Prográma ñane famíliape g̃uarã: Japredika hag̃ua oñondive
1 Jehová ovyʼa mitãrusukuéra omomorãramo héra (Sal. 148:12, 13). Jesús oikórõ guare ko Yvy ape ári, umi ‘mitãraʼy ha okambúva omomorã’ avei Ñandejárape (Mat. 21:15, 16). Upeichaite koʼág̃a avei. Peẽ tuvakuéra, mbaʼéichapa ikatu peipytyvõ pene famíliape omomorã hag̃ua kyreʼỹme Jehovápe predikasionhápe? Koʼápe avei, jahechahaguéicha pe artíkulo rreunión reheguápe, pene ehémplo iñimportantetereíta. Peteĩ túva heʼivaʼekue, ohechauka mbaʼéichapa oñandu opavave nunga tuvakuéra: “Mitãnguéra ndojapói pe ereháicha; ojapo pe rejapoháicha”.
2 Peteĩ ermána, okakuaavaʼekue itúva ha isy testígo ndive, imanduʼa: “Ore noropuʼãiva sábado pyharevekue roporandu rosẽtapa predikasionhápe. Ore roikuaáma voi rosẽtaha”. Upéicha avei, nde ikatu reipytyvõ ne famíliape omombaʼe hag̃ua pe predikasión pejepokuaáramo pesẽmba oñondivepa predikasionhápe káda semána. Upépe pene família oaprendéta pendehegui ohechávo mbaʼéichapa pejapo, ha peẽ ikatúta pehecha mbaʼépa ojapo hikuái, heko porãpa, ha mbaʼépepa ikatupyryvekuaa hikuái.
3 Pemboʼe ikatupyryve hag̃ua. Mitãnguéra ovyʼa hag̃ua predikasionhápe, ojepreparavaʼerã opartisipa porã hag̃ua. Pe ermána yvateve oñeʼẽvaʼekue, heʼi avei: “Ore ndorohóiva ore tuvakuéra ndive roime hag̃ua haʼekuéra opredikahápe. Roikuaa ropartisipavaʼerãha avei, tahaʼe jepe rombopu hag̃ua tímbrente térã roheja hag̃ua peteĩ tratádo. Rojeprepara porã vaʼekue og̃uahẽ mboyve pe predikasión fín de semanagua, ha roikuaa mbaʼépa roʼéta”. Peẽ ikatu avei pembokatupyry pene famíliape opredika hag̃ua. Ikatu pemboyke michĩmi pene tiémpo káda semána peprepara hag̃ua chupekuéra pestudia aja oñondivepa térã opyta porãve jave.
4 Pene família osẽ jave opredika oñondivepa ikatu avei peñeʼẽ meme chupekuéra ohayhu hag̃ua ohóvo pe añetegua. Peteĩ túva oguerahámi itajýrape oho jave omeʼẽ hag̃ua tratádo peteĩ távape peteĩ sérro paʼũme. Oguata hikuái 10 kilómetro ohokuévo ha upéicha jey oukuévo. “Roguata aja rohóvo”, imanduʼa torýpe itajýra, “che ru chepytyvõ oike hag̃ua che korasõme Ñandejára Ñeʼẽ” (Deu. 6:7). Ñandejára tapenevendesi avei pemoĩhaguére predikasión káda semána pe prográma pene família oguerekóvape.