Mbaʼe mbaʼépa ojehupyty ñane predikasión rupive
1. Mbaʼéichapa ohecha Jehová ñane predikasión ha mbaʼépa ojapo yvyporakuéra?
1 Ñandejára Ñeʼẽ heʼi kristianokuéra odesfilahahína Jehová servísiope, ojapohaguéicha yma umi oganavaʼekue ñorairõhápe (2 Cor. 2:14-16). Ñamboʼévo ñande rapichakuérape Jehovágui, haʼe oguerohory ñane predikasión, oguerohoryháicha pe insiénso hyakuã asýva. Oĩ umi oguerohorýva pe marandu porã heʼẽ asýva; oĩ katu umi nohenduséiva. Péro oĩ hetágui umi ndoikuaaséiva ndeʼiséi ñambaʼapo reiha ñaína. Jahechamína koʼã mbaʼe ojehupytýva ñane predikasión rupive.
2. Mbaʼépa ikatu jahechauka ñane predikasión rupive?
2 Omombaʼeguasu Jehovápe. Satanás heʼi yvyporakuéra oserviha Jehovápe onohẽhaguére chugui mbaʼe porã ijupekuéra g̃uarãnte (Job 1:9-11). Ñane predikasión rupive ikatúta jahechauka Ñandejárape jahayhuha chupe ñande pyʼaite guive. Oĩ heta puvlikadór osegíva opredika ha ojapo disípulo ohasa asýramo jepe térã oĩramo jepe heta nohenduséiva. Umícha ojepytasóva ombopyʼarory Jehovápe! (Pro. 27:11.)
3. Mbaʼérepa tekotevẽterei jasegi ñamombeʼu Ñandejára réra ha pe ojapótava?
3 Avei, pe predikasión rupive, Ñandejára ikatúta ojapopa pe heʼivaʼekue. Omombeʼúvo mbaʼéichapa ohundíta ko múndo Satanás oisãmbyhýva, Jehová heʼi: “Ha tetãnguéra oikuaavaʼerã che haʼeha Jehová” (Eze. 39:7). Ikatu hag̃uáicha tetãnguéra oikuaa upéva, Ñandejára siervokuéra osegimantevaʼerã omombeʼu “opavave yvy ape ári oikóvape, ha opa tetã ha trívu, ha ñeʼẽ ha tapichápe” mbaʼéichapa héra Ñandejára ha mbaʼépa ojapóta (Rev. 14:6, 7).
4. Mbaʼéichapa ojeporu pe predikasión ojehusga hag̃ua tapichakuérape?
4 Ojeporu ojehusga hag̃ua tapichakuérape. Pe predikasión jajapóva pe marandu porãgui ojeporu avei ojehusga hag̃ua tapichakuérape. Pe apóstol Pablo heʼivaʼekue Jesucristo oguerutaha “vengánsa umi Ñandejárape ndoikuaáivape ha umi nohendúiva pe marandu porã ñane Señór Jesucristo reheguápe” (2 Tes. 1:8, 9). Ojehusga hag̃ua tapichakuérape ojehecháta mbaʼépa ojapo ohendu rire pe marandu porã. Ajépa tuicha rresponsavilida omoĩ upéva ñande ári! Ndajaguerekoséiramo kúlpa ñande rapicha omanohaguére, ñamombeʼuvaʼerã chupekuéra pe marandu porã ikatúva osalva hekovekuéra (Hech. 20:26, 27).
5. Mbaʼéichapa pe predikasión ohechauka Ñandejára oiporiahuverekoha yvyporakuérape?
5 Pe tembiapo jajapóva ñaipytyvõ hag̃ua ñande rapichápe oĩ porã hag̃ua Ñandejára ndive, ohechauka mbaʼéichapa Jehová oporoporiahuvereko (1 Tim. 2:3, 4). Jaikuaágui ñande rapichakuéra situasión pyʼỹinte okambiaha, jaha jey jey ñamokyreʼỹ chupekuéra oheka hag̃ua Jehovápe ikatu aja gueteri. Upéicha jajapóvo jahechauka mbaʼéichapa Ñandejára ‘oiporiahuvereko asy’ yvyporakuérape, “ndoipotáigui oñehundi avave; oipota uvei opavave oñembyasy hembiapo vaígui” (Luc. 1:78; 2 Ped. 3:9).
6. Mbaʼéichapa ñañevenefisia ñambaʼapo meméramo Jehová servísiope?
6 Ñanevenefisia ñandéve avei. Ñambaʼapo meméramo Jehová servísiope ñañangarekoñaína ñandejehe avei. Ñanepytyvõ ‘ñahaʼarõ hag̃ua pe Jehová ára og̃uahẽtava’, ha ani hag̃ua ñanembyai ko sistéma vai koʼag̃agua (2 Ped. 3:11-14; Tito 2:11, 12). Upévare, ‘ñañehaʼãkena jajepytaso, ani jaʼa rei, ha ñanerembiapo heta meme’ Ñandejára servísiope, jaikuaágui pe ñañehaʼãramo ñane predikasiónpe nañambaʼaporeirihañaína (1 Cor. 15:58).