Peñomombarete memékena ojupe
1 Pe apóstol Pablo ojapo ikatúva guive omombarete hag̃ua iñirũnguérape (Hech 14:19-22). Upéicha avei, ñande jajepyʼapy ñane ermanokuérare ohasa asy vove hikuái, ha ñaipytyvõse chupekuéra. Ñandejára Ñeʼẽ ohechauka ñandéve opavavete jajepyʼapyvaʼerãha ñande rapichakuérare, ndahaʼéi umi ansiáno añónte (Rom. 15:1, 2). Jahecháta mokõi mbaʼe ikatúva jajapo ñahendu hag̃ua ko marandu: “Peñomokyreʼỹ memékena ojupe, ha peñomombaretékena ojupe, upe pejapoháichama voi peikóvo” (1 Tes. 5:11).
2 Jahechakuaavaʼerã mbaʼépa oikotevẽ ñande rapicha. Ñandejára Ñeʼẽ omombeʼu Dorcas ‘heta hembiapo porã hague ha heta omeʼẽhague iporiahuverekógui’ (Hech. 9:36, 39). Haʼe ohechakuaavaʼekue mávapa oikotevẽ ha ojapo ikatúva oipytyvõ hag̃ua chupekuéra. Ajépa iporã pe ehémplo ohejavaʼekue! Nde ikatu rehendu peteĩ ijedáva oikotevẽha peteĩ oguerahavaʼerã chupe rreunionhápe. Térã ikatu oĩ peteĩ precursor ndoguerekóiva iñirũrã peteĩ kaʼaru osẽ hag̃ua opredika. Nde rehechakuaáramo upéva, ha reñekuaveʼẽramo reipytyvõ hag̃ua, ajépa tuicha remokyreʼỹta chupe!
3 Ñañemongeta umi téma espirituál rehe. Ikatu avei ñamombarete ñande rapichápe umi mbaʼe ñañeʼẽva rupive (Efe. 4:29). Peteĩ ansiáno ikatupyrýva heʼi: “Ñamombaretétaramo ñande rapichápe, ñañeʼẽvaʼerã umi mbaʼe espirituál rehe. Reñepyrũ hag̃ua ikatu reporandu: ‘Ndépa mbaʼéicha reikuaa ypy pe añetegua?’ Ehechauka rejepyʼapy añeteha umi mitãrusukuérare pe kongregasiónpe. Eñehaʼã eñemongeta umi ikangýva ndive ha umi hiʼotĩva ndive (Pro. 12:25). Reñemongeta vove umi ermanokuéra ndive, ani pembotapykue umi mbaʼe espirituál peñeʼẽtereígui umi vyʼarãrente (Rom. 1:11, 12).
4 Ha mbaʼépa ikatu ere remombarete hag̃ua nde rapichápe? Releekuévo, térã restudiakuévo Ñandejára Ñeʼẽ neañohápe, mbaʼe prinsípiopa retopa nepytyvõva rehayhuve hag̃ua Jehovápe? Nemokyreʼỹpa peteĩ mbaʼe rehenduvaʼekue peteĩ diskúrsope térã peteĩ estúdio de La Atalaya-pe? Térã opokópa ne korasõre peteĩ eysperiénsia omombaretéva nde jerovia? Iñimportánteramo ndéve umi mbaʼe espirituál iporãitereíva, reguerekóta katuete pe erevaʼerã remokyreʼỹ hag̃ua nde rapichápe (Pro. 2:1; Luc. 6:45).
5 Jasegíkena ñañomombarete ojupe ñañekuaveʼẽ rupive ñaporopytyvõ hag̃ua ha jaiporu porã rupive ñane ñeʼẽ (Pro. 12:18).