Mbaʼéichapa ikatu ñaipytyvõ?
1 “Mbaʼéichapa ikatu ñaipytyvõ?”. Péicha oporandu jepi Testigo de Jehovakuéra ohendúvo oikoha peteĩ mbaʼeguasu ivaietereíva. Ohechaukaháicha Hechos 11:27-30, umi kristiáno primer síglope guare oipytyvõvaʼekue iñermanokuéra Judeayguápe, oúrõ guare peteĩ ñembyahýi.
2 Koʼág̃a avei, umi rreglaménto oiporúva ñane organisasión heʼi ikatuha ojeporu viru oñepytyvõ hag̃ua umi oikotevẽvape oiko jave umi mbaʼe vai guasuete. Ikatu oiko yvyryrýi, yvytu hatãitereíva, térã umi mbaʼe vai yvypóra rembiapokuére, ha hetave mbaʼe.
3 Pe áño ohasavaʼekuépe, pór ehémplo, heta ermáno oguerahauka kontrivusión oñepytyvõ hag̃ua amo Ásiape, pe tsunami (oláda guasuete) oikohaguépe. Umi kontrivusión, tayhupápe ojeguerahaukavaʼekue oñepytyvõ hag̃ua, ojeguerohoryeterei. Péro jaʼéramo jaguerahaukaha peteĩ kontrivusión ojeporu hag̃ua peteĩ hendápente, ñanemanduʼavaʼerã oĩha umi tetã heʼíva umichagua kontrivusión upépente ikatuha ojeporu ha arakaʼépa ojeporupavaʼerã. Sapyʼánte katu upépe oñepytyvõpáma, ha pe viru noñekotevẽvéima upe hendápe.
4 Upévare rojerure oñemoĩnte hag̃ua pe káha de kontrivusión heʼíva “Obra mundial”-pe oimeraẽ kontrivusión ojejapóva oñepytyvõ hag̃ua oñekotevẽhápe. Pe viru oñemoĩva upépe ojeporu oñepytyvõ hag̃ua umi oikotevẽvape ha avei ojeguerahauka hag̃ua umi ermáno oparupiguápe umi mbaʼe ojeporútava ojejapo hag̃ua Ñandejára servísio. Oĩramo umi omoĩva kontrivusión “Obra mundial”-pe g̃uarã ha omoĩséva katuete oñepytyvõ hag̃ua avei umi oikotevẽvape, upéva ikatu ojejapo, ha ojeporúta pe viru oĩ vove umi oikotevẽva. Péro iporãvéta ndojeʼéiramo moõpa ha mbaʼéichapa ojeporuvaʼerã pe viru.
5 Ñamoĩramo ñane kontrivusión “Obra mundial”-pe g̃uarã, oĩvéta viru ojejapo hag̃ua opa mbaʼe oñekotevẽva oñemombeʼu hag̃ua Ñandejára Rréino marandu porã, oñeñongaturangue pe viru ojeporu hag̃ua oĩháme mbaʼe vai guasu añoiténte. Upéicha jajapoñaína pe Efesios 4:16-pe heʼiháicha, ñambaʼapo hag̃ua oñondivepa ñamoĩ hag̃ua pe oñekotevẽva, ‘pe kongregasión imbareteve hag̃ua mborayhúpe’.