeterei umi iñumíldevape.

⁷ La Biblia heʼi umi persóna iñumíldeva oikuaaha moõ pevépa omeʼẽ ikapasida, ha orrekonose oĩha heta mbaʼe ikatuʼỹva ojapo, tahaʼe noñepermitíri rupi chupe térã ndaikatupyrýigui upearã. Opensa rupi upéicha, orrespeta hapichápe ha otrata porã chupe.

8. ¿Mbaʼéichapa naiporãi ñapensa jasegiséramo ñaneumílde?

⁸ Nañañatendéiramo, ikatu ñañembotuicha ñañemeʼẽʼỹre enkuénta. Por ehémplo, ikatu ñapensa ñaneimportanteveha ñande rapichakuéragui pórke jareko algún priviléhio kongregasiónpe térã peteĩ ñane amígo oreko rupi (Rom. 12:16). Térã ikatu voi ñañepyrũ jajechaukase (1 Tim. 2:9, 10). Ỹrõ jaʼeséma voi ótrope mbaʼépa ojapo térã ndojapói vaʼerã (1 Cor. 4:6).

9. ¿Mbaʼérepa heta persóna oñepyrũ oñembotuicha? Emombeʼu peteĩ ehémplo oĩva la Bíbliape.

⁹ Nañakontroláiramo umi deséo vai, ikatu jaju ñañemombaʼeguasu. Hetárema oiko upéva oipotágui ótro ombotuicha chupe, iñenvidióso térã ndojejokói rupi ipochy jave. La Biblia omombeʼu oĩ hague persóna ijorgullósova, por ehémplo Absalón, Uzías ha Nabucodonosor. Péro Jehová oumilla chupekuéra upe haguére (2 Sam. 15:1-6; 18:9-17; 2 Crón. 26:16-21; Dan. 5:18-21).

10. ¿Mbaʼérepa ndovaléi jahusga avavépe? Emombeʼu peteĩ ehémplo oĩva la Bíbliape.

¹⁰ ¿Mbaʼérepa sapyʼánte ikatu ñapensa peteĩ persóna tekotevẽha iñumildeve? Ñapensamína Abimélec ha Pédrore (Gén. 20:2-7; Mat. 26:31-35). ¿Ikatúpa jaʼe hesekuéra oñemombaʼeguasu hague? ¿Oĩpa raʼe algúna kósa ndoikuaáiva hikuái, térãpa oĩ umi mbaʼe ojapónteva opensa porãʼỹre? Ñande ndajaikuaái mbaʼépa oreko kuri ipyʼapýpe koʼã kuimbaʼe, upévare ndovaléi jahusga chupekuéra (elee Santiago 4:12).

ÑANE ASIGNASIÓN ÑANDEJÁRA ORGANISASIÓNPE

11. ¿Mbaʼépa oikuaa porã umi kristiáno iñumíldeva?

¹¹ Umi kristiáno iñumíldeva oikuaa mbaʼépa oñehaʼãrõ chuguikuéra Ñandejára organisasiónpe. Jehová ndojapói mbaʼeve sarambikuépe. Haʼe omeʼẽ káda únope peteĩ asignasión kongregasiónpe, upévare entéronte ñandedeprovécho. Jehová ñanembokatupyry imbaʼeporã rupi, ha oheja jadesidi mbaʼéichapa jaipurúta umi avilida omeʼẽva ñandéve. Ñaneumílderamo, ñañehaʼãmbaitéta ñambovyʼa chupe (Rom. 12:4-8). Jehová oipota jaipuru ñande avilida ñambotuicha hag̃ua chupe ha ñaipytyvõ hag̃ua ótrope (elee 1 Pedro 4:10).

12, 13. ¿Mbaʼépa iporã ñanemanduʼa okambia jave ñane situasión?

¹² Umi mbaʼe jajapóva Jehová servísiope ikatu okambia kon el tiémpo. Ñapensamína Jesús ohasa vaʼekuére. Ñepyrũrã, haʼe oiko vaʼekue haʼeño Itúandi (Prov. 8:22). Upéi, oipytyvõ Jehovápe ojapo hag̃ua umi ánhelpe, pe univérso ha yvyporakuérape (Col. 1:16). Upe rire Jehová omeʼẽ Jesúspe ótra asignasión. Ombou chupe ko yvy ape ári, onase peteĩ mitãraʼýicha ha upéi oiko chugui peteĩ kuimbaʼe okakuaapámava (Filip. 2:7). Omano rire, oho jey yvágape ha oiko jey chugui peteĩ espíritu. Ha áño 1914-pe oñepyrũ ogoverna Ñandejára Rréino (Heb. 2:9). Amo gotyove katu, omohuʼã vove igoviérno de Mil Áño, ontrega jeýta pe Rréino Jehovápe. Upe tiémpo guive “Ñandejára añoite omoakãta opa mbaʼe” (1 Cor. 15:28).

¹³ Ñane situasión ikatu avei okambia. Por ehémplo, ñande ikatu jadesidi ñamenda térã ñanefamília. Térã jajapo unos kuánto kámbio ikatu hag̃uáicha jaservi de tiémpo kompléto. Péro sapyʼánte ñane situasión okambia ñahaʼarõʼỹre. Por ehémplo, ndaikatuvéi jajapo heta mbaʼe yma guaréicha, térã oñepresenta ñandéve peteĩ oportunida jajapove hag̃ua Jehová servísiope. Ikatu avei ñanemitã, ñandeeda térã ñanderasykatu. Péro tahaʼe haʼéva ñane situasión, Jehová oikuaa porã mbaʼéichapa ñandedeprovechovéta chupe. Haʼe arakaʼeve nohaʼarõi jajapo peteĩ mbaʼe noĩriva ñande posivilidápe. Ñandejára omombaʼeterei opa mbaʼe jajapóva hesehápe (Heb. 6:10).

14. ¿Mbaʼérepa peteĩ persóna iñumíldeva oñeñandu porã umi mbaʼe ikatúvare ojapo kongregasiónpe?

¹⁴ Jesús vyʼápe okumpli vaʼekue umi asignasión Itúa omeʼẽva chupe, ha ñande avei ikatu jajapo upéva (Prov. 8:30, 31). Pe persóna iñumíldeva orrekonose mbaʼépa añetehápe ikatu ojapo. Upévare ovyʼa umi asignasión orekóvare kongregasiónpe. Haʼe ndojesarekói umi ótro ojapóvare, síno ovyʼa umi mbaʼe haʼe ikatúvare ohupyty Jehová organisasiónpe. ¿Mbaʼérepa? Pórke oikuaa porã haʼeha Jehová la omeʼẽva chupe umi rresponsavilida. Pe persóna iñumíldeva orrespeta umi ermánope ha oipytyvõ chupekuéra. Avei orrekonose Jehová omeʼẽha káda únope peteĩ asignasión kongregasiónpe (Rom. 12:10).

¿MBAʼÉPA NDEʼISÉI ÑANEUMILDEHA?

15. ¿Mbaʼépa ikatu ñaaprende Gedeón ehémplogui?

¹⁵ Gedeón ohechauka vaʼekue iñumildeha. Peteĩ vuéltape, Jehová omandárõ guare chupe odefende hag̃ua Israélpe umi madianítagui, haʼe heʼi: “Che rogaygua umi imboriahuvéva Manasés apytépe, ha che ningo pe imitãvéva che ru rógape” (Juec. 6:15, ÑÑB). Upéicharõ jepe, Gedeón ojerovia Jehováre ha oasepta pe asignasión. Upéi ojasegura porã mbaʼépa añetehápe Ñandejára oipota ojapo, ha oñemboʼe chupe oheka hag̃ua igía (Juec. 6:36-40). Gedeón imbarete ha ipyʼaguasu vaʼekue, péro avei iñarandu ha opensa porã kuri ojapo mboyve peteĩ mbaʼe (Juec. 6:11, 27). Upéi umi hénte ojerurérõ guare chupe ogoverna hag̃ua, haʼe ndoaseptái. Okumpli rire pe asignasión Jehová oenkarga vaʼekue chupe, oho jeýnte hógape (Juec. 8:22, 23, 29).

16, 17. ¿Mbaʼépa ojapo vaʼerã peteĩ kristiáno iñumíldeva oprogresa hag̃ua?

¹⁶ Peteĩ persóna oaseptáva peteĩ asignasión pyahu térã orekosevéva rresponsavilida kongregasiónpe, ndeʼiséi naiñumildeiha. La Biblia heʼi iporãha Ñandejára siervokuéra oñehaʼãve oservi iñermanokuérape ha oprogresa ohóvo espirituálmente (1 Tim. 4:13-15). Péro natekotevẽi ningo jarresivi peteĩ asignasión pyahu japrogresa hag̃ua. Entéronte ikatu ñamehora kómo kristiáno, ha ñandekatupyryve jaservi porã hag̃ua Jehovápe ha ñane ermanokuérape.

¹⁷ Pe persóna iñumíldeva ohecha ikatútapa okumpli porã peteĩ asignasión oasepta mboyve. Oñemboʼe Jehovápe ha ojepyʼamongeta ohecha hag̃ua orekótapa tiémpo oñatende hag̃ua ambue rresponsavilida, ha ipuʼakátapa upe asignasiónre. Ohechakuaárõ ndaikatumoʼãiha, naiprovlémai oñemeʼẽnteramo ótro ermánope pe tembiapo. Pe persóna iñumíldeva odesidi ndoaseptái peteĩ rresponsavilida ndaikatumoʼãirõ okumpli. Ñande avei ñaneumílderamo, ndajajagarramoʼãi peteĩ kompromíso ndaikatumoʼãirõ ñakumpli porã.

18. a) ¿Mbaʼépa ojapo peteĩ persóna iñumíldeva orresivi jave peteĩ asignasión pyahu? b) ¿Mbaʼéichapa Romanos 12:3 heʼíva ñanepytyvõ ñaneumílde hag̃ua?

¹⁸ Jehová oipota ñaneumílde ha ñarrekonose oĩha heta mbaʼe ndaikatúiva jajapo (Miq. 6:8). Upévare, oñemeʼẽramo ñandéve peteĩ asignasión pyahu, jajerure Jehovápe tañandegia ha tañanepytyvõ, Gedeón ojapo haguéicha. Ñapensa porã mbaʼépa Jehová heʼi ñandéve la Biblia ha iñorganisasión rupive. Ani ñanderesarái Jehová iñumílde rupínte ñanembokatupyryha jajapo hag̃ua heta mbaʼe iservísiope, ndahaʼéi ñandevaleterei haguére (Sal. 18:35). Ñaneumílderamo, ndajaikomoʼãi ñapensaiterei ñandejehénte (elee Romanos 12:3).

19. ¿Mbaʼérepa tekotevẽ ñañehaʼãmbaite ñaneumílde hag̃ua?

¹⁹ Peteĩ persóna iñumíldeva orrekonose Jehová añoite omereseha oñembotuicha chupe, haʼégui ñande Apohare ha Ñandejára Ijojahaʼỹva (Apoc. 4:11). Avei ovyʼa umi mbaʼe ikatúvare ojapo Jehová servísiope. Orrespeta iñermanokuéra opensáva ha oñandúva, ha upéva oipytyvõ oĩ hag̃ua unida kongregasiónpe. Peteĩ persóna iñumíldeva opensa porã ojapo mboyve peteĩ mbaʼe, upévare ojei heta akãrasýgui. Jehová ningo oguerohoryeterei umichagua persónape. Upévare, entéro jaservíva Ñandejárape ñañehaʼãmbaite vaʼerã ñaneumílde. Pe artíkulo oúvape jahecháta mbaʼépa ñanepytyvõta jasegi hag̃ua ñaneumílde, sapyʼánte hasýramo jepe jajapo upéva.