Ikatúpa japredika pór teléfono?
1. Mbaʼérepa iporã japredika pór teléfono?
1 Mbaʼérepa iporã japredika pór teléfono? Jajapóramo upéicha ñaipytyvõñaína ñande rapichakuérape oikuaa hag̃ua Jehovápe ha ponóike oñehundi (2 Ped. 3:9). Ñande ningo japredikave ogaha rupi, péro nameméi jatopa ogajárare, upévare jahekavaʼerã chupe ládo jatopa hag̃ua hesekuéra (Mat. 24:14; Luc. 10:1-7; Rev. 14:6).
2. Mbaʼéichapa ikatu japredika pór teléfono?
2 Mbaʼéichapa ikatu jajapo. Ñasẽ mboyve japredika ogaha rupi jaikuaáma moõ gotyopa jaháta, péicha avei japredikáta jave pór teléfono jaikuaavaʼerã mbaʼe lugárpepa ñahenóita. Ha jajapóvo upéva ikatu japredika ñaneaño térã jajerure peteĩ ỹrõ mokõi ermánope tañanemoirũ. Ñañeʼẽta jave ñaĩvaʼerã peteĩ lugár trankílope, avave ha mbaʼeve ñanemolestaʼỹ hag̃uáme. Oĩ ermáno oguerekóva voi ijykére lívro, rrevísta ha ambue mbaʼe oiporúva jepi opredika jave ogaha rupi.
3. Mbaʼe mbaʼépa jajapovaʼerã japredika hag̃ua pór teléfono?
3 Mbaʼépa jaʼevaʼerã ha mbaʼéichapa. Ñane Marandu Porã, lívro Razonamiento ha tratádo Ndépa reñeporandúmava koʼã mbaʼe? ñanepytyvõta jaikuaa hag̃ua mbaʼépa jaʼéta ñapresenta vove peteĩ puvlikasión. Ñepyrũrã jaikuaavaʼerã mbaʼéguipa ñañeʼẽta, upéi mbaʼépa ñaporandúta ha mbaʼe téystopa jaiporúta ñambohovái hag̃ua upe porandu. Ikatu jaiporu umi puvlikasión ñaikuaveʼẽva jepi predikasiónpe. Oiméramo neʼĩra gueteri japredika pór teléfono ikatu jahai peteĩ kuatiáre jaʼétava, péro hiʼãite ndopillái jaleeha chupe upégui. Jajapovaʼerã trankílo porãnte, ani ñañeʼẽ pyaʼeterei, upéva rangue ñanderory ha jasaluda porã vaʼerã, upéicharõ pe ogajára ñanerenduséta. Ha oñeʼẽvo ñandéve katu ñañatendevaʼerã hese ha ñamombaʼe upe heʼíva. Anínte jaʼe ikatuha omeʼẽ ikontrivusión pono oimoʼã ñambaʼevendeseha pór teléfono.
4. Mbaʼépa ikatu jahupyty japredikávo pór teléfono?
4 Ñapensamíntena mbaʼépa ikatu jahupyty japredikávo pór teléfono! Pór ehémplo ñamog̃uahẽkuaa pe marandu porã umi ndaikatúivape osẽ hógagui hasykatu rupi térã oĩva itravahohápe ñande japredika jave ogaha rupi. Avei ikatu japredika umi oikóvape edifisioháre térã umi lugár ikatuʼỹháme jaike. Ñañehaʼãmbaitékena japredika pór teléfono, péicha ikatúta ñamoherakuã hekoitépe pe marandu porã.