¿Mbaʼéichapa ikatu ñaipytyvõ oiko jave peteĩ desástre?

Koʼág̃arupi pyʼỹivéntema oiko umi desástre naturál. Péicha jave, tekotevẽterei oñeorganisa porã umi mbaʼe ojejapótava oñepytyvõ hag̃ua umi ohasa asývape. Upearã pe Kuérpo Governánte ojerure oĩ hag̃ua káda sukursálpe ko múndo tuichakuére peteĩ Departamento de Labores de Socorro.

Umi ermáno oĩva ko departaméntope oikuaávo oiko hague peteĩ desástre, ensegída oñekomunika umi ansiáno upe lugarpeguándi ha oaverigua mbaʼépa oikotevẽ hína umi ermáno. Ikatu oime ivaieterei la situasión ha umi ermáno pe lugarpegua ndaikatumoʼãi osolusiona la oikóva haʼekuéra año. Upéicha jave pe sukursál onombra unos kuánto ermáno ikatupyrývape odirihi hag̃ua umi lavór de sokórro. Koʼã ermáno ikatu ojerure voluntário oipytyvõ hag̃ua, avei oñedona hag̃ua algúna kósa, térã ikatu ojogua la oñekotevẽva ha upéi orreparti umíva.

Tuicha ideprovécho enterovépe oñeorganisávo péicha la traváho. Por ehémplo ndojeikói oñembaʼapopa rei, umi oporopytyvõtava ndoikomoʼãi oñekonfundipa ha ndojepuruvaimoʼãi pe pláta térã ótra kósa. Ha lastimósamente koʼã mbaʼe oikose jepi káda uno oñepyrũrõ ijeheguíntema oporopytyvõ.

Umi ermáno onombráva pe sukursál okalkula porã pe pláta oñekotevẽtava ha avei mboy voluntáriopa ifáltata. Avei koʼã ermáno ikatu oñeʼẽ umi autoridándi ojehecha hag̃ua ndaikatúipa pyaʼeve ojejapo umi lavór de sokórro. Upévare, ndovaléi avave oñepyrũntema ijeheguínte ombyaty pláta, oguerahaka oñekotevẽva térã oho voi pe lugár oiko haguépe la desástre.

Enterovéva jahayhueterei ñane ermanokuérape ha upévare ñahendúvo oikoha peteĩ desástre jajaposeterei álgo hesehapekuéra (Heb 13:16). Upévare, ¿mbaʼépa ikatu jajapo? La iñimportantevéva hína ñañemboʼe umi ermáno ohasa asývare ha umi voluntário oipytyvõvare. Avei ikatu ñamoĩ ñane kontrivusión pe óvra mundiálpe g̃uarã. Umi sukursál ombaʼapo pe Kuérpo Governánte poguýpe ha oikuaa porã mbaʼéichapa okonvenive ojepuru umi kontrivusión. Ha oimérõ ñande voi jahase ñaipytyvõ, ikatu ñakompleta pe Solicitud de voluntario local de diseño y construcción (DC-50).

EHECHA PE VIDÉO UMI INUNDASIÓN OJAPO SARAMBI BRASÍLPE, HA UPÉI ERRESPONDE KO PORANDU:

Rehechávo la ojapóva umi Testígo Brasílpe, ¿mbaʼépa la opokovéva nderehe?