Jaiporu meme hag̃ua
Jajapo estúdio vívliko oñakãrapuʼãva
Ko supleméntope oñemoĩ umi mbaʼe iñimportantevéva osẽvaʼekue Ñane Rembiapo Rréino Rehegua-pe ohechauka hag̃ua mbaʼéichapa jajapovaʼerã peteĩ estúdio vívliko oñakãrapuʼãva. Romokyreʼỹ opavavépe peñongatu hag̃ua ko supleménto, peiporu hag̃uáicha pejapo vove peteĩ estúdio vívliko. Ko supleménto ikatu ojeporu avei ojejapo vove umi rreunión oñesẽ hag̃ua predikasionhápe, ha umi superintendénte de servísio ikatu oiporu oprepara hag̃ua pe diskúrso omeʼẽva ovisita jave umi grúpo de estúdio de lívro.
Párte 1: Mbaʼépa peteĩ estúdio vívliko?
Remboʼe meméramo la Bíbliagui peteĩ tapichápe, mbykymíramo jepe, reiporuhápe la Biblia ha peteĩ ñane puvlikasión oĩva upearã, rejaporeína peteĩ estúdio vívliko. Remoñepyrũ rire pestudia jeýramo dos vése, ha rehecháramo osegitaha, ikatúma reinforma (km-S 7/04 páhina 1).
Puvlikasionkuéra ikatúva jaiporu:
◼ Mbaʼépa ojerure Ñandejára ñandehegui?
◼ El conocimiento que lleva a vida
◼ Adoremos al único Dios verdadero
◼ Ikatu oiko ñandehegui Ñandejára amigo ojeporukuaa oñemboʼe hag̃ua umi ndohoguasuivaʼekue eskuélape térã umi saʼi oleévape.
Párte 2: Mbaʼéichapa ikatu jajeprepara jajapo hag̃ua peteĩ estúdio
Tekotevẽ ñameʼẽ pe informasión opoko hag̃uáicha ñane estudiánte korasõre. Upearã jajeprepara porã vaʼerã ha ñapensavaʼerã pe estudiánte oikotevẽvare (km-S 8/04 páhina 1).
Mbaʼéichapa ikatu jajeprepara.
◼ Ehecha raẽ pe téma oñemeʼẽva, umi subtema ha umi taʼanga ojeporúva.
◼ Eheka retopa peve umi ñembohovái oñemeʼẽva umi porandúpe, emarka umi ñeʼẽ térã fráse mbykymi oñekotevẽhápente.
◼ Ehecha mbaʼe téystopa releéta pe estúdio aja. Pe párrafo ykére, ikatu rehai umi mbaʼe reikotevẽtava.
◼ Eprepara peteĩ rrepáso rejapótava umi mbaʼe iñimportantevévagui.
Epensa ne estudiántere repreparávo peteĩ leksión.
◼ Eñemboʼe ne estudiántere ha umi mbaʼe oikotevẽvare.
◼ Epensa mbaʼépa hasýta pe estudiántepe ontende térã oguerovia hag̃ua.
◼ Ejepyʼamongeta koʼã mbaʼére: ‘Mbaʼépa tekotevẽ ontende térã ojapo ikatu hag̃uáicha oñakãrapuʼã espiritualménte? Mbaʼéichapa ikatu apoko ikorasõre?’
◼ Oñekotevẽháicha, eprepara peteĩ komparasión, mbaʼéichapa remyesakãvéta, térã umi mbaʼe ikatúva reporandu reipytyvõ hag̃ua ne estudiántepe ontende porã hag̃ua peteĩ téma térã peteĩ téysto vívliko.
Párte 3: Jaiporu porã Ñandejára Ñeʼẽ
Jajapo peteĩ estúdio vívliko ‘jajapo hag̃ua disípulo’. Upearã ñaipytyvõ umi tapichápe ontende ha oguerovia hag̃ua umi mbaʼe omboʼéva Ñandejára Ñeʼẽ ha oiporu hag̃ua hekovépe pe oaprendéva (Mat. 28:19, 20; 1 Tes. 2:13). Upévare, ñamotenondevaʼerã Ñandejára Ñeʼẽ pe estudiohápe (km-S 11/04 páhina 4).
Ñamboʼe Ñandejára Ñeʼẽgui.
◼ Ehechauka pe estudiántepe mbaʼéichapa ikatu otopa ibíbliape peteĩ téysto ohekáva.
◼ Peheka ha pehesaʼỹijo umi téysto vívliko ohechaukáva mbaʼérepa jaguerovia peteĩ mbaʼe.
◼ Eporandu chupe. Remyesakãrangue peteĩ téysto vívliko ne estudiántepe, eheja haʼe tojapo.
◼ Ndahasyivaʼerã oñentende hag̃ua pe remboʼéva. Ani rehesaʼỹijo opa mbaʼe oĩva peteĩ téysto vívlikope. Ehecha pe oñekotevẽvante oñentende porã hag̃ua peteĩ mbaʼe.
◼ Ehechauka mbaʼéichapa ikatu jajapo peteĩ téysto vívliko heʼíva. Eipytyvõ ne estudiántepe ohecha hag̃ua mbaʼéichapa haʼe ikatu oiporu upéva hekovépe.
Párte 4: Mbaʼéichapa ikatu ñamboʼe ñane estudiántepe ojepreparakuaa hag̃ua
Peteĩ estudiánte oleéva pe informasión pestudia mboyve, omarkáva umi ñembohovái, ha opensáva mbaʼéichapa heʼíta iñeʼẽtẽme, ikatúta oñakãrapuʼã pyaʼe espiritualménte. Upévare, rehecha vove pe estúdio osegitaha, peprepara peteĩ leksión oñondive ohecha hag̃ua mbaʼéichapa ojepreparavaʼerã. Heta estudiántepe oipytyvõta pepreparapaitéramo oñondive peteĩ kapítulo térã peteĩ leksión (km-S 12/04 páhina 1).
Oñemarka ha ojehai hag̃ua.
◼ Ehechauka mbaʼéichapa ojetopa umi porandukuéra ñembohovái.
◼ Ehechauka ne estudiántepe pe puvlikasión nde reiporúva, remarkahaguépe umi ñeʼẽ térã fráse oñekotevẽvante.
◼ Ehechauka chupe umi téysto oĩha omboʼe hag̃ua peteĩ mbaʼe pe párrafope, ha ehechauka avei mbaʼéichapa ikatu ohai mbykymi pe párrafo ykére umi mbaʼe oñekotevẽva.
Mbaʼépa ohecha raẽ vaʼerã mbykymi oñepyrũ hag̃ua ostudia, ha mbaʼéichapa ojapovaʼerã pe rrepáso
◼ Ehechauka ne estudiántepe mbaʼéichapa ohecha raẽ vaʼerã pe téma, umi subtema ha umi taʼanga oñepyrũ hag̃ua ostudia.
◼ Emokyreʼỹ chupe ohecha jey hag̃ua umi mbaʼe iñimportantevéva ojepreparapa vove.
Párte 5: Jahechavaʼerã mboýpa iporãta jastudia
Pe estudiánte ha pe oporomboʼéva ikatupyryháicha, ha isituasionkuérare, odepende mboýpa ojestudiáta (km-S 1/05 páhina 1).
Emombarete ijerovia.
◼ Iñimportanteve ñane estudiánte ontende porã pe ostudiáva jastudiarangue hendive hetaiterei informasión.
◼ Eiporu pe tiémpo oñekotevẽva ikatu hag̃uáicha pe estudiánte ontende ha oguerovia pe oaprendéva.
◼ Eiporu tiémpo oñekotevẽháicha rehesaʼỹijo hag̃ua umi téysto vívliko ohechaukáva mbaʼérepa jaguerovia peteĩ mbaʼe.
Ani opytapyta pe estúdio.
◼ Pe estudiánte oñeʼẽ hetaséramo umi mbaʼe ojepyʼapývare, ikatu ere chupe peñemongetataha umi mbaʼére pestudiapa rire.
◼ Ani reñeʼẽ hetaiterei pe estúdio aja. Ndahaʼéiramo iñimportantevéva, ani rehesaʼỹijoiterei umi mbaʼe, ha ani rembopuku umi eysperiénsia. Upéicha pe estudiánte oaprende porãvéta umi mbaʼe oñekotevẽvéva Ñandejára Ñeʼẽgui.
Párte 6: Pe estudiánte oporandu vove peteĩ mbaʼe
Pe estúdio osegítaramo, iporãve ojestudia pe puvlikasiónpe oĩháicha, oñeñeʼẽrangue michĩmi heta mbaʼére. Upéva oipytyvõta pe estudiántepe oikuaa porã hag̃ua pe añetegua oikotevẽva, ha oñakãrapuʼã hag̃ua espiritualménte (km-S 2/05 páhina 6).
Ehechakuaákena pe oñekotevẽva.
◼ Oporandúramo peteĩ mbaʼe upe ojestudiávagui, ikatu upepete remyesakã chupe.
◼ Oporandúramo peteĩ mbaʼe noĩriva pe estúdiope, térã peteĩ mbaʼe tekotevẽva restudia porãve, ikatu peheja peñemongeta hag̃ua upévagui opyta porãve jave. Ikatu nepytyvõ rehaíramo pe oporandúva.
◼ Pe estudiántepe hasýramo oguerovia hag̃ua peteĩ mbaʼe pestudiáva, upepete ehechave informasión rehesaʼỹijo porã hag̃ua hendive upe téma.
◼ Ndaikatúiramo gueteri ontende porã, eheja upe téma upe rire g̃uarã ha pesegi pe estúdio.
Ehechauka neumildeha.
◼ Ndereikuaáiramo peteĩ mbaʼe oporandúva, ani ere pe reimoʼãvante.
◼ Eipytyvõ pe estudiántepe haʼe voi otopakuaa hag̃ua umi rrespuésta oikotevẽva.
Párte 7: Ñañemboʼe pe estudiohápe
Pe ostudiáva la Biblia oñakãrapuʼã hag̃ua espiritualménte, Jehová vendisión iñimportanteterei. Upévare iporã ñañemboʼe pe estúdio oñepyrũ ha opa hag̃ua (km-GI 3/05 páhina 4).
Mbaʼépa ikatu jajapo ñañepyrũ hag̃ua ñañemboʼe pe estudiohápe.
◼ Peteĩ tapicha iñandejararayhúva ndive, ikatu jajapo upéva pe primer estúdio guive.
◼ Umi ótro estudiánte ndive jahechavaʼerã arakaʼépa iporãta ñañepyrũ ñañemboʼe.
◼ Pe estudiánte ohecha hag̃ua mbaʼérepa iporã ñañemboʼe, ikatu jaiporu Salmo 25:4, 5 ha 1 Juan 5:14.
◼ Ikatu jaiporu Juan 15:16 jahechauka hag̃ua tekotevẽha ñañemboʼe Jehovápe, Jesucristo rupive.
Mbaʼépa ikatu jaʼe ñañemboʼe jave.
◼ Iporã jaalava Jehovápe, ouhaguére ichugui pe enseñánsa.
◼ Ikatu jaʼe umi mbaʼe ohechaukáva ñañeinteresaha pe estudiánte rehe.
◼ Ikatu jaguerohory pe organisasión Jehová oiporúva.
◼ Ikatu jajerure Jehovápe ovendesi hag̃ua pe estudiántepe oñehaʼãhaguére oiporu umi mbaʼe oaprendéva.
Párte 8: Ñaipytyvõ ñane estudiántepe oikese hag̃ua Jehová organisasiónpe
Jajapóvo peteĩ estúdio vívliko, nañamboʼéi ñane estudiántepe umi doktrína añónte. Ñaipytyvõse avei chupe oike hag̃ua pe kongregasión kristiánape. Ikatu káda semána reñeʼẽ mbykymi chupe pe estudiohápe peteĩ mbaʼére Jehová organisasióngui (km-GI 4/05 páhina 8).
Rreunionkuéra kongregasionpegua.
◼ Eipytyvõ chupe oikuaa hag̃ua mbaʼépa ojejapo umi rreunionhápe. Pe primer estúdio guive emokyreʼỹ chupe oho hag̃ua rreunionhápe.
◼ Emombeʼu chupe umi mbaʼe iñimportantevéva reaprendevaʼekue rreunionhápe.
◼ Emokyreʼỹ chupe ohose hag̃uáicha Memorial, asambleahápe, ha ou vove superintendénte de sirkuíto.
◼ Eiporu umi taʼanga osẽva ñane puvlikasionkuérape ohecha porãve hag̃ua mbaʼépa ojejapo umi rreunionhápe.
◼ Emokyreʼỹ chupe olee hag̃ua pe folléto Los Testigos de Jehová: ¿quiénes son y qué creen?
Eiporu koʼã vidéo remokyreʼỹve hag̃ua chupe:
◼ Los testigos de Jehová... la organización tras el nombre
◼ Toda nuestra asociación de hermanos
◼ Unidos gracias a la enseñanza divina
◼ Hasta los cabos de la Tierra
Párte 9: Japrepara ñane estudiántepe opredika hag̃ua oimehápe
Umi estudiánte oñepyrũramo ojerovia pe oikuaa pyahúvare, oñeʼẽséta katuete umi mbaʼégui (km-GI 5/05 páhina 1).
Emokyreʼỹ chupekuéra opredika hag̃ua.
◼ Oguerekópa iñirũnguéra térã hogayguakuéra ikatúva oinvita ohendu hag̃ua pe estúdio?
◼ Oĩpa iñirũnguéra imbaʼapohápe, eskuélape térã ótro hendápe oikuaasevéva Ñandejára Ñeʼẽgui?
Emboʼe chupekuéra oñeʼẽkuaa hag̃ua umi mbaʼe ogueroviávagui.
◼ Pe estúdio jave, opyta porãvehápe, eporandu chupe: “Mbaʼéichapa reiporúne la Biblia reñeʼẽ hag̃ua ne família ndive ko mbaʼe reaprendévagui?”
◼ Eipytyvõ chupe ohecha hag̃ua tekotevẽha jaiporavo pe jaʼétava ha mbaʼeichahápepa ñañeʼẽta, iporãha jarrespeta ñande rapichápe ha ñanderory hendivekuéra ñañeʼẽ jave Ñandejára Jehová ha ipropósitogui.
◼ Pe folléto Los testigos de Jehová: ¿quiénes son y qué creen? ikatu oiporu oipytyvõ hag̃ua iñangirũnguérape térã hogayguakuérape ontende hag̃ua pe jagueroviáva la Bíbliagui ha pe tembiapo jajapóva.
Párte 10: Ñamboʼe ñane estudiántepe opredikakuaa hag̃ua opa ogaha rupi
Umi ansiáno heʼi rire peteĩ estudiántegui ikatumaha oiko peteĩ puvlikadór, pe estudiánte ikatúma osẽ opredika kongregasión ndive (km-GI 6/05 páhina 1).
Japrepara hendive.
◼ Ehechauka pe estudiántepe moõpa ikatu otopa umi presentasión ikatúva oiporu.
◼ Peiporavo peteĩ presentasión ndahasýiva, ikatúva ojeporu porã nde territóriope.
◼ Emokyreʼỹ chupe oiporu hag̃ua la Biblia opredika jave.
◼ Peñensaja oñondive. Ehechauka chupe mbaʼéichapa ikatu okontesta pyʼaguapy porãme umi ñembohovái ojeporuvéva nde territóriope.
Japredika hendive.
◼ Eheja pe estudiánte ohecha nde rejapo aja pe presentasión pepreparavaʼekue oñondive.
◼ Reikuaavaʼerã mbaʼéichapa haʼe ikatu oñeñandu ha mbaʼe pevépa ikatúta ojapo. Ñepyrũrã iporãve haʼe oñeʼẽ mbykymínteramo nendive pe óga járape.
◼ Eipytyvõ pe puvlikadór pyahúpe ojepokuaa hag̃ua osẽ meme predikasionhápe.
Párte 11: Ñaipytyvõ ñane estudiántepe ojapo hag̃ua rrevisíta
Peteĩ rrevisíta ojejapo hag̃ua oñembohapevaʼerã pe primera visítape. Emokyreʼỹ ne estudiántepe oipytyvõse hag̃ua pe óga járape. Emboʼe chupe oikuaa hag̃ua mbaʼéichapa ikatu omokyreʼỹ pe óga járape heʼi hag̃ua pe opensáva, ohendukuaa hag̃ua pe óga jára oñeʼẽvo, ha ohechakuaa hag̃ua mbaʼépa oipyʼapy chupe oñeʼẽ hag̃ua upévagui (km-GI 7/05 páhina 1).
Japrepara hendive oho jey hag̃ua.
◼ Peñemongeta pe primera visítare, ha ehechauka pe estudiántepe mbaʼéichapa ikatu oiporavo peteĩ téma pe óga jára ikatúva ohenduse.
◼ Peprepara oñondive peteĩ presentasión peiporuhápe peteĩ téysto vívliko ha peteĩ párrafo pe puvlikasión oiporútavagui.
◼ Peprepara avei peteĩ mbaʼe oporandútava omohuʼãvo pe visíta.
Ñaipytyvõ kyreʼỹme.
◼ Eipytyvõ ne estudiántepe oho jey hag̃ua pyaʼe porã ovisita opavave oikuaasevévape.
◼ Ehechauka chupe sapyʼánte tekotevẽha jaha jey jey jatopa hag̃ua hógape peteĩ tapichápe.
◼ Ere chupe iporãtaha oporandúramo pe óga járape arakaʼépa ikatúta oho jey, ha eipytyvõ chupe ohecha hag̃ua mbaʼérepa iñimportánte ojeho jey pe ojeʼehaguéicha.
Párte 12: Ñaipytyvõ ñane estudiántepe omoñepyrũ ha ojapo hag̃ua estúdio vívliko
Iñimportanteterei nde avei rejapo pe Jesús ojapohaguéicha, ha remoĩ avei peteĩ ehémplo iporãva ne predikasiónpe. Ohecháramo pe ehémplo remoĩva ne predikasiónpe, ne estudiánte ohechakuaáta ojejapoha rrevisíta oñemoñepyrũ hag̃ua estúdio vívliko (km-GI 8/05 páhina 1).
Mbaʼéichapa ikatu oñekuaveʼẽ peteĩ estúdio vívliko.
◼ Natekotevẽi ñamombeʼupaite pe óga járape mbaʼéichapa jajapo peteĩ estúdio.
◼ Iporãve jepi jahechaukánte chupe, ha upearã ikatu jaiporu peteĩ térã mokõi párrafo peteĩ puvlikasióngui.
◼ Pehecha jey ha peñensaja peiporu hag̃ua peteĩ suherénsia oñemeʼẽva oñemoñepyrũ hag̃ua peteĩ estúdio vívliko (km-GI 8/05 páhina 8 ha km-S 1/02 páhina 6).
Ñaipytyvõ ñane estudiántepe oporomboʼekuaa hag̃ua.
◼ Emokyreʼỹ chupe oike hag̃ua pe Eskuéla dél Ministério Teokrátikope.
◼ Emokyreʼỹ ne estudiántepe oho hag̃ua nendive ótro estúdio vívliko rejapohápe. Upépe haʼe ikatu omboʼe michĩmi nendive.