Jahechauka jajepyʼapyha ñande rapicháre: Ñanderory, ñanembaʼerechakuaa ha japororrespeta rupive
1 Haʼéramo jepe pe Tuichavéva ko univérsope, Jehová hory, imbaʼerechakuaa ha orrespeta yvypóra imperféktope (Gén. 13:14; 19:18-21, 29). Ñañehaʼãramo jajapo upéicha avei, ñandekatupyryvéta ñamog̃uahẽ hag̃ua ñande rapichakuérape pe marandu porã (Col. 4:6). Ñañemongetávo, ñamombaʼe ha jarrespetavaʼerã ñande rapichápe, péro oĩ hetave mbaʼe ikatúva jajapo.
2 Ogaha rupi. Mbaʼépa jajapóta ñag̃uahẽramo umi óga jára noĩporãi jave, térã hembiapoitereíramo? Upeichahápe iporãvéta ñañeʼẽ mbykymínteramo, térã jaʼéramo ikatuha jaju jey ótro día. Sapyʼánte oĩ avei umi heʼíva ñandéve ndoipotaiha pe puvlikasión ñaikuaveʼẽva. Ñanderechakuaa ha japororrespetáramo ndajahejasemoʼãi katuete pe puvlikasión. Jarrespetavaʼerã avei pe óga ahéno. Ñamboty porã vaʼerã pe portón térã pe okẽ ñasẽnguévo ha ñamboʼevaʼerã ñande raʼykuérape ojapo hag̃ua upéicha avei. Ha jahejáramo peteĩ puvlikasión pe óga jára ndaiporihápe, ñamoĩvaʼerã ndohechamoʼãihápe umi ohasáva. Ñanembaʼerechakuaa ha japororrespetáramo ñañehaʼãta jajapo ñande rapichakuérare jaipotaháicha haʼekuéra ojapo ñanderehe (Luc 6:31).
3 Kállepe. Japredikávo pe kállepe, japororrespetáramo nañambotymoʼãi pe tape umi ohasávagui, ha nañañembyatymoʼãi hetaiterei umi negósio renondépe. Avei, ñañehaʼãta ñañemongeta umi ikatúva ndive, ñañehaʼãrangue ñañeʼẽ umi ojapuráva ndive. Sapyʼánte pe kállepe heta pe tyapu, ha ñañeʼẽ hatãmímante, péro jajapóta upéva hendápe porã, ani hag̃uáicha oñemaʼẽmba ñanderehe (Mat. 12:19).
4 Japredika jave teléfono rupive. Ñanembaʼerechakuaáramo jaiporúta teléfono ndaiporihápe heta tyapu. Ojekuaa avei ñamombaʼeha ñande rapichápe ñañepyrũvo ñamombeʼúramo ñande réra ha maʼerãpa ñahenói. Ñañemoag̃ui porãramo pe teléfonore, ha ñanderorýramo, ñañemongeta porãvéta Ñandejára Ñeʼẽgui pe ohendúva ndive (1 Cor. 14:8, 9). Upévare, ñañehaʼãkena jajapo Ñandejára Jehová ojapoháicha: ñanderory, ñanembaʼerechakuaa ha japororrespeta.