Ñaipytyvõ ñande raʼykuérape ikatupyryve hag̃ua ohóvo predikasionhápe
1 Túva ha sy oipytyvõvaʼerã itaʼyrakuérape oñepyrũ hag̃ua predikasionhápe imitãite guive. Jahecháta mbaʼéichapa ikatu upéva ojejapo. Oĩ mitã ikatúva heʼi iñakãgui peteĩ téysto vívliko oleekuaa mboyve. Umi ohendúva ikatu ohecharamoiterei upéva. Okakuaávo pe mitã, ikatúma ojapove ohóvo predikasionhápe. Mbaʼéichapa ikatu peẽ tuvakuéra peipytyvõ pene famíliape oñepyrũ hag̃ua opredika? Oĩ koʼã mbaʼe ikatúva penepytyvõ.
2 Remomaitei rire pe óga járape, ikatu ere:
◼ Che raʼy [emombeʼu héra], oguereko peteĩ téysto vívliko iñimportánteva ohechaukasemíva ndéve”. Nde raʼy ikatu heʼi: “Ko téysto Sálmope oĩva chemboʼe mbaʼéichapa héra Ñandejára [pe mitã olee térã heʼi iñakãgui Salmo 83:18]. Koʼã rrevísta omombeʼu mbaʼépa Ñandejára Jehová ojapóta ñanderehe. Ikatúpa aheja ndéve?” Opa hag̃ua erekuaa pe óga járape ikatuha okontrivui ko tembiapópe g̃uarã, ojejapóva oparupiete.
3 Ikatu avei reñepyrũ kóicha:
◼ “Mbaʼéichapa. Amboʼeʼaína che memby kuñáme [emombeʼu héra] iporãha ojepyʼapy hapichakuérare ko ñande távape. Haʼe ohechaukase ndéve peteĩ marandu iporãitereíva oĩva Ñandejára Ñeʼẽme.” Pe mitãkuña ikatu heʼi: “Aipytyvõ hag̃ua che rapichakuérape, amombeʼuʼaína pe esperánsa omeʼẽva Ñandejára Ñeʼẽ ñane renonderãme g̃uarã [Pe mitãkuña olee térã heʼi iñakãgui Revelación 21:4]. Koʼã rrevísta omombeʼu mbaʼépa ojapóta avei Ñandejára Rréino ñanderehehápe. Chéverõ g̃uarã ndegustaitereíta”.
4 Oiporu meméramo peteĩ presentasión ndahasýiva, pe mitã ohecháta ikatuha oñeʼẽ pe marandu porãgui. Oñensajáramo oñentende porã hag̃ua pe heʼíva ha oñeʼẽ hatã porã hag̃ua, ikatúta oñeʼẽ oimehápe. Ojeprepara porãramo osẽ mboyve, ha remomorãramo hembiapo pe mitã ikatúta oñeʼẽ umi mbaʼe ogueroviávagui.
5 Upéicha oñepytyvõhaguére, hetã mitãguima oiko puvlikadór ndojevautisáiva gueteri. Ajépa javyʼa jahechávo ñane mitãnguéra ikatupyryveha ohóvo pe predikasionhápe (Sal. 148:12, 13).