Jaservíkena Jehovápe ñande pyʼaite guive

1-3. ¿Mbaʼépa heʼise jaservi Jehovápe ñande pyʼaite guive? Emoĩ peteĩ ehémplo.

ENTÉRONTE ñaneimperfékto ha jajavy meme. Péro javyʼaiterei pórke Jehová omeʼẽ Itaʼýra ñanderehehápe ha oĩ ñaneperdona hag̃uáicha. Ñaneumílderamo ha ñañarrepenti, ikatu jajerure chupe tañaneperdona. La Biblia heʼi: “Ñande japeka ha ñamerese kuri Ñandejára ñandekastiga, péro haʼe ndojapói upéva” (Sal. 103:10, TNM). Upéicharõ jepe, jaservi vaʼerã Jehovápe ñande “pyʼaite guive” (1 Crón. 28:9, TNM). Péro, ¿mbaʼéicha piko jajapóta upéva ñaneimperféktoramo?

² Ñantende hag̃ua upéva, jahechami mbaʼépepa idiferénte vaʼekue mokõi rréi Judagua hérava Asá ha Amasías. Mokõivéva ojapo heta mbaʼe porã, ha avei ojavy mimi iñimperfékto rupi. Péro la Biblia heʼi: “Asá katu oservi vaʼekue Jehovápe ipyʼaite guive oikove aja entéro” (2 Crón. 15:16, 17, TNM; 25:1, 2; Prov. 17:3). Haʼe oñehaʼã meme ojapo umi mbaʼe ombovyʼátava Jehovápe, ha oservi chupe ikorasõ mbytete guive (1 Crón. 28:9). Péro Amasías ndoservíri Jehovápe “ipyʼaite guive”. Ogana rire Ñandejára enemigokuérape, ogueraha chuguikuéra umi taʼanga orekóva hikuái ha oñepyrũ oadora umívape (2 Crón. 25:11-16, TNM).

³ Peteĩ persóna oservíva Ñandejárape ipyʼaite guive ohayhueterei chupe ha oadorase chupe opa árare. La Bíbliape, pe palávra pyʼaite térã korasõ heʼise jepi mbaʼeichagua persónapa ñande, por ehémplo ñapensa lája, mbaʼépa jahayhu, mbaʼépa jahupytyse, ha mbaʼépa ñanemomýi jajapo hag̃ua peteĩ mbaʼe. Ñaneimperféktoramo jepe, ikatu jaadora Jehovápe ñande pyʼaite guive. Ñande jaservi chupe jajaposégui upéva, ndahaʼéi jajepokuaágui ni jajapo vaʼerãgui reínte (2 Crón. 19:9, TNM).

4. ¿Mbaʼépa jahecháta koʼág̃a?

⁴ Ñantende porãve hag̃ua mbaʼépa heʼise jaservi Jehovápe ñande pyʼaite guive, iporãta ñahesaʼỹijóramo Asá ha mbohapy rréi Judagua rembiasakue. Koʼãva héra Jehosafat, Ezequías ha Josías. Koʼã 4 rréi ojavýramo jepe, ojapo umi mbaʼe ombovyʼáva Ñandejárape. ¿Mbaʼéicha rupípa Jehová ohechakuaa hesekuéra oserviha chupe ipyʼaite guive? ¿Mbaʼéichapa ikatu jasegi koʼa rréi ehémplo?

ASÁ OSERVI JEHOVÁPE “IPYʼAITE GUIVE”

5. ¿Mbaʼépa ojapo vaʼekue Asá oñepyrũrõ guare ogoverna?

⁵ Asá haʼe vaʼekue pe tercer rréi Judagua, Israel ojedividi rire mokõi rréinope, pe rréino de Judá ha pe rréino de Israel. Asá oñepyrũrõ guare ogoverna Judá, ojedesidi ndohejamoʼãveimaha ojeadora umi dios fálsope, ha omosẽtaha pe témplogui umi kuimbaʼe ojeprostituívape. Asá ohundi umi mbaʼe ojepurúva ojeadora hag̃ua umi dios fálsope. Hiʼarive “oipeʼa avei ipuéstogui ijavuéla Maacápe, haʼe ningo rréina vaʼekue. Oipeʼa chupe upégui pórke haʼe ojapo vaʼekue peteĩ taʼanga tieʼỹ ojeadora hag̃ua pe póste sagrádo” (1 Rey. 15:11-13, TNM). Avei Asá omokyreʼỹ pe puévlope “oservi hag̃ua Jehovápe” ha “okumpli hag̃ua umi iléi ha imandamientokuéra”. Asá ojapo opa ikatúva oipytyvõ hag̃ua ótrope oadora hag̃ua Jehovápe (2 Crón. 14:4, TNM).

6. ¿Mbaʼépa ojapo Asá umi etíope oatakátarõ guare Judá?

⁶ Ñepyrũrã, Asá ogoverna aja 10 áñore, Judápe oĩ kuri pyʼaguapy pórke noñorairõi ni peteĩ tetãndi. Upéi umi Etiopiagua ou 1 millón soldádo ha 300 kárro reheve oñorairõ hag̃ua Judá kóntrape (2 Crón. 14:1, 6, 9, 10). ¿Mbaʼépa ojapo upémarõ Asá? Haʼe ni michĩmi ndodudái Jehová ikatutaha oipytyvõ ipuévlope. Upévare oñemboʼe ikatu hag̃uáicha Jehová oipytyvõ chupekuéra ogana hag̃ua pe gérra (elee 2 Crónicas 14:11). Ñandejára ombohovái Asá ñemboʼe ha oipytyvõ Israélpe ogana hag̃ua iñenemigokuérape (2 Crón. 14:12, 13). Héra rehehápe, Jehová oipytyvõ vaʼekue heta rréipe ogana hag̃ua umi gérra naiñeʼẽrendúiramo jepe hikuái (1 Rey. 20:13, 26-30). Jehová oipytyvõ ipuévlope Asá ojerovia rupi hese. Upe rire, Asá ou tuicha ojavy, pórke ojerure ajúda rréi de Síriape, ojerure rangue Jehovápe (1 Rey. 15:16-22). Upéicharõ jepe, Jehová ohechakuaa Asá ohayhuha chupe. La Biblia heʼi: “Asá katu oservi vaʼekue Jehovápe ipyʼaite guive oikove aja entéro”. ¿Mbaʼéichapa ikatu jasegi Asá ehémplo? (1 Rey. 15:14, TNM).

7, 8. ¿Mbaʼéichapa ikatu jasegi Asá ehémplo?

⁷ Entéronte tekotevẽ jahecha oimépa jaservi hína Jehovápe ñande pyʼaite guive. Iporãta ñañeporandúramo: “¿Cheñeʼẽrendútapa Jehovápe ahasáramo jepe peteĩ situasión ijetuʼúva? ¿Aimépa desidído añehaʼãmbaitetaha ikatu hag̃uáicha siémpre ipotĩ pe kongregasión?”. Ñapensamína mbaʼeichaitépa ipyʼaguasu vaʼekue Asá oipeʼárõ guare ijavuélagui pe puésto orekóva pe goviérnope. Sapyʼánte ñande tekotevẽ avei ñandepyʼaguasu ojapo haguéicha Asá. Por ehémplo, ¿mbaʼépa jajapóta peteĩ ñane hénte térã ñane amigoite oúramo opeka, noñarrepentíri ha oñemosẽ kongregasióngui? ¿Ñañehaʼãtapa anive hag̃ua jajeheʼa hese? ¿Mbaʼépa añetehápe jajapose?

⁸ Asá rehe oiko haguéicha, sapyʼánte ikatu reñandu oĩha heta oñemoĩva nderehe. Por ehémplo, ikatu ne kompañéro de eskuéla térã de koléhio ỹrõ nde profesór, oñembohory nderehe nde haʼe haguére testígo de Jehová. Térã ne kompañéro de traváho ikatu heʼi nderehe ndevyroitereiha reipuru haguére ne vakasión reho hag̃ua asambleahápe, térã nderejapomeméi haguére óra éxtra reganave hag̃ua. Upéicha jave rejerovia vaʼerã Ñandejárare ojapo haguéicha Asá. Eñemboʼe Jehovápe, ndepyʼaguasu ha esegi ejapo pe iporãva. Aníkena nderesarái Ñandejára omombarete hague Asápe ha katuete nemombaretetaha avei ndéve.

9. ¿Mbaʼérepa ñambovyʼa Jehovápe japredika jave?

⁹ Asá nopensái vaʼekue ijehénte, haʼe omokyreʼỹ avei ótrope “oservi hag̃ua Jehovápe”. Ñande avei ñaipytyvõ vaʼerã umi héntepe oadora hag̃ua Jehovápe. Haʼe ovyʼaiterei ñañeʼẽ jave hese jahayhúgui chupe ha jaipotágui haʼekuéra ojesalva.

JEHOSAFAT OSERVI JEHOVÁPE IPYʼAITE GUIVE

10, 11. ¿Mbaʼéichapa ikatu jasegi Jehosafat ehémplo?

¹⁰ Jehosafat ningo Asá raʼy, ha haʼe “osegi ojapo opa mbaʼe itúa Asá ojapo haguéicha” (2 Crón. 20:31, 32, TNM). Por ehémplo, Jehosafat omokyreʼỹ avei pe puévlope osegi hag̃ua oadora Jehovápe. Avei omondo kuri unos kuánto kuimbaʼépe Judápe, ikatu hag̃uáicha omboʼe pe puévlope “Jehová lívro de la léi” (2 Crón. 17:7-10, TNM). Hiʼarive, oho pe rréino de Israel territóriope, nórte gotyo, umi sérrore oĩva Efraínpe, ikatu hag̃uáicha “omokyreʼỹ umi héntepe oadora jey hag̃ua Jehovápe” (2 Crón. 19:4, TNM). Rréi Jehosafat “oservi vaʼekue Jehovápe ipyʼaite guive” (2 Crón. 22:9, TNM).

¹¹ Jehová ningo oipota entéro umi hénte oikóva ko yvy tuichakuére oaprende chugui, ha ñande ikatu ñaipytyvõ upearã. ¿Ñañehaʼãpa ñamboʼe ñande rapichakuérape Ñandejára Ñeʼẽ káda mes, ikatu hag̃uáicha haʼekuéra avei oservi Jehovápe? ¿Ñañemboʼépa Jehovápe ikatu hag̃uáicha ñanevendesi ha ñanepytyvõ ñamoñepyrũ hag̃ua peteĩ estúdio bíblico? ¿Ñaĩpa dispuésto jaipurúvo pe tiémpo ñamboykéma vaʼekue japytuʼu térã jajediverti hag̃ua? Jehosafat oñehaʼã vaʼekue oipytyvõ hetápe oservi jey hag̃ua Jehovápe, ñande avei ikatu jasegi iñehémplo ha ñaipytyvõ umi inaktívope. Avei, ansianokuéra ojapo arréglo ikatu hag̃uáicha ovisita umi expulsádo oikóvape ikongregasión territóriope, ha posívlemente ohejámava hembiapo vai. Péicha oreko hikuái oportunida oñemoag̃ui jeývo Jehováre.

12, 13. a) ¿Mbaʼépa ojapo Jehosafat okyhyjérõ guare? b) ¿Mbaʼérepa jasegi vaʼerã Jehosafat ehémplo?

¹² Ojapo haguéicha itúa Asá, Jehosafat ojerovia vaʼekue Jehováre peteĩ ehérsito tuicháva oatakátarõ guare Judá (elee 2 Crónicas 20:2-4). Haʼe okyhyje kuri, upémarõ ojerure Jehovápe ajúda. Oñemboʼérõ guare orrekonose haʼekuéra ndaikatumoʼãiha ipuʼaka iñenemigokuérare, avei heʼi haʼe ha pe puévlo ndoikuaaiha mbaʼépa ojapóta. Jehosafat ni michĩmi ndodudái Jehová ikatuha oipytyvõ chupekuéra. Haʼe heʼi vaʼekue: “Nderehe añoite rojerovia” (2 Crón. 20:12, TNM).

¹³ Oiko haguéicha Jehosafat rehe, sapyʼánte ikatu jahasa peteĩ provléma ha ñañepyrũ jakyhyje pórke ndajaikuaái mbaʼépa jajapóta (2 Cor. 4:8, 9). Péro ani ñanderesarái Jehosafat ojapo vaʼekuégui. Haʼe oñemboʼe kuri pe puévlo renondépe ha omombeʼu Jehovápe mbaʼeichaitépa oñedesanima hikuái (2 Crón. 20:5). Iporãta umi omoakãva hogapy osegíramo Jehosafat ehémplo. Ojerurekuaa Jehovápe toipytyvõ chupe ha ifamíliape ogueropuʼaka hag̃ua umi situasión ijetuʼúva, ha oikuaa hag̃ua mbaʼépa ikatu ojapo hikuái. Umi omoakãva hogapy notĩri vaʼerã oñemboʼe hag̃ua hogayguakuéra rovake. Péicha ifamília ohechakuaáta mbaʼeichaitépa ojerovia Jehováre. Ñandejára ningo oipytyvõ vaʼekue Jehosafátpe, ha katuete penepytyvõta avei peẽme.

EZEQUÍAS OSEGI OJAPO IPORÃVA

14, 15. ¿Mbaʼéichapa Ezequías ohechauka ojeroviaha Jehováre?

¹⁴ Ezequías haʼe avei ótro rréi “oñakãrama hatã vaʼekue Jehováre”. Haʼe ojapo upéva itúa oadoráramo jepe umi taʼanga ha nomoĩriramo jepe chupe ehémplo porã. Ezequías “oipeʼa vaʼekue umi lugár yvate, omonguʼi umi kolúmna sagráda, ha oikytĩ pe póste sagrádo. Haʼe omonguʼi avei pe mbói raʼanga de kóvre Moisés ojapo vaʼekue”, pórke umi israelita oadora upe taʼanga. Ezequías oadora Jehovápe ipyʼaite guive, ha “osegi okumpli umi mandamiénto Jehová omeʼẽ vaʼekue Moiséspe” (2 Rey. 18:1-6, TNM).

¹⁵ Ezequías ogovernaha tiémpope, pe ehérsito asírio imbaretetéva ou Judá kóntrape ohundi hag̃ua Jerusalén. Pe rréi asírio hérava Senaquerib oñembohory Jehováre, ha oñehaʼã omokangy Ezequíaspe ikatu hag̃uáicha oñentrega. Upe situasión ipeligrosoitévape, Ezequías ojerovia Jehováre ipyʼaite guive ha ojerure chupe ajúda. Haʼe oikuaa porã Ñandejára ipoderosoitereiveha umi asíriogui, ha ikatuha osalva ipuévlope (elee Isaías 37:15-20). Jehová ombohovái Ezequías ñemboʼe ha omondo peteĩ ánhel ojuka hag̃ua 185.000 soldádo asíriope (Is. 37:36, 37).

16, 17. ¿Mbaʼéichapa ikatu jasegi Ezequías ehémplo?

¹⁶ Tiémpo rire, Ezequías ou hasyete. Upémarõ ojerure asy Jehovápe imanduʼami hag̃ua mbaʼéichapa haʼe oservi chupe ipyʼaite guive, ha oipytyvõmi hag̃ua chupe (elee 2 Reyes 20:1-3). Jehová ohendu Ezequías ñemboʼe ha omonguera chupe. La Biblia rupive ñande jaikuaa koʼã tiémpope ndaikatuiha ñahaʼarõ Ñandejára ojapo peteĩ milágro ñanemonguera hag̃ua, térã jaiko areve hag̃ua. Péro Ezequías ojapo haguéicha, jajerovia vaʼerã Jehová ñanepytyvõtaha. Ikatu avei jajerure chupe ñane ñemboʼépe: “Jehová, ajerure ndéve nemanduʼami hag̃ua mbaʼéichapa cheñeʼẽrendu ha ajapo che pyʼaite guive ne rembipota”. ¿Rejeroviápa Jehová siémpre oñangarekotaha nderehe rejúramo jepe nderasy? (Sal. 41:3).

¹⁷ ¿Mbaʼéichapa ikatu avei jasegi Ezequías ehémplo? Ikatu oĩ algúna kósa ñandejokóva ñaime porã hag̃ua Jehovándi, térã hoʼuetereíva ñane tiémpo jaservi porã hag̃ua chupe. Koʼág̃arupi heta oĩ ombotuichaitereíva hapichápe, umi ifamósovape térã peteĩ ni ndoikuaáivape. Avei haʼekuéra oipurueterei itiémpo olee hag̃ua umi mbaʼe oskrivíva koʼã persóna térã ohecha hag̃ua umi fóto ohupíva hikuái. Haʼekuéra pyʼỹi oipuru pe rréd sosiál térã ambue mbaʼe oñekomunika hag̃ua hapichakuérandi Internet rupive. Añetehápe ningo ndaivaíri jaipuru koʼã mbaʼe ñañekomunika hag̃ua ñane hénte térã ñane amigokuérandi. Péro naiporãmoʼãi japerdeterei tiémpo koʼã mbaʼépe. Ikatu voi jaju ñañemombaʼeguasu jahecháramo oĩha heta persóna okomentáva térã ogustáva umi fóto jahupíva Internétpe. Avei ikatu ñañeofende ñañemeʼẽramo enkuénta saʼivéma oĩha omañáva umi mbaʼe jahupívare. Ñapensamína Pablo, Áquila ha Priscílare. Haʼekuéra oikórire ñane tiémpope, ¿oñemoĩnepa raʼe tódo el día ohupi fóto térã ambue taʼanga? ¿Olee ha okomentánepa raʼe hikuái umi mbaʼe oñemoĩva pe rred sosiálpe, koʼýte ndahaʼéiramo Testígo la ohupíva? La Biblia heʼi: “Pablo oñemeʼẽmbaite opredika hag̃ua Ñandejára Ñeʼẽ”. Áquila ha Priscila katu oipuru itiémpo opredika ha “omyesakã porãve” hag̃ua “Ñandejára rape” hapichakuérape (Hech. 18:4, 5, 26). Iporãta ñañeporandúramo: “¿Añatendépa ani hag̃ua aalavaiterei peteĩ yvypórape? ¿Aikópa hína aperdeterei che tiémpo ajapo hag̃ua umi mbaʼe naiñimportanteguasúiva?” (elee Efesios 5:15, 16).

JOSÍAS OKUMPLI JEHOVÁ MANDAMIENTOKUÉRA

18, 19. ¿Mbaʼépa jajapo vaʼerã jasegi hag̃ua Josías ehémplo?

¹⁸ Josías haʼe vaʼekue Ezequías visniéto ha avei okumpli Jehová mandamientokuéra “ipyʼaite guive” (2 Crón. 34:31, TNM). Imitãrusúpe haʼe “oñepyrũ oservi David járape”. Ha orekópe 20 áño, oñepyrũ ohundi umi taʼanga oĩva Judápe (elee 2 Crónicas 34:1-3). Josías oñehaʼãmbaite ikatu hag̃uáicha ombopyʼarory Jehovápe. Añetehápe haʼe ojapo hetaiteve mbaʼe porã umi ótro rréigui. Peteĩ jey, peteĩ saserdóte prinsipál otopa Ñandejára léi pe témplope. Amalisia péva haʼe kuri pe lívro Moisés voi oskrivi vaʼekue. Josías sekretário oleérõ guare chupe la oĩva pype, haʼe oñemeʼẽ enkuénta tekotevẽha ojapove oservi hag̃ua Jehovápe ipyʼaite guive. Josías omokyreʼỹ avei ótrope ojapo hag̃ua upéva. Upéicha rupi, pe puévlo “osegi ojapo Jehová heʼíva” Josías oikove aja (2 Crón. 34:27, 33, TNM).

¹⁹ Oiméramo nde nemitã, ikatu hína resegi Josías ehémplo, ha eñehaʼã eikuaa porãve Jehovápe. Oime vaʼerã Josías oaprende heta mbaʼe Manasésgui, haʼéva ijavuélo oñarrepenti vaʼekue hembiapo vaígui. Nde avei ikatu reaprende heta mbaʼe umi ermáno ijedávagui oĩva ne kongregasiónpe. Haʼekuéra omombeʼukuaa ndéve umi mbaʼe porã Jehová ojapóma vaʼekue hesekuéra. Avei, nemanduʼami mbaʼéichapa oñeñandu kuri Josías oleérõ guare Ñandejára Ñeʼẽ heʼíva. Haʼe oĩ dispuésto ojapóvo opa ikatúva ombovyʼa hag̃ua Jehovápe, ha ensegída ojapo umi kámbio tekotevẽva. Nde avei releéramo la Biblia, reĩvéta desidído neñeʼẽrendu hag̃ua Jehovápe. Upéi ne amista hendive imbaretevéta ha revyʼavéta. Avei reñeʼẽséta voi Jehováre umi héntepe (elee 2 Crónicas 34:18, 19). Restudia jave la Biblia ha rehechakuaa tekotevẽha reservi porãve Ñandejárape, eñehaʼãmbaite ejapo umi kámbio, Josías ojapo haguéicha.

ESERVI JEHOVÁPE NDE PYʼAITE GUIVE

20, 21. a) ¿Mbaʼépepa ojojogua vaʼekue umi 4 rréi? b) ¿Mbaʼépa jahecháta pe artíkulo oúvape?

²⁰ ¿Mbaʼépa ñanemboʼe koʼã 4 rréi Judagua oservi vaʼekue Jehovápe ipyʼaite guive? Haʼekuéra ojedesidi ojapotaha opa ikatúva ombovyʼa hag̃ua Jehovápe, ha oadorataha chupe oikove aja pukukue. Avei koʼa rréi okonfia Ñandejárare iñenemigokuéra ipoderosoitéva oúrõ guare oataka hag̃ua chupekuéra. Ha la iñimportanteveha, haʼekuéra oservi Jehovápe ohayhúgui chupe.

²¹ Koʼã rréi ningo iñimperfékto ha ojavy, upéicharõ jepe Ñandejára oguerohory chupekuéra. Jehová ohecha mbaʼépa oreko hikuái ipyʼapýpe ha oikuaa haʼekuéra ohayhuha chupe. Ñande avei ñaneimperfékto ha jajavy. Péro Jehová ñandeguerohorýta ohechávo jaserviha chupe ñande pyʼaite guive. Pe artíkulo oúvape jahecháta mbaʼépa ikatu ñaaprende umi mbaʼe vai ojapo vaʼekuégui umi rréi.