Netraisionáramo ne ména térã ne rembireko

“Che ningo amanose kuri che ména heʼírõ guare cherejataha peteĩ kuña imitãvévare. Hetaiterei ajesakrifika vaʼekue hesehápe, ha namereséi ojapo cherehe péicha” (María, España).

“Apyta vaʼekue yvýre che rembireko degolpete cherejárõ guare. Umi mbaʼe roplanea ha rojapose vaʼekue oñondive opa reiete. Sapyʼánte haʼete vaʼekue la añeñandu porãmiéva, péro upéi oguapyeterei jey cherehe la oiko vaʼekue” (Miguel, España).

IJETUʼUETEREI ningo oĩ jave otraisionáva iména térã hembirekópe. Péro oĩ algúno oporoperdonáva ha oiko porã jeýva imatrimóniope.a Tahaʼe haʼeháicha, pe persóna oñetraisiona vaʼekue opyta oñeñandu vaieterei. Upéicharõ, ¿mbaʼépa ikatu oipytyvõ peteĩ ohasávape ko situasiónre ogueropuʼaka hag̃ua?

TÉXTO BÍBLICO IKATÚVA NEPYTYVÕ

Peteĩ persónape otraisionáramo iména térã hembireko heta osufri, pórke hasyeterei chupe la oikóva. Upéicharõ jepe hetápe okonsola umi mbaʼe oĩva la Bíbliape. Haʼekuéra oñemeʼẽ enkuénta Ñandejára ohecha ha ontende porãitereiha umi mbaʼe ohasáva (Malaquías 2:13-16).

“Añekevrantaitereírõ guare ha pe kevránto cheahoʼipa, nde chekonsola ha chembopyʼaguapy” (Salmo 94:19).

Miguel heʼi: “Aleévo pe versíkulo, añeimahina Jehová chemokunuʼũha hína ojapoháicha peteĩ túa ohayhuetereíva ifamíliape”.

“Ñandejára, nde núnka nderehejái umi nanderejáivape” (Salmo 18:25).

Cármenpe ningo otraisiona vaʼekue iména heta mésere. Haʼe omombeʼu: “Che ména chetraisiona vaʼekue. Péro aime segúra Jehová ndacherejamoʼãiha ha siémpre oĩtaha che ykére”.

‘Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo ha pejerure asývo. Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare’ (Filipenses 4:6, 7).

Sara omombeʼu: “Alee jey jey ningo ko téxto. Ha amáske añemboʼe Ñandejárape añandu mbaʼéichapa haʼe chembopyʼaguapy”.

Umi persóna omombeʼúva iñexperiénsia ko rrevístape sapyʼánte opensa vaʼekue ikuentaveha oñentregántema. Péro haʼekuéra ojerovia Jehováre, ha la Biblia oipytyvõ chupekuéra. Miguel heʼi voi: “Opa mbaʼe ojere vaipaitérõ guare chéve, ajerovia rupi Ñandejárare ikatu aaguanta ha asegi adelánte. Ha ijetuʼuetereíramo jepe la ahasáva ‘ndakyhyjéi’, pórke haʼe oĩ vaʼekue che ykére” (Salmo 23:4).

a Ikatu retopa hetave informasión umi artíkulo héravape “Cuando el cónyuge es infiel”, osẽ vaʼekue rrevísta ¡Despertad! del 22 de abril de 1999-pe.

Mbaʼe mbaʼépa ikatu rejapo

Ejepyʼamongeta umi téxto nemokyreʼỹtavare

Miguel heʼi: “Alee pe lívro de Job ha upéi umi Salmo ha amarka umi párte ohóva la che situasiónre. Ahechakuaa umi eskritór bíblico ohasa hague heta mbaʼe che ahasáva koʼág̃a, haʼekuéra ojepyʼapy ha osufri vaʼekue avei chéicha”.

Umi músika ikatu nemoñeñandu porã

Carmen heʼi: “Pyharekue ndaikatúi vaʼekue ake ha upémarõ ahendu músika. Upéva chekonsola vaʼekue”. Daniel heʼi avei: “Añepyrũ astudia ambopukuaa hag̃ua mbaraka ha upéva chepytyvõ chepyʼaguapyve hag̃ua”.

Emombeʼu ótrope mbaʼéichapa reñeñandu

Daniel heʼi: “Che ningo ndajepokuaái vaʼekue amombeʼu mbaʼéichapa añeñandu. Péro areko heta amígo ikalidaitereíva ha añemongeta hendivekuéra káda día. Amombeʼupaite vaʼekue chupekuéra la añandúva, sapyʼánte askrivi mbaʼéichapa añeñandu térã haʼe voi chupekuéra. Upéva tuicha chepytyvõ kuri”. Sara heʼi: “Che família tuichaiterei chepytyvõ vaʼekue. Tekotevẽramo guare añemongeta, che sy siémpre oĩ cherendu hag̃uáicha. Ha añeñandu segúra pórke che túa siémpre oĩ che ykére, upéva chepytyvõ vaʼekue ajerrekupera hag̃ua ahávo”.

Eñemboʼe meme

Carmen heʼi: “Añemboʼe vaʼekue tódo el tiémpo. Añandu Ñandejára oĩha che ykére cherendu ha chepytyvõ hag̃ua. Añandu avei añemoag̃uiveha Ñandejárare ahasa aja pe situasión ijetuʼuetéva”.