Mbaʼéichapa ikatu ñaporomboʼe porã?

1. Mbaʼérepa ñaipytyvõvaʼerã ñane estudiántepe ohayhu ha omombaʼe hag̃ua la Biblia?

¹ Jastudiávo ñande rapichándi jaipota Ñandejára Ñeʼẽ og̃uahẽ ikorasõme ha tomomýi chupe oservi hag̃ua Jehovápe. Ha jahupyty hag̃ua upéva ñaipytyvõvaʼerã chupekuéra omombaʼe ha ohayhu hag̃ua la Biblia heʼíva, péicha añoite oserviséta Jehovápe (Deu. 6:5; Pro. 4:23; 1 Cor. 9:26). Mbaʼépa jajapovaʼerã upearã?

2. Mbaʼérepa ñañemboʼevaʼerã ñañembosakoʼívo estudiorã?

² Ñañemboʼe Jehovápe. Jaikuaaháicha Jehová añoite ikatu omomýi ñane estudiántepe oñemoag̃uive hag̃ua hese. Upévare ñañembosakoʼívo estudiorã, ñañemboʼevaʼerã ñane estudiántere ha jajerure Jehovápe toipytyvõ chupe (1 Cor. 3:6; Sant. 1:5). Upéva ñanepytyvõta avei jahechakuaa hag̃ua mbaʼéichapa ikatu jaiporu Ñandejára Ñeʼẽ og̃uahẽ hag̃ua ikorasõme ha oikuaa porãve hag̃ua Jehová rembipota (Col. 1:​9, 10).

3. Mbaʼépa ñañeporanduvaʼerã ñañembosakoʼívo estudiorã?

³ Ñapensa mbaʼépa oikotevẽ ñane estudiánte. Jesús oporomboʼérõ guare opensavaʼekue mbaʼeichagua héntepa ohendu chupe. Pór ehémplo, Lucas 10:​25-28-pe omombeʼu peteĩ kuimbaʼe oñemboja hague hese ha oporandu: “Mbaʼe piko ajapovaʼerã aguereko hag̃ua jeikove opaʼỹva?”. Upe rire Lucas 18:​18-20 heʼi ótro kuimbaʼe oporandu jey hague chupe upéva. Mbaʼépa heʼi Jesús? Haʼe nombohováiri chupekuéra peteĩchaite. Upéva ohechauka ñandéve nañamboʼeivaʼerãha ñane estudiantekuérape peteĩchapa ha ñapensavaʼerãha hesekuéra ñañembosakoʼívo estudiorã. Upévare ñañeporanduvaʼerã: Mbaʼe téystopa aleéta chupe? Mboýpa astudiáta hendive? Mbaʼépa hasyvéne chupe ontende hag̃ua? Ha mbaʼe mbaʼépa ikatu oikuaaseve? Ñapensa meméramo koʼã mbaʼére ñaipytyvõ porãvéta chupekuéra.

4. Mbaʼéichapa ikatu ñañembosakoʼi porã jajapo mboyve peteĩ estúdio?

⁴ Ñañembosakoʼi porã. Jaipotáramo Ñandejára Ñeʼẽ opoko ñane estudiánte korasõre ñañembosakoʼi porã vaʼerã. Ha jepeve hetaiterei vésema jastudia upe ñamboʼétava ñanemanduʼavaʼerã ñane estudiánte primera vés ohendutaha upéva. Avei jaʼéramo ñane estudiántepe: “Ejeprepara porãkena ha eheka umi téysto”, ñande avei jajapovaʼerã upéicha. Upévare, ñañembosakoʼívo ñapensavaʼerã ñane estudiántere ha ñamarka umi mbaʼe ou porãtava chupe (Rom. 2:​21, 22).

5. Mbaʼéichapa ikatu ñahaʼanga Jehovápe?

⁵ Jehová ningo oipotaiterei ñane estudiantekuéra oñemoag̃ui hese (2 Ped. 3:9). Ha ñande avei ñahaʼangáta chupe ñañemotiémporamo ñañembosakoʼi porã hag̃ua jastudia mboyve hendivekuéra.