Reguerekóramo peteĩ mbaʼasy ijetuʼuetereíva

“Oñemombeʼúrõ guare chéve arekoha kánser, haʼete voi chéve añekondenáva amano hag̃ua. Upéi ag̃uahẽ ógape ha apensa: ‘Vuéno, che nahaʼarõiete kuri kóva, péro ahecha vaʼerã mbaʼéichapa ikatu ambohovái ko situasión’” (Lidia, orekóva 71 áño).

“Areko peteĩ mbaʼasy hasyetereíva chéve ha oafektáva un ládo che rova. Sapyʼánte hasyetereígui chéve ajúma añedeprimi. Heta vése añeñandu cheañoite ha apensa voi ajesuisidávo” (Elisa, orekóva 49 áño).

Peteĩ karai hasykatúva ha oĩva sílla de rruédape oĩ umi persóna ohayhúvandi

OIMÉRAMO nde térã peteĩ rehayhúva oreko peteĩ mbaʼasy igráveva ha ikatúva voi oporojuka, upe situasión ijetuʼueterei hína. Ndahaʼéi voi pe mbaʼasy káusarente síno avei pórke rejepyʼapyeterei ha oguapy avei nderehe pe oikóva. Koʼýte pórke péicha jave ojeho vaʼerã doktórpe, ojejapo vaʼerã heta tratamiénto hepýva ha ndojetopáiva oimeháme, ha sapyʼánte umi pohã ou omoñeñandu vai pe pasiéntepe. Entéro koʼã mbaʼe ikatu oempeorave la situasión. Oĩ jave orekóva peteĩ mbaʼasy ijetuʼuetereíva sapyʼánte ndajaikuaái ni mbaʼépa jajapóta.

¿Mbaʼépa ikatu nepytyvõ péicha jave? Heta héntepe okonsola umi mbaʼe oaprendéva la Bíbliagui ha oñemboʼévo Ñandejárape. Ne família ha ne amigokuéra ningo nderayhueterei ha ikatu avei nepytyvõ ha nekonsola.

MBAʼE MBAʼÉPA IKATU REJAPO

Roberto orekóva 58 áño heʼi: “Regueropuʼaka hag̃ua ne mbaʼasy rejerovia vaʼerã Ñandejárare, haʼe katuete nepytyvõta reaguanta hag̃ua. Ejerure Jehovápe ijespíritu sánto ha emombeʼu chupe mbaʼéichapa reñeñandu. Ejerure chupe nemombarete hag̃ua ha tanepytyvõ ndepositívo hag̃ua. Péicha ikatúta emokyreʼỹ ne famíliape ha peaguanta pyʼaguapýpe pe situasión ijetuʼuetéva”.

Roberto heʼi avei: “Iñimportanteterei ñane família oĩ ñande ykére ñanepytyvõ hag̃ua. Chéve cherenói jepi hikuái por teléfono káda día, ha oporandu chéve mbaʼetekópa aha hese. Che amigokuéra avei chemokyreʼỹeterei. Koʼã mbaʼe chemoñeñandu porã ha chepytyvõ ani hag̃ua añentrega”.

Rehótaramo evisita peteĩ persóna hasykatúvape iporãta erekóramo enkuénta Lidia heʼi vaʼekue: “Peteĩ hasykatúva ningo ndahaʼéi katuete oñeʼẽsétava siémpre imbaʼasýre. Oiméne ovyʼavéta reñeʼẽramo chupe umi mbaʼe jajapóvare jepi normálmente. Upévare iporãvéta reñeʼẽramo umi mbaʼére”.

Aníke nderesarái Ñandejára nepytyvõ ha nekonsolataha la Biblia rupive, avei ne família ha ne amigokuéra ikatu hína oĩ nde ykére. Upévare, oiméramo reguereko peteĩ mbaʼasy ijetuʼuetereíva, aníkena reñentrega.

Téxto bíblico ikatúva nepytyvõ

Ejerovia Ñandejárare

“Che añemboʼe Jehovápe ha haʼe cherendu. Ñandejára chepytyvõ anivéma hag̃ua akyhyje. Jehová, che ndahaʼéi mbaʼevete asy ne renondépe, péro nde cherendu añemboʼe jave ndéve” (Salmo 34:4, 6).

Lidia heʼi: “Añemboʼe jave Ñandejárape che núnka ndaʼéiva chupe: ‘Chemonguerána por favór’. Upéva rangue siémpre ajerure chupe: ‘Emeʼẽna chéve fuérsa, chepytyvõna aaguanta hag̃ua ko mbaʼasy’”.

La Biblia nemombaretéta

“Ni peteĩ oikóva ko yvy ape ári ndeʼimoʼãvéima: ‘Cherasy hína’” (Isaías 33:24).

Epensa umi mbaʼe porã Ñandejára oprometévare ojapotaha amo gotyove. Upéva omeʼẽta ndéve esperánsa ha nepytyvõta reaguanta hag̃ua.

Ejerure ne família ha ne amigokuérape tanepytyvõ

“Peteĩ amígo verdadéro nderayhúta tódo el tiémpo, haʼe ningo ne ermáno oĩva nde ykére rehasa asy jave” (Proverbios 17:17).

Elisa heʼi avei: “Ani reñemohaʼeño, eheja ne amigokuéra tanepytyvõ. Sapyʼánte ikatu repensa reĩha neaño ha Ñandejára nanerenduiha, péro aníkena reñemohaʼeño”.